Part 15 - 佛羅倫斯之一

以前讀書嘅時候, 知道詩人徐志摩稱佛羅倫斯做翡冷翠, 但一路都唔明, 點解佢叫呢個地方做翡冷翠呢。 直至後來讀意大利文, 終於知道, 只不過係一個譯音... 英文Florence, 譯做佛羅倫斯; 而徐志摩就直接將原來意大利文呢個地方名字 Firenze, Fi -- ren -- ze譯做翡冷翠 (普遍話)。仲以為呢個譯名有特別嘅意思呢。

離開寧靜嘅五鄉地 (Cinque Terre), 搭左一輪火車, 終於到達佛羅倫斯 (Florence)。佛羅倫斯果然係大城市, 繁忙同噪吵程度極高。今次係第二次造訪佛羅倫斯, 上世紀嗰次 (哈哈) ~~ 村姑, 你仲記唔記得呀??? 

出左火車大站 (Firenze SMN = Firenze Santa Maria Novella), 沙塵滾滾, 大修路!!  之前喺香港一早在網上訂左hostel, 所以跟著地圖搵間hostel。不過又一次攞膽之推行李路程..... 同hostel網頁上描述好近火車站嘅講法有D出入喎!!!  兩手fing fing咁行就OK, 但揸住行李, 喺呢條爛路度行 (仲要途中要過馬路添), 甚為狼狽呀。

最終, 安然到達hostel。

間房在2樓, 睇落都幾OK, 要share bathroom, 但只有另一房人同我地share bathroom, 所以都尚算方便。日頭呢間房好好陽光, 但 ~~ 出面街真係噪到冇人有!!!   因為有兩層玻璃, 所以原先唔覺噪; 但當我地打開窗時, 就大大鍋喇!!!  出面係大馬路, 巴士、私家車, 仲有最重要係超多摩托車喺出面行!!!  一朝早就比D車聲噪醒; 而夜晚就夜一夜都仍然好多車, 好噪, 真係攪到發神經。

牆上邊呢張poster好靚, 我一入到房就即刻影低佢留念。 可能大家都知, Vespa係意大利嘅摩托車名牌。D車真係好靚呀, 不過佢地發出來嘅噪音太犀利喇, 有D難頂。

放低行李後, 效率奇快嘅我地當然就係出街參觀啦!! 佛羅倫斯嘅傍晚夕陽時分真係異常美麗, 不愧係浪漫之地。但係.... 呢個城市實在多遊客得緊要, 成個旺角咁, 大大減低左佢嘅浪漫程度。  呢張相裡嗰兩個人影, 就係我地兩個喇!  最出名嘅 Ponte Vecchio (舊橋) 就在前面。

根據 "邊走邊畫意大利" (小米麻糬著) 呢本書所講, 橫跨Arno河嘅Ponte Vecchio最早建於972年, 因為橋墩太低, 毁於兩次大水。現在嘅模樣係在1345年搭建嘅, 而亦係唯一一條在二次大戰時逃過納粹德軍轟炸嘅老橋 (據講係希特拉嘅order, 亦有話係佢嘅軍官唔聽佢轟炸嘅order, 先保住呢條橋)。

美麗非凡嘅Ponte Vecchio, 喺16世紀之前, 烏煙瘴氣, 橋上嘅商店都係經營肉攤、鐵器舖等, 肉販在Arno河邊屠宰, 然後將核突嘅垃圾倒落河；而鐵匠製鐵聲噪吵不停。Ferdinando I de' Medici執政後, 整頓呢條橋上嘅環境。命令所有呢D肉檔鐵器檔等通通要OUT, 然後要城裡嘅珠寶金飾店搬入來, 真至現在。現在, 呢條橋係必遊景點, 而橋上嘅舖亦全部都係金飾舖。

好閃呀!!!

跟著我地行呀行, 走呀走, 走上到米高安捷勞廣場 (Piazzale Michelangelo) ~ 遠眺佛羅倫斯最理想嘅地方。記得上一次來, 我地係搭巴士上來, 今次上來用左好多力氣呢。

由呢度望番落去市中心, 真係靚到冇人有, 而且呢度少人好多, 寧靜得多。正!!!  廣場上有一座復製版嘅大衛像。呢個廣場我極之推薦, 來佛羅倫斯的話, 一定要上來看佢嘅全相!! 

一日完結 ~ 食餐好醫肚先 (本來諗住)!!  可惜 ~~~ 呢個難食到無輪嘅pasta, 係本人有生以來食過最難食嘅所為食物!!!!  仲要最火滾係 ~ 呢度嘅人嘅服務態度簡直係不知所謂!!! 

劉德華要黎呢度幫呢班人洗腦先得呀。

~~ 穿梭意大利2008 ~~ 待續 ~~