終於, 終於我都拿出勇氣, 作出左呢個決定....纏擾左我好多時間嘅一個問題, 終於可以來個了斷...
唔好嚇親各位, 其實我講嘅係維持了半年嘅賓主關係。或者一開始我太高估自已嘅能力, 貿貿然應承當補習老師, 但原來好快發覺, 係好難正職同part-time同時兼顧。 想當年曾經替唔少學生補過習 ~ 吹下水先 ~ 最令我引以為榮係我一個學生, 佢揾我 "救命" 時係讀緊 5年班下學期, 佢讀緊 B班。心水清的話, 你可能知道, 小學通常都係將成績最好嘅學生編入A班, 如此類推, 被編入D班嘅話, 被受怱視, 將來派去好中學嘅機會細D。
呢個學生揾我救佢嘅英文 & Maths, 小學生其實好易搞, 至難搞係讀書態度。你唔比心機去記, 唔去做exercises, 唔識唔問又唔理的話, 神仙都幫你唔到。呢位小朋友非常主動讀書問問題, 我又買左好多練習書返來, 出問題比佢做, 結果佢之前本來考開20幾名, 之後一次考試即刻考第三喎!!! 佢成個六年級都考頭三名, 最後仲考入左一個好出名嘅女校添....
但今次有所不同....一來依家補習呢家人住嘅地方好吊腳, 次次搭車去都好浪費我好多時間; 二來我覺得自己體力真係頂唔住, 有時諗, 又唔係等錢駛得咁緊要, 係咪成日要攪到自己周身唔得閒? 有時放工後想約下朋友食飯都唔得, 想去做gym又冇時間, 實在困身到不得了。最重要問題係, 可能近半年來生活好趕急, 攪到自己都好緊張, 個腸胃差左好多; 而我對腳嘅筋膜炎仍未斷尾, 我唔想再食藥, 因為最近更加發現, 原來呢D冇類固醇嘅止痛藥, 係極傷肝同胃, 唔怪得每次我食一粒呢種止痛藥, 要食兩粒胃藥! 更加唔怪得呢排個胃開始經常好痛, 有次我胃抽筋痛到行唔倒, 連路都行唔到, 要搭的士去睇醫生 (路程只需10分鐘都行唔到)。所以我已經轉左做物理治療醫對腳, 已經做左7-8次, 效果好好。
加速我決定唔想再補習, 係因為近排我忙到連睇醫生, 做物理治療嘅時間都冇....只因為我放工要趕住去補習....
越來越唔開心, 唔想搵埋D錢但冇命享.... 本來諗住農曆新年後即刻話唔再補, 但佢屋企竟然加我補習費, 又逢星期六都搵佢司機揸車來接我去補習!! 咁攪法, 我都唔知點開口話唔補。 近日因為工作時間調動關系, 我工作上連續返左三個星期 7am-6pm, 真係人都顛; 最顛係之後仲要趕份 part time, 冇時間醫對腳同個胃...
所以, 我作左一個天依無縫嘅故事, 同佢地講我唔可以再補習。本來我一直想好來好去, 補完呢個學期先唔補, 但自覺身體狀況 & 精神上真係唔能夠再應付落去, 所以雖然良心過而唔去, 但別無他法。
分手 ~ 真係好難講出口..... 唔怪得自己以前.... 浪費左咁多大好光陰啦!! 
或者以後做人真係要狠D!
No comments:
Post a Comment