Part 25 ~ 都靈市外小鎮遊 (4) ~ Ivrea

好耐冇講我個意大利之旅 (呢排太多其它野講添)....

5月13號下午嘅行程, 係去都靈市外嘅另一個城鎮, 叫做 Ivrea。去埋呢個小鎮, 我地明日一早就要離開都靈了, 所以希望盡量享受在都靈餘下半日時光。

呢個鎮都唔細, 而都靈大學亦有分校在此。呢個地方亦係我地去過4個小鎮中最多年青人嘅城鎮, 充滿活力。

呢個鎮, 冇旅遊中心, 冇市地圖可以攞, 只係有一個好大嘅地圖在火車站外一個牌, 個牌仲要喺一堆垃圾嘅後面!  為左方便起見, 我地唯有將個地圖牌影左出來, 然後喺個相機度久不久就放出來睇... 一路行, 一路睇。

Ivrea火車站附近有巴士入市中心, 不過我地想用腳行, 去睇每一個地方。沿途唔知何解, 好多棉花碎吹來吹去。呢次旅程中, 我地發現好多意大利城市都有好多棉花碎周圍飛, 唔記得問下人, 或者大家知唔知, 意大利係咪盛產棉花呢?  5月是否棉花盛產季節呢?

呢個就係巨型市地圖。

 

行去市中心途中, 見到基亞連尼嘅海報, 即時影番幾張相。

 

咁樣賣廣告...

 

今日天氣極好, Ivrea市比起之前三個小鎮, 大好多, 人都多好多。 第二張相嗰條橋, 在 2次大戰時遭破壞, 已經冇用。

 

當然唔放過意大利雪糕呢樣美食啦, 呢間 gelateria嘅員工仲同我地講 "ni hau" (= 你好), 但佢講到錯晒音, 我地初頭都唔知佢講乜東東!  呢度超多味道選擇, 真係想全部味都要晒呀!!

 

我地行到上山上邊, 景點係市大教堂 (Duomo/ Cathedral), 因為時間關系, 教堂又係放食飯時間 ga!!  真係去到邊都休息緊的....非常冇癮...

 

另一好靚景點就係呢間好大嘅堡壘。佢外表好靚, 而且size好大, 鏡頭都影唔晒。可惜我地唔夠時間搵堡壘嘅入口, 如果唔係真係好想入內參觀, 從裡面望出來景色都一定非常優美的。

 

食係本人最喜愛之事...除左雪糕, 意大利麵包店嘅麵包都非常令人流晒口水的。 本人真係對意大利嘅麵包店、蛋糕店、雪糕店異常瘋狂。除此之外, 仲有一樣野, 我好鐘意影的, 不過遲少少話比大家聽係乜。我今日在Ivrea 食左兩次 gelato。

 

外國人家嘅窗, 好多都裝飾得好得意, 好有情調, 有D仲好充滿個人風格口味。 由於中午至3點左右係當地人午休關系, 所以舖頭關晒門, 街上行人唔多, 比較靜寂。

 

Ivrea好快又被我地行晒喇, 又係時間要返都靈了。其中最有印象係火車站嗰位非常靚仔而又極度好人兼純情嘅員工。我個friend用好慢嘅意大利文向佢買火車飛, 佢好有耐性, 又含情墨墨咁望住你... 真係救命....

Ivrea, 係我好鐘意嘅小鎮, 仲有個靚仔, 令我留下深刻印象, 評分係 AAA!  要再來, 要再來!  哈哈哈! 

 

今晚就要執包袱, 因為明早就要動身, 坐火車落 Cinque Terre (五鄉地) 嘅 Vernazza。我地托當地朋友幫我地訂左 hostel, 明天除左可以又回到Vernazza之外, 就係又可以見到 friends喇, 諗起都非常高興。希望佢幫我地訂嘅 hostel room OK啦, 信佢唔會老點我地掛。

~~ 穿梭意大利2008 ~~ 待續 ~~