Part 20 ~ hea在錫耶納 (Siena) (2)

真係要好好地在錫耶納 (Siena) hea下先得, 因為兩個星期以來, 好似做苦力一樣, 每次想起即將又要搬行李搭火車真係好似要去行刑一樣咁辛苦。

其實一早應該揀搭巴士由佛羅倫斯來Siena, 因為巴士直到Siena山城嘅市中心巴士總站。不過因為在佛羅倫斯時, 冇時間找Sita巴士總站 (去Siena係坐Sita巴士公司嘅巴士的)。 加上, 我地又諗住Siena火車站有個行李寄存處, 到時到達Siena, 可以將行李寄存一晚, 第二朝離開Siena前取回 (因為住得Siena一晚, 我地唔想又將行李搬來搬去, 想輕裝D)。點知好死唔死, 火車站嘅行李寄存處已經變成一個爛鬼儲物室喎!!  

後話: Siena市中心Sita巴士總站隔離地底個行李寄存處都唔好得幾多, 因為行李唔可以儲過夜的, 對我地作用係零!! Siena係個名符其實嘅山城, 而且到處都係山路!!!  在火車站要坐大約10分鐘巴士 (要比$)上Siena市中心。不過..... 個巴士司機老點我地, 又話我地落車後行500米就到我地間hostel, 點知最後.... 我地look住個行李箱, 在彎彎曲曲而地下係石春鋪成嘅窄巷look左半粒鐘先搵到目的地, 個司機超級大整古。    我地個行李箱冇遇到不測真係好好彩。 

Siena ~ 被譽為歐洲其中一個保持得最完整嘅中世紀古城。人口大約53,000, 歷史上與佛羅倫斯係死敵。除左紅磚屋與窄巷之外, 最為遊客所熟悉可能係每年兩次 (7月2日 & 8月16日), 在市中心扇形廣場 (Piazza del Campo) (下文有相片)舉辦, 稱為Palio嘅賽馬節。

在此要特別多謝我個同伴Samantha, 下列部份相片係佢嘅傑作。 

搬到身水身汗, 要食杯gelato解暑先

呢類型嘅窄巷在Siena係 "一般街道", 司空見慣, 可以想象, 如果日日夜夜都要行呢類街道出入, 我身材應該都... 好出眾, 哈哈哈!!!     雖然好多窄巷, 但治安良好。

 

到處都見到 ~ 古式古鄉嘅街燈, 以及牆上嘅宗教雕刻, 雕鑿得好精細好傳神。

鎮內不同種類嘅小商店.. 留意下 ~ 下面個大豬頭。

我地在Siena一日, 只係比錢入左一個地方參觀, 就係下面嘅Battistero di San Giovanni (St John洗禮堂), 位置係Siena嘅主教堂 (Cathedral/ Duomo) 附近。印象中入場費3 euro。 個人覺得好值得參觀。根據Lonely planet旅遊書講 (我都係事後先知道), 洗禮堂正面屬哥德式建築。洗禮堂裡嘅畫真係畫得非常美麗, 雲石洗禮池 (第三張相), 裝有銅板, 描述約翰洗者嘅生平事蹟。 注: 意大利名 Giovanni, 等於英文嘅John, 即係中文嘅約翰。

參觀完洗禮堂, 我地就沿附近條樓梯, 行上上面, 因為上山上少少位置有Siena嘅主教堂 (Duomo)。

教堂正面異常宏偉, 好有氣勢。右手邊係一個黑白條紋嘅大理石塔, 可惜由於時間關系, 我地並冇入教堂內參觀。

好開心, 正在影相之際, 見到Kenneth同埋阿Bus!!!  佢兩個係我地在佛羅倫斯時認識嘅香港人.... 當時我地分別都喺佛羅倫斯SMN火車站下面間超市買緊野, 當時有個內地同胞問Samantha同我一D食物上嘅意大利文嘅意思, Kenneth同阿Bus行過聽到我地係 "格gee欄", 所以又走埋黎傾計。

今日佢地都係來Siena (不過佢地只係1-day trip, 夜D返佛羅倫斯), 我地話Siena見啦, 估唔到, 真係在此又見 (我地都好有信心會在Siena再見, 因為Siena好細, 景點一定係嗰幾個)!!  之後全日, 我地都一齊hea足Siena一日, 真係開心, 今日變成4人旅行呢。 

我地影左一輪大合照, hea左一陣, 就一齊去搵食醫肚先。我地搵下搵下, 穿插於小巷之中一段時間後, 發現左個金礦 ~~ 一間中國餐館呀!  好耐好耐冇食過中餐喇, 真係好懷念D白飯同美味嘅中菜, 我地一致贊成入去 "擦"餐勁嘅。 

 

食左呢兩個星期以來最好味嘅一餐後, 我地就充滿力量咁再度出發喇。

來Siena其中最不可錯過, 係去大廣場 ~ 扇形廣場 (Piazza del Campo)。廣場上有好多靚野睇。

第一樣去看: 呢個噴泉叫 "Fonte Gaia" (快樂噴泉), 噴泉四周以大理石雕裝飾, 之不過... 個噴泉被鐵欄杆重重圍住晒, 簡直老土 ~ 超級大煞風景, 用相機zoom去睇D雕鑿咩。

第二樣去看: 就係整個扇形廣場 (Piazza del Campo)。 廣場非常巨大壯觀, 地磚上好明顯見到分成 "9格", 呈現放射狀, 看起來好似一把扇, 四周被民舍圍繞著。據講, 9格係象徵以前統治呢度嘅9個議會。呢個廣場可以話係整個Siena市嘅集中點, 好多人坐晒在地上邊晒太陽、傾計等, 周圍都有餐廳食店。 呢個廣場就係上文談到一年舉辦兩次嘅賽馬節 (稱為 il Palio)之地, 到時, 成個廣場會擠到水洩不通。

根據旅遊書 "魚之意大利旅行" (作者趙于萱)介紹, il Palio賽馬節時, 騎師分別來自17個教區 (contrade), 會抽簽決定邊10個教區嘅騎師可以比賽, 同邊個騎邊匹馬。當槍聲一響, 短短幾十秒內, 邊個最先到達終點者就勝利。最嚇人係所有馬匹並冇裝馬安, 騎師就咁就坐上隻馬度圍著個廣場騎同比賽, 都非常危險喎。 但呢種係最古老嘅騎馬方式, 起源於古羅馬嘅軍事訓練。

廣場正面係市政大廈同埋高102公尺嘅 Torre del Mangia (意大利第二高塔)。塔樓建於1297年, 爬上505級嘅樓梯, 就可以在塔頂俯瞰整個廣場, 以至Siena全鎮風光。不過, 我地選擇坐喺個廣場hea下算。原來坐喺廣場傾計hea真係好爽好舒服, 覺得... 終於可以閒落黎, 唔係死趕爛趕, 而係做D好似 local人悠悠閑閑嘅生活咁。

Kenneth同阿Bus喺6點就要搭番巴士返佛羅倫斯囉...我地喺巴士站送別佢地後, 返hostel梳洗一輪, 再度出發。先去玫瑰快餐廳再食餐又平又抵嘅中餐, 再返廣場嘆下夜色。以下幾張相來自Samantha。影得好靚好有情調呢!      

我都不知幾耐冇咁爽瞓喺地下睇星星!  真係好回味..... (日頭同夜晚都有好多人在廣場晒太陽/月光)... 又一個高度推薦 ~ Siena。

下回將又執包袱 ~~ 離開Siena, 今趟係折返都靈!  好野!

~~ 穿梭意大利2008 ~~ 待續 ~~