那波里好一個大垃圾堆!

休息左三個星期，又再開始新一學期嘅意文課，嘩！好大鑊，好多野都唔鬼記得，簡直d野比番晒呀老師。

今日又有有關那波里嘅垃圾問題在電視新聞上出現。點解d垃圾可以攪咁耐重未清理？d垃圾唔臭咩？點可以忍到依家都未攪掂壇野？我覺得那波里真係好騎呢，唔少講意大利旅遊嘅書，當講到那波里時，都形容到個度週街垃圾，污糟臘蹋。今日我就問阿老師，攪乜那波里嘅垃圾又關薩丁島同德國事 (因為新聞話薩丁島d人反對那波里d垃圾要運去佢地度處理，又話d垃圾會好快運去德國處理)。

一講到那波里，阿老師就笑笑口，取笑呢個地方d人 (一般北方人同南方人都喜互相取笑對方), 除左因為當地黑手黨支配呢個原因外，佢話重有一d原因攪成今日局面。意大利好多省都有設施，可以將垃圾燒，化成有用能源，但那波里就冇呢d設施 (可能覺得攪咁多野浪費d錢)。d垃圾於是乎越攪越多，d工人又玩罷工唔處理d垃圾，於是d垃圾好快已經填滿好多塊地，當地政府完全束手無策，中央政府唯有指令其他省份要分頭接收d垃圾, 咁又真係超騎呢，錢就話有人會搶住同你分啫，垃圾？阿水想攞番屋企幫你攪？那波里真係不負責任。我終於明點解薩丁島d人發顛反對。

原來德國有更先進設施去處理d垃圾，變成有用能源。原本d垃圾可以用火車運去個度處理，但d那波里人唔想比運費喎！竟然唔想比錢?  神經！

咁攪法，d垃圾容乜易堆到去那波里市中心？  我提議佢地可以將部分垃圾搬去填左那波里球隊個主場球場，放棄個主場，以後佢地可以去人地個場踢埋主場賽事 (主場變作客)！哈哈哈！