繼續講下我個都靈朝聖 (參觀聖堂 & 祖雲達斯)之旅....
去都靈之前，有朋友話我知，2006年時, 有一班內地嘅祖記球迷去過都靈睇波，呢班球迷曾經嘗試去祖記個總部看看，我都有睇呢班球迷在內地個祖記論壇講述佢地個次嘅旅程。佢地非常有心，寫左前去嘅方法，不過其實佢地一行人只係在reception個位影左幾張相，因為總部係謝絕參觀的。
我於是乎就印低d資料，諗住都學呢班fans走去睇睇個總部係乜東東樣貌。我諗最多佢咪唔比我參觀，又唔會捉我上警局，哈哈。
朝早，食左早餐，係酒店附近有個巴士站，原來有車會經過祖記總部附近，於是我上左車後就問阿司機叔叔, confirmed一下。冇錯，司機叔叔一如大部份都靈人一樣，係唔識英文的.....
我又係用個兩三句問路說話問佢，great, 佢明我講乜， but oh no! 我唔知佢答我乜!! 但佢實在好似好多都靈人一樣，勁度好人，當站到時，佢轉身示意我要落車，我行埋去唔該佢時，佢仲指手橫腳話我知點行，我實在感激萬分。
我想強調，在都靈差不多每位我遇過嘅司機都係類似咁，你話係咪好誇張??!!
祖記個總部，如果唔留神，隨時行過左都唔知，因為門面豪不起眼，只係一橦好普通嘅建築物, 隔離又有d爛地, 我都差d行過龍。
我入到大堂，已經有位實招哥哥坐左係度，好young嘅實招，樣看起來頗cool....我用意大利文問佢, 唔知可唔可以參觀呢度呢? 其實好廢話，肯定唔比啦。佢好cool咁擰一擰頭，我就只可以話 "唔好意思呀..."。我一眼見到佢後面有d正野! 因為上面有個櫃放左d獎杯，再後面就有張好大嘅大海報! 好吸引嘅風景呀，我見個實招哥哥又唔趕我走bor, 我咪係度望望下，咁難黎得到, 實在唔願走呀。點知個實招哥哥呢個時候係佢腳底唔知邊度攞左d野出黎，係一叠野, 成叠祖記posters! 嘩! 佢fing下隻手，示意叫我攞，嘩，發達呀，我以為睇錯野，咁筍, 有野送!
就係呢個時候，後面唔知幾時閃左位仁兄出黎，佢用英文問我，你想唔想我幫你影相呢??? 嘩，又一個嘩字，我當然仆到叫好啦，放是就同佢上左上面影相。
我相信d獎杯係假的, copy黎...不過我照影可也。
我實在遇到貴人，好開心。影完相落番黎，同個實招哥哥講，d posters, 唔知可唔可以攞兩三張呢，點知佢示意我攞晒走! 攞晒走? 我以為我誤會佢意思，再問佢 - 攞晒?? 係喎，真係全部。我高興到呆左，係咁多謝佢，個度成20張posters喎，唔知佢係咪想搵個茂里幫佢清理舊物呢?
當我仲好開心咁睇梗d posters時，佢又係佢腳底攞d野出來，放左d野上枱，嘩，又有野?? 我真係唔識講野咁滯，我千多謝萬多謝佢之後，終於白撞完總部喇。我走出門口後，睇下佢比d乜過我。
職員所送嘅 2006-07球季全體合照, 膠面印，一面係彩色，另一面就係黑白的。
另外送的禮物就原來係心口針同keyring。
都靈奇妙之旅...待續.....
No comments:
Post a Comment