Part 24 ~ 都靈市外小鎮遊 (3) ~ Chivasso

不知不覺, 今日已經係5月13號 (星期二), 已經在意大利好耐下...今日嘅節目, 係從都靈去郊外兩個細小嘅鎮遊玩, 今朝首先去....Chivasso。

 

呢個鎮, 唔係之前在都靈旅遊局嘅職員介紹, 我地都唔識。未去過先有新鮮感, 先夠 "叉寧淨"吖嘛! 

從都靈坐火車過來, 只需15分鐘, 超快脆!  火車站出來後, 因為冇旅遊中心, 又冇地圖可取, 所以我地盲鼠鼠跟路牌行入市中心。

多得我個團友Sammi!  佢喺佢個blog極之詳細交待番個旅程嘅資料, 我睇番先可以回憶番途中每日嘅點點滴滴。唔怪得佢每晚都在本日記係咁寫係咁寫啦, 哈哈!  點解佢咁有精神寫嘅?  我每日都倦到痴晒線, 只係想直飛上牀瞓!

佢提醒我 ~ Chivasso個鎮幾古典, 好優雅, 夠老!  我地在呢個鎮行D地方時, 發現周圍好多知珠網!  嚇壞人, 點解建築文物咁多知珠網, 究竟幾耐冇人打掃過呀???  講多無謂, 大家睇睇片睇下個地方靚唔靚啦。

 

唔好睇個像咁英偉, 行埋D看真D, 好多知珠網ga, 多到嚇親呀。

 

好優雅嘅石仔路。我地沿途一路行, 發現大街小巷, 都有好多知珠網, 包括街上嘅欄杆、街燈等等都有 (製造懷舊氣氛??)。

 

Duomo Santa Maria Assunta, 建於15世紀, 係Chivasso鎮嘅主教堂。

 

途中遇到呢件恩物 ~ 地圖。我地影低佢, 久不久從相機開出來睇下自己行到邊。

 

La chiesa di Santa Maria degli Angeli (St Mary of the Angels' Church)

 

Chivasso鎮裡邊一個主要廣場, 我地行到咁上下, 搵左張凳坐在此, 睇途人嘅生活百態。

 

因為太肚餓, 所以搵野食, 然後不經意找到呢間店 (pasticceria = cake shop)。原來Chivasso最出名係nocciolini, 而呢間就係賣nocciolini 嘅名店。Nocciolo解hazel, nocciolini可能係解 small hazels掛。我地都係度買左D來吃, 嘩, 甜到飛起, 要搵咖啡送來食先得。

 

我在呢間店亦買左個好便宜嘅三文治 (tramezzino), 只係 2.5euro, 但內涵好豐富呀!  好耐冇食有番茄、蛋、菜、吞拿魚, 咁大份嘅三文治, 仲有係終於可以食軟綿綿, 而唔係硬到死嘅麵包。

 

食飽後, 行多一陣, 我地就搭火車過另一小鎮 Ivrea參觀。

 

~~ 穿梭意大利2008 ~~ 待續 ~~