Part 8 - 我愛Palla (上半部份)!!

柏拿甸奴絕對係我見過最好人嘅祖記球員 (比3年前見到嘅隊長廸比亞路更好人)。

膚淺d講, 佢外表簡直係靚同型到爆, 而且經常都都係笑容滿臉, (但絕唔係 je出黎嗰種), 加埋古銅色皮膚, 好靚嘅輪廓, 完全係意國型男代表人之一!!  (有冇人開始唔抵得, 妒忌先??  哈哈哈)

實際d講, 大家都認為佢可以成為隊長嘅接班人, 當然我地緊想啦 (不過Giovinco氣勢都非常凌厲喎), 如果有一位如此人品 (仲咁靚仔)嘅人將來接隊長嗰位, 當然就係祖記最佳代表啦。

本來Palla係我在祖記第三最愛 (1st係馬基安尼, 2nd係隊長), 不過經過今次祖記香港之旅, 我嘅次序就轉左喇...馬基安尼, out啦!!!  隊長仍然係第二位, 而Palla就連升兩級, 成為我最喜歡嘅球員。

如果之前大家有睇過我嘅前作 (寄梭都靈2007)的話, 應該有印象我講過我見到祖記球員嘅所見所聞。當時我都提過Palla, 佢非常有禮貌, 而且竟然問我喺邊度來, 當時佢應該未諗過1年後嘅今日, 會到訪香港。到我上個月再去都靈, 又再見到Palla喎, 查實當時好多人走埋去搵佢簽名 (本人當然唔例外), 佢幫所有人都簽名, 但因為人太多, 佢其實冇乜表情, 只係dup低頭係咁簽名。我首先將件Palla今年作客波衫拿比佢簽, 但因為我用金色筆, 而件衫係藍色, 所以其實個名簽出來唔係咁顯眼。但當我攞上年我同佢合照張相比佢簽時, 佢簽完名後, 竟然抬高頭, 對住我微笑, 將張相交番比我喎, 真係好比面我!  哈哈哈!  攪到我幾鬼高興!  所以我一路都話佢真係好有禮貌。

Day 1 (21/5): 今次, 我最記得當第一日早上佢地架巴士到達酒店時, 阿Yuen揚佢件波衫, 而我就think晒手say hello, 佢剛剛首先企在車頭位置, 同我地喺咁笑晒口打招呼，真係太開心喇。不過跟著, 我同阿Yuen就分頭...我走去搵馬基安尼簽名同影相, 而Yuen就搵Palla同第二d球員。

因為我唔記得比一份野馬基安尼, 於是我就行番入當時已經直入酒店內嘅佢, 用左一d意大利文同佢講野, 我比份野馬基安尼時, 佢顯得好開心, 仲禮貌地錫左左右面各一下添 (當時當然開心到爆啦, 佢竟然錫我呀), 但當我向左面看一看, 原來Palla企左喺度, 呆左咁看住我地!  應該就係因為呢個場景, Palla知道我識d意大利文, 同埋引發之後發生嘅嘅奇遇。

下午2:30pm左右, 大軍離開酒店, 要去大球場作一場閉門操練。呢次, 我當然要搵Palla簽名影相啦。成功同佢影左相後, 就幫Yuen佢地同Palla合照。當d人走開晒時, 我用意大利文同Palla講 "我喺都靈見過你的", 點知, 佢做左一樣野, 就係輕輕咁用佢隻手指掂一掂我塊左面, 向著我笑, 同埋佢對眼好似曉發電咁!!!  即係點呢?  呢個動作乜意思呢?  我好可愛?  (好嘔飯!!), 佢記得見過我?  定係有特別意思嘅手語 (意大利人好鬼多手勢嘛), 我都唔知呀.....我淨係知當時比佢電親, 而且係好高伏特嘅電力! 

本來諗住今日好冇到此為止, 不過我地幾個點捨得離開得ga, 走出去尖東一帶食下野, 到5點幾時再返回現場... 到6點左右, 佢地返來, 影過下相, 我就同Mei Lin搭地鐵離開 (因為當晚我7pm要去銅鑼灣上意大利文堂), 而Yuen同阿鐘就去尖東食dinner。

我同Mei Lin不斷行錯路, 行來行去都去唔到地鐵站, 攪左一大輪, 終於去番酒店對面馬路, 突然, Mei Lin捉住我隻手, 呆左叫我睇下右手邊, 嘩!!!  竟然Palla, Moli, 歷高達利, Vecchione, 另一個青年軍, 仲有個肥佬security guard企在一間找換店出面。同一時間, Palla又見到我地兩個, 為免佢地以為我地跟蹤佢地, 我自然反應用英文向Palla話, "We are not following you.  We lost way.", 講左兩、三次添, 點知Palla話, "Parli L'Italiano?" (=Do you speak Italian?), 佢認得我喎, 哈哈哈, 好鬼開心!  我話識少少啦, 咁佢就yap我埋去佢地度。原來佢地一大班人為左唱港幣同人民幣攪到一頭煙, 咁我咪解釋比佢聽, 同埋幫佢地同我職員講唱$嘅野。Palla仲問我叫乜名, 往後就同Moli都叫我個名喇。(其實佢地都有問Mei Lin叫乜名, 不過讀個名讀得好搞笑, 唔記得又再問過, 超搞笑!!)

跟著, 得番Palla, Moli, Vecchione同另一青年軍, 然後Palla問我邊度睇香港靚景之類, 咁我地就在條街傾左一大輪, 又拿個map出來一齊研究, 仲有就係Palla無端端叫我聽佢個電話!!  我以為做乜鬼, 原來佢打唔倒長途電話, 有個廣東話嘅message佢唔明講乜!!  我竟然可以聽過Palla個電話呀，哈哈哈!!!    我順便話比佢地聽我係球會special member, 第二日1:30pm有個簽名會, 佢地好似當時先知有件咁嘅事。傾左好耐後, 我地成班人影左兩張相, 之後就講goodbye, 我同Mei Lin就和Palla & Moli等人分開行了.....

今日實在開心得緊要, 完全意想不同, 竟然可以同祖記球員傾左咁耐計 (仲要係同Palla)!!!  好興奮, 好不可思議!!!

 

Palla在我地張合照度簽名。

 

這張相係上個月我個friend喺都靈影的, 隻手指著poster的人就係我黎ga!!!  Palla在呢張相亦寫左我名, 另有一句說話, 同埋佢簽名, 佢真係超級好人。佢當時看著呢張相, 好好奇, 研究左一陣, 我晒多一張送比佢, 話佢知喺邊度影的。

~~~ 待續 ~~~