世界輪流轉

工作多年以來, 從未需要擔心炒人裁員呢樣野...不過世界輪流轉, 因為公司架構呢兩年不斷轉變, 依家做到有D心灰意冷, 亦越來越多公司政治...

上個星期, 公司倫敦那邊嘅Head, 已經出左個email, 講一大輪廢話, 終於戲肉係...因為環球經濟因素, 將要裁員。先希望有人肯自動起身, 若果唔夠數, 就會裁員。當時我香港嘅老細 (亦即係我老友), 已經話佢自已個位有D危。查實倫敦head office那邊想踢走我老細係唔奇, 因為佢人工太高, 而且同新管理層有好多牙齒印。佢話我就唔駛擔心, 不過如果我老細被裁冇得do, 我就完全冇興趣繼續留係呢度。

昨日, 老細打我手機, 話我知, 我地倫敦那邊一位最老資格嘅同事被 out!  我覺得好愕然, 竟然開佢刀。呢位同事有好多 contacts, 在我地呢行來講, 呢樣係重要資產; 呢班新管理層為左D所謂減省開支原因 (其實我覺得更大原因係要剷除舊勢力), out左對公司咁有用嘅人, 真係白痴到爆。

呢位同事被裁後, 原有舊班底最長年資就輪到我老友, 然後...可能係我 (我都算老資格???!!)。我雖然未必需要太擔心自己嘅前途, 但我就絕對擔心我老友。佢昨日在電話說, 來緊一年, 班英國佬 (雖然佢自己都係)應該唔會再 "yuk"人。咁就死啦, 唔通成日都要擔心定下年咩???

仲有一樣野, 因為我老友同我嘅合約係英國合約黎, 同依家合併左嘅所有其它香港員工有分別, 我地亦有被要求改為香港合約嘅可能。我老友話, 我地記住死都要堅持唔好屈服。呢樣野我贊成, 不過唔肯的話, 會如何處理真係唔知...如果佢地肯給予非常好嘅條件來lay off我地, 我地就唔駒, 因為依家呢班人我地完全頂佢地唔順。

呢兩年, 公司被收購後, 先係超好人嘅老細 (建立公司的大股東)被踢走, 繼而所有前朝元老一個一個慢慢被踢走。所以我唔覺得長遠來講, 我在呢間公司會點開心。

呢兩年, 越做越唔開心, 呢排仲不斷諗, 如果我離開呢度, 下一步可以點行呢???? 

或者以前活得太自在喇, 唔駛諗唔駛憂。今日, 我終於長大 (死火, 依家先大!!), 要為自己嘅前途而要認真思索。