Part 21 ~ 回到都靈 (又去朝聖祖記)

之前提過, 因為實在太疲憊, 我地在佛羅倫斯嘅時候, 大家都認真考慮究竟仲會唔會繼續南下。  最後, 我地喺佛羅倫斯嘅時候作出一個重大決定: 去埋錫耶納 (Siena), 我地回頭再北上, 返返去都靈。最初我地想上網訂都靈嘅hotel或者hostel, 但因為到時會係一年一度嘅書展舉行期間, 所有比較便宜嘅酒店旅館都通通 full 晒。

迫於無奈, 唯有打個電話比我喺都靈嘅一位朋友。呢個朋友曾經講過, 我下次去都靈住佢嗰度就得喇!  就係本住佢呢句說話, 我樣樣衰衰咁請求佢收留我 ~ 係我地!  兩個人...都唔知人地屋企有冇咁多地方添....

點知佢喺電話度一口應承左, 真係好感動, 仲去到佢屋企先發現, 原來佢為左我同我個friend可以借宿佢度, 佢同佢個細女暫時搬番市郊嘅屋...真係好唔好意思呢。都唔知點多謝佢好。

就係咁, 我地竟然放棄左去Assisi, 佩魯賈 (Perugia), 巴里 (Bari), Alberobello, 拿玻里 (Naples/Napoli); 返去都靈 (4日3夜)。

睇睇上面個地圖就發現, Siena已經離開都靈好鬼遠, 所以如果返上去, 需要搭好耐火車。呢程火車認真金!  6個幾鐘頭火車, 仲要冇直車, 要轉火車 (即係又搬行李!  好驚!)

路程係:

Siena去Pisa (比薩), 車程大約2個鐘頭; 之後, 等個幾鐘, 轉

Pisa (比薩)去都靈, 車程大約4個鐘頭。

途中發生左一D超攪笑事件, 真係本世界發生喺在下 身上最攪笑嘅事件之一!  故事篇幅頗長, 不過都算攪笑 (我個人覺得), 有興趣就睇下啦... 

話說喺Siena嘅火車站月台等火車時, 火車即將埋站喇, 有個意大利男人問我地架車係咪去Empoli (安波里), 我地話應該係。點知就係呢個答案, 比呢個佬煩足個幾鐘!  佢上車後坐喺我地後面, 跟著架車開左後, 就不停走過來同我地講野。起初基於禮貌 (最重要係想practice意大利文), 又見佢個樣正正路路, 同佢講啦。

初頭佢講嘅野都頗正路, 但我個friend傷風病到痴線, 淨係掛住仲鼻, 大部分時間得我一個同呢個佬廢噏。冇幾耐之後, 其實開始冇野講, 但個佬又唔返佢個位, 死企喺我地後面吹水。跟著, 佢開始發神經喇。佢話佢住嗰度冇中國人, 佢想識個chinese girl做girl friend!  死, 大鍋!  跟著我地開始唔多理佢, 呢個時候咁啱埋站好多人上落車, 佢就番自已位坐番。

過左一陣, 我個friend去厠所, 個佬竟然又行黎傾計。講左D廢話一陣, 佢同我講, "仲有個幾鐘我就落車 (此時佢看一看佢個錶), 然後佢就話, "我仲有個幾鐘就落車, 不如我地做一個鐘頭嘅情人!" 

What????  唔係呀嘩, 我真係未聽過一個鐘情人呢樣野, 我都唔識佢, 做乜鬼情人呀!  我當然一口拒絕佢啦, 佢仲敢膽死問我點解!!!

之後, 隔左一輪, 以為阿叔知訂自己過主啦, 點知當我個friend再度行開嘅時候 (因為佢病到痴線, 成日來回厠所同車卡之間), 個茂里又行過黎...真係好驚呀, 唔該佢唔好過來啦。又吹水, 點知講兩講, 佢又開口講, "我仲有半個鐘頭就落車, 不如我地做半個鐘頭嘅情人吖!"

唔好意思, 我要粗魯一下, 我頂佢!  x0$%^&#@!#^&^&

我好不耐煩同佢講, "No!"  之後佢又問我點解, 我真係想知, 乜意大利佬好鐘意在火車時間同人做短暫情人ga咩???  我再三、四、五、六、七下咁強調, 中國人冇呢樣野!  唔好再問我喇, 好煩! 

當然啦, 呢種人厚顏無恥.... 跟著我個friend返到來, 佢問我地個旅程會去邊, 我地好唔想再理佢, 求其答佢話最後會去羅馬, 佢就話佢到時可以去羅馬join我地, 帶我地去玩下, 我駛鬼你帶咩!  我地話我地有個意大利朋友 (amico italiano) (意思係意大利男性朋友), 哈哈哈, 佢一聽到係男性朋友, 就重複, "amico italiano"?? 

佢聽到我地話係之後, 即刻死晒蟹!  總之我地一開始就強調有個 amico italiano啦, 咁就晨早擺脫左佢啦。

以後在意大利真係要醒醒目目, 醒D先得!

********************************************

我地被火車上嘅意大利佬煩死, 所以決定在火車上要扮瞓覺、扮唔識聽意大利同英文。

之後由比薩去都靈嘅車上, 又有另一個佬想撩我地傾計。呢位仁兄, 我個friend尊稱佢係 "肥版Ricky Martin", 一個穿牛仔褸同牛仔褲嘅阿爾巴尼亞佬!!!!  咁死老土, 70年代嘅衣著!!! 

呢個佬D意大利文, 我地根本都聽唔明, 同埋以我地咁渣, 都聽到佢講錯grammar。我地句句都叫佢repeat, 攪到佢想死咁滯, 佢完全唔想再同我地講野!!!!  哈哈哈, 成功, 佢收爹喇!!! 

不過呢個佬, 佢直頭有心靠害我, 應該係報服我地玩野。到達都靈火車總站時, 我好艱辛咁將件行李搬落火車時, 佢見到, 好免為其難 (個樣好唔情願個種)擰我件行李落車, 但一個唔該將我件行李嘅手抽一野扯爛!! 

^*#$^$&*&!!!

攪到我之後成個旅程要烏低身推個行李箱行!!!!! @$(%$#$^##

*****************************************************************

講完一輪兩個低B仔, 講番D正經野先!!!

返都靈, 當然想再現場睇祖記踢波啦, 不過太遲喇, 第二日就係聯賽最後一場, D飛一早賣晒添.....

呢間舖我地真係搵得好辛苦, 佢係賣祖記波飛嘅店。我依家已經唔記得間店嘅正確位置添, 下次點攪???

 

店嘅窗外有呢個貼紙, 認住佢冇錯喇, 証明佢有發售祖雲達斯嘅球票。

 

雖然買唔到波飛, 但睇球員就係一定要做嘅事 ~~~ 又係我呀, 保安哥哥!!  擰住件行李嘅係甘莫蘭尼斯。

 

呢位uncle係祖記職員, 佢知我鐘意馬基安尼後, 走去問祖記保安, 馬基安尼來了未。oh, 原來唔知幾時佢已經來了。連Palla都已經到左... 我黎遲左添.... 唔緊要啦, 橫掂兩個星期前已經見過Palla啦, 不過今次旅程兩次都見唔到馬基安尼 (依家諗番當然冇所謂)。Uncle非常好人, 第二日又見到佢一次。

 

見唔到Palla, 馬基安尼, 不過就同比索圖影左相同埋簽左名。佢非常好人。

 

祖記嘅隊巴, 竟然咁啱比我見到, 而週圍又冇乜人喎!  正, 可以影張冇人遮住晒嘅靚相!  我亦搵途人幫我影番兩張。不過, 呢架車應該告別左喇, 因為近期嘅Hurra' Juventus雜誌話球會新球季有架新嘅隊巴, 外表裝飾有D唔同左。

 

隊巴嘅背都唔放過, 話晒比較少有咁數, 影多幾張都唔過份呀....

 

等左鬼咁耐, 終於D球員出來喇, 不過D人太多, 又多 "高人", 我睇唔到乜野, 超級失望。但係見識到D球迷唱晒哥、叫晒口號嘅情景 (當然我完全唔知佢地叫乜唱乜...)

 

歡送左球員去球場後, 我就即刻去搵有直播嘅bar, 食野同睇波 (我個friend當然採我都儍啦, 佢走左去行街睇野)。我去嗰間bar唔係太多人 (正!), 最低消費係 6 euro (冇記錯的話), 包一個漢堡飽同一杯drink (唔記得係咪添)。  全場得我一個女球迷睇波, 而且仲係外國人添!  所以受人注目。註: 我當日睇波時, D意大利人在bar睇波好靜, 唔出聲乜滯咁奇怪嘅?  咁冷靜點睇波呀?  點解可以睇波唔出聲都得嘅?  我次次都差D緊張到叫出來喎, 不過驚比人打, 所以要控制住個口...

 

睇完波又再行經祖記 store, 今次係我首次從呢個角度影間舖頭。

 

好喇, 顛完喇, 去都靈次次都做同樣嘅野... 要求變先得.....黎緊在都靈仲有3日兩夜, 冇理由日日都係只做同祖記有關嘅野...我個friend遲早打瓜我!! 

所以, 我地跟著走左去火車站間 information center, 叫佢推薦我地去都靈附近嘅小鎮玩。我地一下子覺得自己時間多得滯... 點解有Assisi、 巴里、拿玻里唔去, 去都靈附近嘅小鎮。 不過, 原來D小鎮都幾值得去行行欣賞。 Assisi、 巴里、拿玻里...留番下次啦!!

下回預告: 都靈附近小鎮遊

~~ 穿梭意大利2008 ~~ 待續 ~~