澳門旅遊數字....

今日報紙新聞話，上年旅遊澳門人數有成2,700萬，只係少香港100萬啫，重講到佢地好似好威脅香港旅遊地位咁話。

我剛剛去過澳門，都仍舊覺得澳門幾好玩。人少少 (以前更好), 有d歐陸風情。食野平d，搭車又平d。依家就多左好多好靚嘅賭場添，棟棟賭場嘅外表真係好金碧輝煌。日頭唔覺，夜晚景色就份外美麗。本人對賭全無興趣，但上星期去左兩日，都特登走去參觀左幾間賭場 - 威尼斯人、新葡京、金沙、永利  (好彩不受引誘, 一豪子都冇賭過, haha)。威尼斯人真係靚到爆，好華麗，一d都唔cheap, 而且佢地好鬼醒，賭枱、酒店lobby、餐廳、行街舖頭撈到亂晒，攪到你眼花撩亂，唔賭錢都會侷你行街買野食野，終之務求要你花錢！

其餘嘅賭場，都係齋賭居多，唔賭的話，行個圈就會走人。

我今次去澳門最重要係去睇個達文西展。早排睇左一本關於達文西嘅書後，就迷上左佢，所以聽到澳門有呢個展覽後，就決定要為文西哥而過大海一次。  個show幾好睇, 有好多根據達文西嘅設計而做番出來嘅物件，又有關於佢一d名畫嘅解畫...終之就好好睇。不過好似唔係好多人有興趣睇呢個show咁，裡面人流麻麻，頗清靜 (都好，唔駛鬼殺咁嘈，可以靜心欣賞)。睇完個show出左黎見到特首何厚樺同一班內地人，係澳門塔個中餐廳食飽飯出黎。

澳門塔頂個旋轉餐廳自助餐，d野幾好食，唔算貴 (HK$213一位), 好多野食，個view又正，重撞啱有幾個人跳bumgy jump幫我地助慶添！

澳門d手信 野食 (忌記、早香園etc),  太美味喇！！

點解漁人碼頭呢個應該係熱門嘅旅遊點會拍晒烏蠅的?  唔通d人只係關心要去光顧賭場？

我覺得澳門唔係香港嘅敵人囉，我覺得佢係我地個friend。世界上邊有一個地方可以佢叻晒？ 如果唔係唔駛去旅行見識啦。 

香港做好自已，想多d計仔提升自已，先係上策.....以上廢話，只代表本人意見，不代表Yahoo立場，哈哈哈哈哈哈哈。