祖記對安波里 - 意大利盃次回合 5:3

唔知各位前晚有冇睇場波，我就睇到一額汗！5:3對於祖記來講真係唔多尋常，一來開咁大比數唔多似我地球隊作風；二來入得多之餘竟然同樣失好多粒。當然冇保方在係一個原因，但另外重有更大因素係隊波嘅超嚇人後防，真係嚇死冇命賠！

以為一開始10分鐘已經入左兩球比較安心，但其實係嚇人場面嘅開始...18分鐘左右基亞連尼要傷出，換入Boumsong, 呢位仁兄真係弱到震，我見到佢出場(重要係咁早就出場)就覺得好大劑。佢同Grygera不斷犯錯，而且加埋少左歷高達利 (患感冒)、洛斯連奴休息, 所以兩個人冇出場只係坐觀眾席，後防死得咁滯。好彩下半場有DP同斯歷咸美斯換入，救番球隊一命, 最終驚險咁贏左5:3, 兩回合合共 6:5, 進身8強。不過8強要對國米，好擇駛。

好開心Marchio4分鐘已經入左個靚波, fantastic!   跟著10分鐘時, 重助攻做就Nedved入球勁嘅。伊亞昆達果然狀態勁佳，入左2粒，而DP就又引到對方球員勾跌佢，搏到個12碼，自已射入。

Tiago - 簡直廢到震，豪無建樹，阻住球隊發揮添，領隊真係唔該咪再出佢浪費時間。Grygera越來越唔對版喎。Boumsong就咪鬼提，唔知點解佢仍然可以喺祖記存在到依家！！  究竟球隊幾時正正經經搵番2-3個掂嘅後衛返黎呀？祖記一直以來最出色之一係防守厲害，但依家防守就變成最弱一環。

我個人覺得球隊前面已經夠晒人； 但中後場，尤其後防真係好要改善，快d搵個Nedved接班人啦！ 換走幾個後防壞鬼，買幾個勁人過黎啦...如果森保達回歸你話幾好！去乜鬼AC吖。

今日睇到一份意大利報紙網上版嘅一篇文 (不過嚴正聲明，我唔知有冇解錯文章意思, 哈哈哈), 祖記個President話對Amauri好有興趣，咁Palladino咪好危？ 篇文又話據講巴勒莫同阿仙奴 (!!) 對Palla好有興趣咁話！ 雖然今季Palla冇上季咁突出，但都唔係話太差。

請問有冇人知道點可以save低用Flash做format嘅相呢？祖記個相簿d相依家轉晒用flash format, 想save一d相做紀念都唔得呀。知道的話請教一教我，唔該晒。

我至愛之一Marchio入波，我梗要放佢d相入黎為佢慶祝一下啦！！

正！ 希望佢入球停不了，繼續努力, Marchio!

隊長都唔執輸，入番一球，助球隊晉級。