勁聽 Luca Dirisio ~ Il mio amico vende il té

近來超愛上聽一位意大利歌手嘅歌, 個歌手叫 Luca Dirisio。我除左在Youtube係咁 search, 睇佢嘅MTV之外, 仲揾佢D歌嘅歌詞....都幾好, 用咁嘅方法學意大利文, 希望可事半功倍。

Luca有好多超好聽嘅歌, 呢首 (Il mio amico vende il té) 係本人嘅至愛之一, 過去連續數日以來, 我每日都起碼聽10次8次, 認真發神經。

聽歌嘅同時, 睇埋佢個樣啦, 又一意大利型男來的, 嘻嘻嘻!!

Il mio amico vende il té

恭喜發財!!! 祝大家牛年進步!!!

恭喜大家今年發大財!!!!  不知不覺, 牛年又即將降臨喇!!! 

祝大家新一年身體健康, 萬事勝意, 心想事成, 步步高升, 出入平安, 大吉大利!!!

人人有工做, 同家人親戚朋友相處和洽愉快, 和氣生財!!!

仲有就係: 世界和平, 冇戰爭, 空氣環境大大改善, 每人都生活在安樂窩, 日日笑口常開!!!  

恭喜恭喜!!! 

 

落馬洲大車禍 ~ 令人憤怒!

今朝在網上看到呢單消息嘅簡單報道,但 因為未見到相片同埋未睇電視, 所以未知情況有幾嚴重。但返左屋企睇到新聞, 真係覺得好勞氣, 亦替事件中嘅死者同家人傷心。

我覺得極度憤怒, 那個不知所謂嘅司機簡直唔係人, 自己飲左酒仲走去揸車 (佢仲係準備揸架車去開工, 想用粗口鬧衰佢), 依家連累六個人因為佢自私自利嘅行為而賠上寶貴嘅生命。呢種人就算坐一世監都唔可以補償六個無姑嘅人嘅性命, 同佢地屋企人失去左親人嘅痛苦。農曆新年前收到呢個咁慘嘅壞消息, 死者屋企人一定尤其悲痛。

點解咁多人知道酒後駕駛係危險嘅事都仍然有咁多人繼續咁做?  揸住架車好有型呀?  被捉到酒後駕駛嘅人應該被終身停牌先啱。酒後駕駛發生任何交通意外, 應該被判最少10年監, 判佢地去大西北勞改!

希望呢六位不幸去世嘅乘客同埋的士司機, 可以早日安息。

冷漠人 ~ 下集

上一回我在冷漠人 ~ 上集講到, 覺得香港地有唔少人都好冷漠。但當然, 傻人先以為外國嘅月亮係圓D嘅。外國人可以好熱情, 但亦可以衰格同玩野到爆。

本人極度恐懼法國同埋法國人。可能我嘅遭遇中所遇到嘅法國人都寸爆, 好乞人憎, 所以令我從此對呢個國家留下超級惡劣印象。

話說好耐世紀之前, 與幾位朋友去法國, 西班牙, 意大利, 同埋希臘玩。當年去法國 & 西班牙仲要攞神根簽證先入到境, 咁即係我地一係要去法國領事館取簽證, 一係就要去西班牙領事館取簽證。咁究竟要去邊間領事館申請簽證先啱呢?

我地被呢一件事攪到好亂, 因為: 睇一D旅行書話叫你去你第一個將要入境嘅神根公約國 (咁我地第一站係法國, 即係去法國領事館); 但另一D旅行書又話叫你去你會逗留得最長時間嘅神根公約國 (依... 咁即係去西班牙領事館取簽證? 因為我地去西班牙十日)。

弊!  咁即係去邊間領事館申請簽證先啱呀??  唔知點樣, 我地最終決定去法國領事館申請簽證。坐火車出到倫敦 (因當時在英國), 成村人排隊, 我地亦唔例外, 之前有朋友話, 唔駛book住宿證明, 只要有張YHA card (青年旅舍證)就可以當有住宿證明。 排左鬼死咁耐, 終於輪到我地。我地面前件法國女人領事, 問我地去法國幾日, 問我地行程如何之後, 然後就話: 你地要去西班牙領事館申請簽證!! 我地即刻話個行程其實未定, 可以改, 如果咁, 就去法國耐D (咁先可以在此攞到神根簽證嘛), 點知件法國女人理都唔理我地, 叫我地走喎, (+ 態度寸爆)!  X#$#%^%&^$%#$%!!!

啋你都傻, 山長水遠出來倫敦, 玩野咩??!!  而且事出突然, 點知西班牙領事館喺邊, 點去呀。我地商量一輪後, 決定再排過隊。"幸運地", 今次見我地嘅領事係另一人 (男人), 本來相安無事, 但中途殺出個程咬金....頭先個寸爆女人領事走過來同呢個男領事講左一輪, 之後, 大家都知結果....你個爛鬼法國有乜咁巴閉??!!  我地慶到爆...去旅遊咋, 你估你國家有金執咩?? 

西班牙領事館 ~ 大佬, 點去呀?  我地求其折架的士, 問司機識唔識去西班牙領事館?  幾神奇, 識呀 (其實大多數英國的士司機都好勁, 乜路都識的)。我地到達時, 已經剛過左辦公時間, 但門口嘅保安阿叔示意比我地快脆走入去 (當時另外仲有D西人少女, 反而唔比入喎), 保安阿叔真係唔話得, 好感動。申請過程仲好簡單,

I LOVE SPANIARDS!! 

法國人唔講或扮唔識英文時有所聞, 原來真有其事。去到巴黎, 第一件事係要在報紙檔買電話卡。同個老細講 "telephone card"唔理我喎, 但同佢講 "telefonica carta" (亂講一通, 因為當年在學挍學西班牙話), 講成咁, 個老細又識聽喎, 比張電話卡我。肯定佢有心玩野, telephone card 同 telefonica carta 發音有幾大分別得架?  8/9成相似。

仲有事例, 但唔再繼續講喇。

"據講" 巴黎好浪漫, 法國人好浪漫, 不過, 我完全唔覺囉。巴黎治安唔好, 地方污糟邋遢, 地下鐵又臭, 巴黎人又寸, 都唔知邊忽好。巴黎鐵塔OK啦, 但倫敦國會大厦嗰頭仲靚啦; 羅浮宮多名畫, 但佛羅倫斯個 Uffizi 都正.... 佛羅倫斯先係文藝復興發源地。

真係諗起法國都驚。世事難料, 我唔敢講話唔會再踏足法國, 但係世界上有咁多好去處, 我冇必要非去法國不可...返祖國欣賞大江南北都有排先睇得晒呀。

 

 

 

 

祖記2009年1月號月刊

轉下眼又新一年, 今期係2009年第一期。

今期封面一大堆球員, 冇個個樣係睇得清楚....

雖然未認真睇本雜誌, 但 "立"左兩次, 似乎今期內容唔太吸引添....  

嘩, 攪乜鬼呀?  阿瑪利著住件睡袍走出來, 班球員又偷看又偷笑嘅???

查斯古特 & 甘仔出席快意車廠嘅聖誕活動。

廸爾艾比球場正在重建當中。

嘩, 沙塵滾滾, 小心殺錯良民喎!!! 

今期專題故事嘅主角係: 查斯古特。

至於 A tu per tu版: 一位小球迷訪問摩連拿路。張相就夠大喇, 但段文章就極細bor!! 

今期粉絲嘅相, 佔據左兩版呀, 好少見呢。唔通呢排雜誌收到太多球迷寄去嘅相, 所以一次過登多D令球迷開心下??

查實睇晒全本雜誌, 最吸引我嘅反而係中間海報。一面是一班球員攬埋一堆。另一面就係 "Bianconeri激情時刻", 呢面好正, 貼在牆先.....

賀新年, 買新野!

近排要去舊迎新, 所以努力於打掃同埋清理舊物中。剛剛掉左一袋野, 叫做少左D垃圾啦, 不過工程還在進行。

掉舊野嘅同時間, 今日買左一樣新野, 就係一架portable DVD機。其實想買一架portable DVD機好耐, 但之前掙扎於究竟應該買一架 Netbook好, 定係一架 portable DVD機好。最終我都係決定買 portable DVD, 因為對我個人來講比較實用。

 

 

本來係想買飛利浦嘅10吋portable DVD, 但係折左都要 $2,400, 後來sales哥哥介紹我不如考慮買步步高嘅一架10吋monitor嘅座枱型電視機仔, 其實都係一架手提DVD機, 功能同之前我考慮嘅飛利浦機差不多, 都係可以插 SD card, 有USB插頭, 更好之處係慳位, 同埋DVD係由側邊入, 仲有就係呢架機可以入天線睇電視, 兼可以聽收音機添呀。雖然我好少買 "番簡" 碟睇, 但若果係的話, 大家都知國產貨乜都做得到, 唔會睇唔到, 聽唔到。至於價錢, 就平一半呀!!

買左呢架手提DVD機後, 以後就可以在個房裡睇碟, 或者聽歌喇, 太好。咁....我積積埋埋成堆未睇嘅DVD碟同埋CD碟, 就可以好快清到喇!!!   

天上繁星 @ 香港 & 錫耶納

好開心, 為時四個半月嘅一個課程, 終於完滿完成, 令我可以於下心。去左兩日長洲, 就係因為呢個課程嘅camp。

我地camp嘅目的地, 係一間靜修院。由於靜修院距離長洲市中心有一段路, 所以前後四次camps, 每一次同朋友都要行好一大段路直至半山左右。雖然路途有D遠, 但正因如此, 靜修院嘅環境 & 景色都極之優美: 我地每間房都有露台, 對住個大海, 又聽到海浪聲, 實在一流享受! 

每趟我同一班一同上堂嘅朋友, 夜晚seminar完結後, 就六個人左右, 行番落山食宵夜。適逢今次係畢業camp, 差不多所有同學 (都有60幾人), 分批落去市中心 "掃街" 揾食。

食飽再沿路行番上山時, 大家都為天上閃耀密佈嘅繁星而噪之巴閉!  D星星實在又多又閃, 加上因為個天幾夠黑, 而又冇乜雲, 所以我地睇得好清楚。

之後, 其中一人知道可以上靜修院頂樓 (是關冇上到鎖), 去嗰度睇星星一定更靚, 於是成班人就 "鼠"左上去。

上到天台, 見到個天嗰一刻, 大家又再次驚嘆不已!! 好少可以喺香港咁清楚咁見到咁多星星。

見到咁靚嘅星空情景, 令我想起, 對上一次咁清楚咁見到咁多星星 (而又令我印象深刻), 已經係上年五月, 喺意大利嘅錫耶納....

........................

 2008年五月, 意大利嘅錫耶納:  天朗氣清, 夜晚與友人瞓左在巨大嘅扇形廣場上睇星星....附近有一對對熱情 (or用 "焚身似火" 稱呼佢地) 嘅情侶, 有一班班朋友坐在廣場上傾計; 而廣場四周有餐廳, 酒吧等。我諗廣場上最恨睇星星嘅人一定係我地呢亭香港人....

 2009年一月, 香港嘅長洲:   城市人, 住慣周圍都係高樓大廈嘅環境, 晚上嘅夜空, 通常都被照得太光, 所以都冇乜機會可以有個好環境睇到星。我覺得近排香港 "氣"色似乎有所改善....唔知同金融海嘯有冇關係呢?  自金融海嘯後, 大陸好多工廠倒閉或停工, 冇左珠三角地區工廠每日大量排出來嘅污染物, 或者空氣質數真係改善左, 個天空都藍左, D星星都出來見下大家。哈哈!!! 

朋友中, 我提出: 點解覺得好似錫耶納嘅天空 & 星星近我地D嘅?  香港嘅天空好似比較高 & D星星比較遠的??  然後同場一位曾經在澳洲黑麻麻地睇過星星嘅朋友, 同我有相同感覺; 跟着另一個朋友就發表 "地球好似係楕圓形, 可能香港在楕圓形中心位, 所以距離個天空遠D; 但意大利 & 澳洲可能在楕圓形邊, 所以距離個天空近D"。

好懷疑係吹水囉!!! 大家勁笑一輪!!!

邊位有天文知識??  究竟個地球係咪真係楕圓形呢??  我個朋友嘅 "偉論"是否真的???  今晚發夢時揾阿Galilio (伽利略) 問問先....

http://bwc.hkcampus.net/~bwc-phys/Physicist/Galileo.htm

一定要大掃除清垃圾!!!

我發覺自己越來越多野, 間房唔夠放, D野開始向個客廳發展!  依家望下在office嘅枱面同書架, 情況一樣惡劣 ~ 鬼咁死亂, 再咁真係招惹病菌, 新年前一定要清理, 同埋抹乾淨先得!  後生細女 (!!!), 儲埋咁多野唔掉, 成個阿婆咁添!

尋日一個朋友提起, 問有冇興趣租儲物室放D舊野。有興趣嘅, 但小小地都要 $118/月, 將D少用嘅野放左入倉後, 屋企地方一定企理整潔番好多, 但都係返屋企睇下有幾多野其實可以掉左佢, 捐左佢, 或者送比人先, 因為一個月$118, 一年就成 $1,500; 再者, 人就係咁衰, 當你見屋企多左位, 又會買番D新野填番個窿, 即係造就我製造更多野....放野入倉好似只係自己欺騙自己咁。

返屋企反省一下..... 唔需要或已經舊嘅野真係唔好再留戀 ~ 其實有幾多野係會真係成日攞出來睇得架!  呢句自己成日講, 又成日聽人講, "收埋佢先啦, 可能第二時有用"。就因為呢句 "驚世"說話,  收埋無數十年唔攞出來一趟嘅 "珍寶"!!

學我老細話齋, 香港地D地方好矝貴架, 一呎最少值二三千蚊, 唔好用來放唔等駛gee野....有道理, 有道理!!  哈哈哈。

執野, 掉野, 賣仔莫摸頭!!!

求人...不如求已....

近幾日, 為一件事有些少唔開心, 又因此睇多左少少野。

話說我一位老友級朋友, 問我識唔識有朋友住在歐洲。呢位朋友嘅幾個月大女兒, 皮膚有紅疹之類, 用過好多種唔同嘅 moisturing cream, barrier cream都唔得, 唯獨是一隻 "Chicco"出嘅cream, 效果很好, 用左之後皮膚好好多。可惜, Chicco唔再出呢隻cream, 佢揾晒全世界 (冇作大), 得一間在荷蘭嘅網上商店仲有4支cream剩, 佢聯絡網站, 但對方話:

1) 佢地只郵寄歐洲 (唔做非歐洲地區客);

2) 佢買太少, 就算想例外幫都唔得。

佢地提議我朋友揾個住歐洲的朋友幫手, create一個account, 買左cream後, 寄番比我朋友。但我朋友唔識人住歐洲。我係識朋友住在歐洲, 但同外國人講呢D野, 除非佢同你好好交情, 否則叫佢幫手攪咁多, 未必容易, 仲要涉及$$ (雖然只係幾百銀)....我即管揾一個我自以為幾好交情嘅朋友幫手。

真係有D灰....唔知係咪呢位朋友平時都好謹慎, 定係因佢係政府醫院護士關係, 佢先在email replied我話: 可唔可以比支cream全名同生產商名字佢, 佢要check下支cream嘅成分, 同担心法律 (legal) 問題 (吓!!! 買支葯高有乜法律問題??  神經, 又唔駚醫生處方gee)

之後比左資料佢後, 佢又話: 你朋友想要支cream好平常, 佢可能用barrier cream更好喎 (查實我都唔知乜鬼係barrier cream), 我可以提議佢第二D cream, 唔駛咁買, 慳D錢。

再之後, 我將我老友嘅e-mail copy & paste比呢位外國朋友....我老友話: 我甚麽cream都試過, Chicco呢隻最有效, 我唔介意比多D$。

為左好睇D, 我在比呢位外國朋友嘅 e-mail又講下第二D野, 問佢幾時再黎香港玩。

點知今日收到呢位外國朋友嘅email, 佢隻字不提有關cream嘅野, 但就講自己幾時會來。

FINE.....明白, 求人...不如求己。....若然我自己買到, 駛鬼老遠揾你救命咩?  痴鬼線, 唔方便幫冇問題, 但唔好浪費我時間, 玩左我一輪 (下刪一堆本人好少運用嘅 ~ 粗口!!)

我沮喪地 send左個email給我老友, 我話: "朋友要咁多仲乜???.......  唔好意思, 幫唔到你忙添"。

我唔會再在呢件事上揾人幫手, 一次沮喪已足夠。講到尾, 人地冇需要幫我吖....

意大利歌 ~ Azzurro

未開始呢篇blog之前, 容許本人先多謝我個friend, 亦係我blog友嘅Yuen, 教我點upload videos 上個blog度, 事關我真係蠢到爆!  真係多謝晒你嘅寶貴睡眠時間呀, YUEN!!!

之前我話會將我個blog嘅背景歌曲嘅歌詞放上來的, 大家喜歡可以跟著黎唱。原曲係叫 "Azzurro", 係由一位叫 Adriano Celentano嘅意大利歌星唱嘅; 在2006年時 (阿YUEN話應該係2004年先啱), 由一班意大利足球國家隊成員再重唱。唔係因為之前想搵番歌詞, 都唔知有咁多野....

我在此想upload原唱人首video, 因為實在太正斗喇!  睇番幾十年前意大利人嘅MV, 又有成班女人行來行去, 好攪鬼!  Adriano Celentano唱得好清楚, 可以順便學清楚發音添....歌詞在下面的。

 

 

Azzurro (呢份歌詞係球員版, Adriano Celentano首歌較短)

Adriano Celentano

Paolo Conte

Cerco l'estate tutto l'anno e all'improvviso eccola qua.
Lei è partita per le spiagge e sono solo quaggiù in città
sento volare sopra i tetti un aeroplano che se ne và.

Azzurro, il pomeriggio è troppo azzurro e lungo, per me
mi accorgo di non avere più risorse senza di te
e allora io quasi quasi prendo il treno e vengo vengo da te.
Ma il treno dei desideri nei miei pensieri all'incontrario và.

Cerco un po' d'Africa in giardino, tra l'oleandro e il baobab
come facevo da bambino, ma qui c'è gente, non si può più
stanno innaffiando le tue rose, non c'è il leone, chissà dov'è.

Azzurro, il pomeriggio è troppo azzurro e lungo, per me
mi accorgo di non avere più risorse senza di te
e allora io quasi quasi prendo il treno e vengo vengo da te.
Ma il treno dei desideri nei miei pensieri all'incontrario và.

Sembra quand'ero all'oratorio, con tanto sole, tanti anni fa.
Quelle domeniche da solo in un cortile, a passeggiar,
ora mi annoio più di allora, neanche un prete per chiacchierar.

Azzurro, il pomeriggio è troppo azzurro e lungo, per me
mi accorgo di non avere più risorse senza di te
e allora io quasi quasi prendo il treno e vengo vengo da te.
Ma il treno dei desideri nei miei pensieri all'incontrario và.

得閒裝修一下個blog先!

見個blog個背景已經用左一段時間, 就趁新年開始, 萬象更新, 同佢執一執啦! 

從之前用同Juventus有關嘅相, 轉成呢張綠油油, 少女踩單車....希望大家新一年事事都順景, 生活如同呢位細路一樣輕鬆寫意又自在。

話咁快, 又準備農曆新年喇!!

 

Week 18 ~ Results

餓波太耐, 終於歇冬完結, 意甲比賽又來了!!! 

今星期都唔錯, 愛隊祖雲達斯場比賽在週日舉行, 時間10pm (香港); 至於熱拿亞比賽在之前一晚舉行, 咁就可以睇到晒喇, 正!

祖雲達斯 對 錫耶納 (1:0)

Juventus: Manninger; Grygera, Legrottaglie, Mellberg, Molinaro; Marchionni (De Ceglie 79'), Sissoko (Zanetti 65'), Marchisio (Poulsen 85'), Nedved; Amauri, Del Piero

實情講真, 呢場波睇到有D炆炆地!  唔係得隊長廸比亞路漂亮到飛起嘅罰球, 以及門將 "萬能膠"嘅精彩表現, 球隊可能一早被追和, 甚至輸波....

球迷拉起超大橫額....我們向三粒星進發!

 

隊長廸比亞路在33分鐘又一球絕靚罰球!!  依家佢在射手榜有7個入波。由於國米主場只能迫和卡利亞里 1:1, 因此祖記同國米積分現只差距4分咋, 努力呀, 祖記!! 

下週將要作客拉素....

 

熱拿亞 對 拖連奴 (3:0)

Genoa: Rubinho; Biava, Ferrari, Bocchetti; Mesto, Thiago Motta (Milanetto 85), Juric, Criscito; Sculli, Olivera (Vanden Borre 60), Jankovic (M Rossi 80)

熱拿亞今場比賽就超爽, 雖則有米列圖腹傷缺陣, PALLA又有傷在身, 但仍能大數拖連奴三球。 前祖記球員奧利華拉今場表現雖然麻麻, 但佢嘅隊友就好似個個上晒身咁, 極之厲害。

觀乎入球功臣: 18分鐘嘅比亞華, 48分鐘嘅真高域, 同埋85分鐘嘅莫達... 三個頭頂入網, 高空攻勢一流; 兼且三人都係中場/後防。 似乎球隊暫時未受缺少米列圖有太大影響。

唔知佢地下週作客箂切, 會唔會仍然咁犀利呢?

 

18號先到下週賽事, 但週中又有意大利杯16強賽事:

國米 對 熱拿亞 (13號)

祖記 對 卡坦尼亞 (14號, 8:45pm, 意大利時間)

仲要竟然兩場, 無記電視都有得播喎....

(所有以上圖片均來自: La Stampa 報紙)