回顧自己的2008年

2008年, 真係過得幾快。 某程度上, 我熱切期待呢年快脆過左佢....

1月2日, 開年流流, 就因為急性腸胃炎, 夜媽媽搭的入去瑪麗急診室....以後, 除左希望身體安康外, 就算唔好彩要睇病, 都咪去政府急診室, 冇意思, 等...等...等....睇左等於冇睇, 睇左衰過未睇, 睇佢做乜鬼??

4-5月, 好開心, 去左3個星期意大利玩...見番D舊友, 識左D新朋友。去都靈朝拜, 入球場睇波, 住當地人屋企見識見識, 又一次近距離見到祖記球員, 攞左D簽名, 影左D相, 但唔見左件波衫....返到黎3日就到祖記訪港, 真係好好彩, 撞彩都冇咁啱....2008年4/5月本人真係過得好快樂。

6月, 病, 醫生, 食藥, 煩惱.....之後嘅幾個月, 都如此 yim悶渡過....呢個暑假, 再加我喜歡嘅球員PALLA被祖記50%賣去熱拿亞添....算啦, 我睇化喇, 佢掂嘅一定可以歸隊。 我祝佢健健康康, 踢好每場波!!!

今日 ~ 終於係2008年嘅最後一日喇。

**************************** 來年願望ssssss ***********************

1) 至重要係遠離病毒/病痛..... 不過3月都怕且要再一次視網膜激光手術

2) 雖則經濟不景, 但希望唔影響到我旅行計劃, 人生最大樂事乃遊山玩水也 (當然大前提係仍舊有糧出)...

3) 保住份工我就心滿意足, 同一時間都希望我阿頭有得繼續留低, 我唔會/唔想做孤兒仔...

4) 讀好D書, 攪好listening, 咪時意大利文永世都進步唔到...點夢想成真入祖記總部揾番一官半職呀....(都未夠鐘上牀已經發緊夢)

5) 發達 ~ 強烈希望 (妄想?) 中六合彩頭獎, 我已經安排好將D錢點用, 只等錢到手啫!  哈哈哈

6) 睇多D好書, 唔好浪費無謂錢... 納稅人應 "善用"資源, 去多D公共圖書館借書睇....買書就鬼死咁貴, 但賣出去二手店唔值錢的!  但我捐7本書去公共圖書館, 佢地打番電話比我, 叫我攞番其中5本走, 話唔啱用!  吹漲! 

7) 祖記嬴晒意甲冠軍, 意大利杯冠軍, 歐聯冠軍!  (呢樣難定係中六合彩三個半字難D呢???)

8) 雖然今年睇醫生次數可能係我做人以來所有睇醫生次數加埋嘅總和, 但做人一定要有信心, 充滿正能量先得。 

好!  努力做人 (=/= 造人)!!!  2009年要做更健康生活, 更精神爽利嘅人!    在此亦祝有耐性睇到呢個位嘅您 ~ 身體健康, 身心康泰, 工作愉快, 2009年萬事更勝意!!  大家努力積極向上呀!

(有冇留意我呢篇blog嘅出版時間呀 ~ 2008年12月31日, 13時28分 ~ 好意頭呀! 

I LIKE IT!!)

2008-09新聞花絮 ~ 1

歇冬期間, 雖然意甲休息, 不過有不少小道消息在流傳中..... 或者講D同祖記有關嘅新聞啦。

1)  大米6月過檔祖記?

剛剛睇到一單消息, 話熱拿亞之所以拒絕晒所有球會對大米嘅收購, 係因為熱拿亞與祖記已協定, 大米將於6月過檔祖記!!!  真係吹水啦, 祖記D前鋒多到乜, 又黎一件?  佢作用會唔會同查仔/阿瑪利太接近呢?  熱拿亞又唔係有財政困難, 有件咁筍嘅前鋒, 靠佢食糊, 點會咁易送佢比另一競爭對手呀?  如果得的話, 仲要用佢下年打足協杯 (甚至可能係歐聯).....除非係天價啦; 但依家經濟咁差, 邊仲有咁多球會肯出天價?

 

2)  伊亞昆達與艾沙雲 (Andrei Arshavin) 交換?

可憐達哥今季以來係超級大後備, 為足球前途著想下, 據講可能願與辛尼特嘅艾沙雲交換!!  channel4.com報道話, 辛尼特保證達哥正選位置, 加上薪金大幅調升, 所以成數機會都幾高.... 如果達哥真係走, 我個人覺得非常可惜........

 

3)  Secco續約3年?

睇到呢單消息簡直係令人沮喪.....唔通真係3年又3年??  同佢續約有乜好??  仲話佢受不少西班牙球會賞識....咁唔該過西甲揾食啦, 唔阻你發達喇。(簽到萬能膠, 施素高我唔認為係Secco功勞...)

 

4)  薜比拿 (Jonathan Zebina) & 恩尼斯域 (Dario Knezevic) 被放棄?

實情勁唔明之前祖記何解會同薜比拿續約....Secco功勞也。依家據報巴黎聖日耳門好有興趣簽薜比拿, 加上祖記唔想要佢, 所以薜比拿好有機會於1月離開祖記...如果係又唔差呢... 

至於恩尼斯域....對佢冇乜印象...佢替祖記踢過幾多場波係一個大問號?????  若萊切肯簽佢過檔都好, 三嬴局面, 相信佢本人都唔想被投閒置散。

 

5)  Paolucci想回祖記效力?

祖記青訓佳品....左借右借下, 依家效力緊卡坦尼亞。據講踢得唔錯, 但老老老實實, 我冇乜follow佢 (係分身都唔掂, follow唔到咁多呢)....佢話夢想可以回祖記, 希望佢夢想成真啦, 祖記產品, 必屬佳品嘛!

覺唔覺佢個樣有D似沙柏 (Lee Sharpe)...??

 

新電腦

呢幾日假期, 話咁快就過完.....現在期待元旦來臨....

終於買左一架新電腦。今次買原廠牌子desktop機, 因為以前買 "hum"機有唔好經驗, 依家買原廠機有3年保養, 中途架機唔好彩中毒, 按個F11制重頭自動reinstall Windows, 唔駛煩, 啱我呢亭電腦盲...  好彩屋企人幫我攪掂晒其他野, 唯獨九方要自己攪, 因以前買開個正版用唔到Vista, 於是乎要特登走落灣仔佢地專門店補錢upgrade另一新版...installed後, 點知發覺都係仲有少少問題, 打中文字成鬼日出D錯碼, 所以放假時要打電話去佢地技術支援中心問一問。

個新電腦真係快好多, 而個新mon係19吋, 比以前嘅14吋mon正太多, 清楚好多, 可以睇DVD碟都得 (不過效果仍唔及電視機)....都唔明自己點解可以忍受之前個電腦 & mon咁耐, 只可以話: 我忍耐力好好, 咁難頂都頂得到!!)

雖然唔想花咁多錢, 但有D時候, 有D錢真係唔到你唔花。 

我諗我除左係電腦盲, 仲係科技盲....我用左個手機大半年, 無意中發現可以點影相喎 (我從來無興趣研究過點用手機影相, 因為覺得手機影相質素低)...上個星期先知乜叫 i-touch!!!  又幾正喎, 用i-touch可以在公共場所玩wi-fi (如果可以免費上網的話), 攪到有D想買部玩下添.....  

 

祖記2008年12月號月刊

通常12月嘅意大利郵政都幾混亂, 所以都有少少懷疑呢期月刊會唔會 "自動"消失...因為記得上年12月個期就發生呢類事, 攪到我要向佢地那邊再寄過一本過來。不過今次好彩, 沒有問題, 而且聖誕節前已經收到本雜誌喇喎。

今期封面是隊長廸比亞路, 加旁邊嘅美爾堡。隊長每逢入球後興奮伸脷嘅樣貌, 各位祖記迷應該非常熟悉呢。

今期內容, 一如每期一樣, 都係豐富非常。

非常期待2011/12球季開始, 球會將會獨自全部擁有嘅廸爾艾比球場。球場外貌異常宏偉, 內部建築似英超球會嘅球場, 唔會有跑道, 球迷坐位會好近球場, 觀看氣氛一定一流。但意甲球迷普遍較瘋狂, 唔會唔有球迷睇睇下波衝左落場搗亂, 又或者掉野去對方球員度呢??  可幸, 祖記球迷通常都較正路, 希望唔會啦。 重建後, 球場旁仲會有酒店, Megastore, 商場等, 球迷在都靈朝聖可以有好多野做啊! 

阿瑪利替Nike賣廣告, "L'arma segreta di Amauri" (The secret weapon of Amauri"!  賣嘅係一件新系列叫 :Nike Pro Thermal"嘅衫, 乜鬼排汗快速, 通爽....有一個video叫 "Chi fermera' Amauri" (Who will stop Amauri), 有興趣可以上youtube, 睇睇有冇得播吖.....而據文章講 (唔知有冇理解錯), Amuari在video裡踢嘅那個足球, 係意大利足協從11月2日開始, 將會連續兩冬季在意甲賽事使用。據佢地稱, 黃紫色嘅足球可以保證更好嘅視線 (visual perception); 而皮球嘅皮, 就已經兩年測試, 可給予皮球更大嘅穩定性同力量 (stability and power)。.....點解我好似在此幫Nike賣廣告咁???  哈哈哈

尼維特與一班可愛小朋友慶祝聖誕。祖記一直都有同一間醫院 (Sant'Anna)合作攪類似籌款活動, 我未睇內文 (就算睇亦未必睇得明晒), 不過憑相片推算, 相信小朋友來自呢間醫院。

今期封面故事有兩個: 第一個係關於隊長的。

隊長自1994-95球季至今所有嘅歐洲賽事入球.....好多呀!!

今期另一封面故事 ~ "La strana coppia" (The strange pair)。兩位左邊兵, 祖記未來希望嘅摩連拿路 (Molinaro) & 廸切尼 (De Ceglie)。

佢地 ~ 亦會係祖記嘅未來....祖記少年兵哥。

D細路仔真係好得意好可愛。咁細個穿上祖記球衣, 咁認真影合照, 要從小接受正宗同埋嚴格專業訓練, 好勁。 看見佢地, 就諗: 邊個可能係未來廸比亞路，未來保方, 意大利國家隊嘅未日之星呢....

保方雖然要1月先復出, 但佢一路都保持住人氣....原來佢最近出左自傳喎!!  自傳係同意大利報紙Corriere della Sera嘅記者Roberto Perrone一齊寫嘅。(香港版保方: 你買左未呀??)

今期球迷寄去雜誌嘅照片。可惜仍然未見到我地熟悉嘅面孔呀...

A tu per tu版: 小球迷Matteo從南部嘅Taranto去到老遠嘅都靈祖記訓練地Vinovo, 有幸接觸到新星馬基斯奧 (Marchisio)。不過馬基斯奧看來好鬼cool, 笑都唔笑, 又戴晒黑超。我第一直覺就係: 呢位新星應該好鬼寸。小球迷偶像係尼維特, 雜誌應該搵尼維特比小朋友見嘛, 尼維特真人nice好多呢。[又一次, 想起自已個好差嘅經驗, 小朋友可能都同我一樣失落左一陣]

意大利超級盃明年8‧8鳥巢上演!

果然堅料, 聖誕節前發放好消息!!  阿YUEN前幾日在FACEBOOK嘅JUVENTUS HONG KONG FANS CLUB度留言, 話有消息, 今屆意大利超級盃將在北京鳥巢舉行。今日消息獲意大利足協證實!!

最好係: 2008-09意甲冠軍係祖雲達斯 / 意大利盃冠軍就係熱拿亞

咁到時, 就可以在北京鳥巢見晒我想見嘅人..........嘻嘻嘻嘻嘻嘻嘻!!!

若果真係 祖記 vs 熱拿亞 的話, 就要撲飛入場呀!!!

*********************************************

意超級盃明年8‧8鳥巢上演

2008年12月24日 ~ 摘自明報

【明報專訊】據意大利《米蘭體育報》報道，意大利足總官方宣布來屆意大利超級盃將於明年8月8日在北京奧林匹克體育場(鳥巢)舉行，剛好紀念北京奧運1周年。

北京市體育局長孫康林透露，當局將支付意軍的出場費，而以收取門票、銷售廣告等方式回收成本。據悉，這場比賽屆時將全球直播。意大利超級盃是由意甲聯賽盟主與意大利盃冠軍對壘，現時國際米蘭以17戰得42分高踞意甲榜首，是來京比賽的大熱，而緊隨其後的祖雲達斯及AC米蘭等勁旅訪華的機會也不少。

另外，意大利足總亦表示，意甲下一賽季會提早在8月23日展開，並在翌年5月16日結束，讓意大利國家隊獲較多時間備戰2010於南非舉行的世界盃。

Week 17 ~ Results

阿特蘭大 對 祖雲達斯 (1:3)

完全意想不到, 今場波有個人搶晒鏡 ~ 馬基安尼!  攪乜, 今場完全上晒身呀!  先在30分鐘有越位嫌疑下傳左個波比門前嘅隊長射入, 今個係佢今球季第6個入波。 事後, 雲帥都認呢球係越位。

 

7分鐘後, 黑面神歷高達利接應角球, 攝前頭頂入網, 祖記拉開紀錄至2:0!  黑面神又打開佢件波衫, show佢件底衫D字 "Gesu' vive", 好頂佢唔住, 入波咪入波囉, 咪在人面前扮神聖啦, 好鬼嘔心。

換邊後只係3分鐘, 半場入替嘅韋利就入一球, 幫阿特蘭大追近至1:2。 隊長多番被阿特蘭大球員刻意侵犯, 終於在79分鐘搏到一個罰球..... 上左身嘅馬基安尼開個好鬼靚嘅罰球, 門前一班祖記球員中嘅阿瑪利用頭頂入, 再度拉開比數至1:3。最後比賽亦以 1:3完結。

以前鐘意馬基安尼時, 又唔見佢踢得咁好喎, 仲成日傷多過踢; 但依家憎到佢爆, 佢反以因甘仔成日傷而經常正選, 仲忽然神勇添.... 我都話我黑仔啦, 依家輪到連累PALLA....

今場, 馬基安尼會否係 MAN OF THE MATCH呢???  哈哈哈!!! 

 

基爾禾 對 熱拿亞 (0:1)

熱拿亞終於打開作客勝利之門!  但都嬴得好險, 88分鐘先由前祖記球員奧利華拉打開紀錄。小勝1球, 全取3分, 意義重大呢。

 

基於電視冇直播, 同時間又有祖記比賽進行....同埋冇用 "第二D" 途徑... 所以唔知場比賽有幾激或有幾悶。 但呢場波正選陣容好嚇驚 ~

Genoa: Rubinho; Criscito, Biava, Bocchetti; Rossi, Juric, Thiago Motta, Vanden Borre (Brivio 86); Jankovic (E lShaarawi 83), Olivera, Modesto (Papastathopoulos 60)

冇晒大米, PALLA, 史古利, 出動到好少出場嘅奧利華拉, 前面攻力差好遠; 但好彩奧利華拉爭氣, 少出場都一出就有波入。

聯賽榜排名在歇冬前冇改變, 祖記仍排 No.2, 熱拿亞就 No.6。