冷漠人 ~ 上集

(寫左呢篇blog放上來後, 突然覺得仲有關於冷漠嘅野想講, 所以改左標題名稱, 又更改左少少內容...)

今日lunch時候, 又落左去銅鑼灣 (有時都諗自己究竟係咪在銅鑼灣返工的...哈哈哈)。去時代地庫 CitySuper行, 諗住買一隻周圍都搵唔到嘅潤手霜, 順便買件野送比一個朋友作為生日禮物。睇啱一樣好特別嘅野, 同一時間有個 "國語人" 亦問緊個售貨員呢樣新玩意, 我又聽埋一份 (問埋一份添)。

國語人聽完我嘅問題同埋售貨員嘅答案後, 問售貨員我地剛才講乜...我就用我有限嘅普通話講番佢聽 (因為當時聽到售貨員講普通話講到一 lug一cut, 諗住幫下佢手。其實阿售貨員哥哥聆聽很好, 只係講就一舊一舊)。 

大家好開心傾一餐, 國語人問我係邊度人....我話係香港人, 佢好似有D愕然 (!!), 佢話我普通話講得幾好...佢實在有禮貌, 咁識讚人, 哈哈, 我普通話真係普通過普通啦! 

不過其實我想講嘅反而係另一樣野。

國語人話佢嘅朋友同佢講, 香港人都幾冷漠!!!  冷漠 ~ COOL ~ 幾負面嘅形容詞。不過呢位國語人就話佢唔太覺得香港人好冷漠, 又話我一D都唔冷漠。

有時又真係都覺得有D香港人幾冷漠....平時唔多有笑容, 好多次我聽D人在舖頭買完野, 10居其9係唔會講 "唔該"。 有時覺得某些人勁自私...例如, 一齊坐一架電梯, 門未關, 明明見外邊有人想在關門前走入電梯, 冇人會有意慾去按住個開門掣比人入黎 (於是我就忍唔住走前按掣)。 推門唔會hold住對門等下一個人入, 真係好鬼冇禮貌。 

我又係度囉囉梳梳添.....

雖然有D香港人表面幾冷漠, 但好在大部分都好有同情心, 捐錢做善事好落力。

如果講人冷漠一面, 我有D更差嘅經歷, 簡直可以用"恐怖"來形容...幾單事都在外國發生, 下回繼續分享。

待續.............