Part 12 - 我愛五塊地之一!

五塊地 (Cinque Terre), 尤其係Vernazza, 係除左都靈之外, 直至現在為止我最喜愛嘅意大利嘅一個地方。

Cinque Terre ~ 意思 Five Lands, 係形容五個細小嘅漁村 Monterosso, Vernazza, Corniglia, Manarola同埋Riomaggiore, 1992年被聯合國列為世界文化遺產。5條漁村界乎熱拿亞與佛羅倫斯之間, 由熱拿亞向南走下, 沿海搭個多兩個鐘頭火車, 就到達。最令我嘩嘩聲係火車沿途不斷經過大海同週邊好多小城鎮 (除左5鄉地還有另外好多小而美麗嘅鎮仔), 風和日麗, 海天一色, 真係美景不絕。 本人字窮, 唔識用文字形容嗰帶地方風景有幾靚絕, 有機會你地去睇下就知。

有人從佛羅倫斯往上去Cinque Terre, 不過我地由上而下玩呢個地方。五塊地嘅每一個小鎮裡頭嘅屋, 外牆都掃左色彩鮮豔嘅顏色, 所以真係好遠以外已經睇到。意大利政府將呢5個地方一帶劃為國家公園, 所以到達其中一個村後, 可以沿著山路嘅徑一路行去另一個村, 當然每個起點區都有職員check飛, 你只要買左一張行山証, 就可以通行無阻行山, 一邊健行一邊睇風景。行山証分幾種, 最常見就係可以淨行山, 或者行山+火車, 又或者行山+火車+船。點解咁多選擇呢?  因為:

Monterosso --> Vernazza --> Corniglia --> Manarola --> Riomaggiore

我住在Vernazza呢個村, 我今日想在Vernazza行山行到去Corniglia, 然後太倦喇, 唔想沿同一條路又行番去Vernazza, 咁若果我有張行山+火車嘅行山証, 就可以唔駛$搭火車返去Vernazza; 但如果我只得張淨行山証, 就只可行番回頭路, 又或者比$買張單程火車飛返Vernazza。我地買張行山+火車嘅行山証, 係想比較有彈性咁遊玩五鄉地。 聽講坐船在海看回五鄉地都極靚, 不過因為船班次好疏, 加上價錢相差好大, 所以冇買行山+火車+船嘅行山証。

要從熱拿亞去五鄉地, 又要返到呢個鬼地方 - Genova Principe呢個熱拿亞火車大站!!  呢度有火車直去到Vernazza ~ 我地在五鄉地嘅藏身之所!!  呢日我地極度唔好彩, 有一班車竟然除消左, 結果係, 兩班車嘅人迫落一班車度!!!  真係迫到發顛!  在火車度企兩個鐘唔係問題, 問題係d行李大件又阻人前進, 經常在車上比人歧視呀!!!

 

攪左兩個鐘肉搏之旅, 終於到達世外桃源 - Vernazza!  呢張相嘅上層就係Vernazza嘅火車站。呢個站好有趣, 乘客要在山窿入面落車, 然後行番出來!! 

 

出火車站後, 落番去地面, 向前直行, 唔駛兩分鐘就到我地hostel 嘅check in地點。  Hostel主人Angelo就住在此。

 

間hostel在過佢間屋少少的另一間屋的 ~ 3樓!!!  攞膽, 冇電梯 (除左火車站落樓有見過電梯一次以外, 成個Vernazza鎮都唔會見到電梯呢樣文明產品!!)  好彩Angelo幫我地攞行李, 叫我自已攞的話, 我叫佢攞我條命算喇!!!   嗰度3層樓大大話話夾埋有50至60層樓梯!!  平時行樓梯當然冇問題, 但揸住20幾kilo行李就.....唔好攪我!!!

 

一眼見晒嘅房間, 有自已洗手間, 一晚 55歐羅 (2人合埋), 非常合理嘅價錢。

 

人咁多嘅???  Vernazza係非常繁忙嘅旅遊小鎮, 假日更加迫爆。

 

時間尚早, 所以上左Vernazza嘅castel看看Vernazza嘅風光。 入場費成為 1.5歐羅...總之唔駛咁快去castle, 因為我地之後識左幾個當地friends, 其中一個在上面做part time!  所以後來又上多次去 (今次當然免費啦)!!

 

在castle上面居高臨下看Vernazza嘅靚風景。

 

Vernazza有一個小沙灘, 我都想游下水, 不過冇帶泳衣呢....

 

去嗰幾個local friends工作嘅bar度食晚飯....呢個意粉非常好味, 8歐羅, 價錢合理。本來用佢地internet要收錢的 (好似2歐羅1個鐘), 不過最後佢地冇收到錢, 太好喇, 感激晒)。

 

~~ 穿梭意大利2008 ~~ 待續 ~~