Part 2 - 對馬基安尼/好多祖記球員徹底失望!

我今日終於有時間改版面, 因為我繼續睇住馬基安尼喺我個blog嘅版面出現的話, 我會反胃、憤怒、打人!!!

我本來唔想鬧祖記嘅球員, 因為要團結一致嘛，但呢位仁兄, 簡直係祖記多餘物資，唔該速速sell走佢。我真係痴心錯付, 佢原來真人衰到爆, 我想佢同歷高達利應該係今次祖記在香港行嘅最大污點之一。 

有冇人見過比佢兩個更衰格嘅球員??  個歷高達利, 3日以來, 塊面黑過鍋lon, 擺明比面色你睇。好似我地d球迷通通係佢殺父仇人咁，根本冇球迷激褸過佢, 我唔明囉, 你行出黎除左代表自已，仲代表球會, 一日到黑, 黑起塊面, 仲乜先?  唔鐘意黎HK咪夠胆同球會講囉!  睇佢個衰樣, 唔知係咪因為球會想賣佢?  上年近季尾, 我去都靈睇波見到巴沙烈堤, 佢又係黑口黑面, 後來發現原來球會要賣佢走。歷高達利非常假, 對住d記者鏡頭前扮晒好笑容, 扮友善, 影完相即刻變番臉, 好嘔茄!!!

馬基安尼仲衰, 太多事例, 不能盡錄 (當然包括在訪問中, 辣興本人嗰件嘅事件啦)。其一係今日佢一朝早已經戴左黑超, 當d球迷在玻璃窗影在酒店大堂內嘅球員時，佢就竟然背住玻璃企, 慌死係影佢, 有病!!!  到走時, 即刻衝上車坐尾二行, sir低坐, 一個人聽著Nano...雖然今日發生左兩單騎呢搞笑事件, 但佢都冇參與, 無動於中, 坐在車上, 又從無見過佢同其他隊友交談, 唔知佢係咪自閉嘅呢??!!

昨日(21號)嘅乜鬼祖記會員簽名會, 真係事但到爆!!!  究竟d球員知唔知有簽名會呢件事呢??  我地企喺佢地食完飯出黎嘅地方, d球員出黎, 你簽到名就簽囉, 影到相就影囉!  就係咁喇, 呼顯到爆!  最有誠意影相簽名嘅, 就只要Palladino, 摩連拿奴, Tiago呢幾位 (同埋一堆工作人員)。我可以話, 全個祖記香港之旅, 最值得我尊重嘅一線球員就只有呢四位 (Palladino, Molinaro, Tiago, 加埋沙歷咸美斯) (再加幾位青年軍), 其餘球員簡直係破壞晒我對球會同呢班人本來美好 (但原來不知所謂)嘅印象。

唔該唔好轉載我篇文, 更加咪譯成意大利或者英文, 睇完就算, 當發左場夢 (有部份係惡夢添!!), 最好嘅回憶就係見識到Palladino靚仔同好人到無得彈, 佢簡直係極品!!  仲有Molinaro真係好nice呀, 幾斯文, 而且英文ok的。Tiago頗文靜, 但好親切, 沙歷咸美斯都好有笑容。

巴治奧、廸比亞路或者柏拿旬奴佢地好唔同, 我覺得佢地真係好有修養, 佢地真係有一種好不同嘅感覺, 有一種未力。我咁講，因為我曾經接觸過佢地3位, 同比較過好多其他球員, 唔係主觀, 好客觀。

球星 vs 球員......

球星: 巴治奧、廸比亞路, 柏拿旬奴 (明日之星 )

打份工嘅球員: 歷高達利 (尋晚冇得出)、馬基安尼 (要被換出)、查斯古特 (入唔到法國國家隊)