Part 6 - 在都靈與祖雲達斯球員碰面!!

(後加左一段關於柏拿甸奴)

都靈旅遊記已經好耐冇寫，希望快d完成佢先。

之前我提到，去到都靈嘅第二朝，喺一間舖頭，被一個職員好奇地問我來都靈做乜東東。我本來唔想講咁多 (因為驚對方係拖連奴嘅球迷, 咁我咪好危險, 你知有時外國有d球迷都幾顛嘛), 不過我最後講多兩講，都話左過佢知我係來旅遊兼睇祖雲達斯球賽。點知嗰位姐仔聽到時, 就爆料我知祖雲達斯嘅球員，第二日會喺一個地方出現。當時我都好懷疑, 亦都唔係太在意佢講嘅野。

點知第二日，陰差陽錯，去翻據講球員會出現嘅地方。原來，佢地真係將會喺嗰處蒲頭, 有d球迷都係度等緊。等左一陣，d球員果然逐一出現，簡直不能相信，球員就喺你面前咋!  我先後見到好多球員，仲同左某些球星影左相!!

合照嘅有: 當時領隊迪更斯, 基亞連尼, 馬基安尼 (嘩!!!), 巴沙列提, 歷高達利, 柏拿甸奴, 保方, 查斯古特, 比索圖

拿到親筆簽名嘅就有: 比連度利, 巴沙列提, Palladino

因為掛住影相，所以冇乜簽名 (而且我都冇白紙喺手)，最衰係唔記得左請馬基安尼同歷高達利簽名!!! 

至可惜係同唔倒隊長迪比亞路合照，一來好多人圍住佢，二來佢好似好趕咁，不過佢就停低左好耐同球迷簽名。

巴沙列提非常靚仔，塊面又白又滑, 未見過男人塊面咁鬼白滑, 佢應該冇用過SK II 啩!!!  哈哈!  最多人擁埋去嘅係隊長同保方，其次Palladino同歷高達利都唔差，吸引好多女fans!!  在意大利人角度, 佢地覺得Palla同歷高達利係好靚仔、好型的 (我都覺, 真人真係好靚仔的), 歷高達利就好高大下。講咁耐，當然要提馬基安尼啦!  佢勁nice, 唔太高大，不過就因為未剃鬚，所以有好多鬚根，非常超級咁有型兼sexy!!  (唔好意思，冇d經持添)...迪更斯原來真人有d肥，肚腩幾大下!!!  基亞連尼好鬼大隻的。仲見到Giovinco, Zalayeta。

值得一提，d球員真係個個都超級好人超級nice, 基本上你叫親佢簽名影相佢地都肯。我同Palladino總共影左3次，影到佢都有d surprised。影左咁多次，原因係替我揸相機個位球迷，太斯文，唔敢大力按快門，所以影左兩次都影唔倒野出來。當我地第三次合照時，我又唔識點用意大利文請嗰位球迷大力d按快門，但其他在周圍的人都叫佢 "大力d，大力d", 非常攪笑!!  Palladino又問我喺邊度黎，有人搭口話 "Japanese", 我即刻話, "No, I come from Hong Kong.", Palladino就講左句, "oh, Hong Kong!"....唔該d外國人唔好再以為呢個世界上嘅亞洲人都係日本人，非常討厭!!!  仲有, 大把祖記球迷係中國人!!!

(後加:  唔記得講, Palladino非常有禮貌，佢幫我在雜誌簽左名後，望住我，然後微笑住, 雙手將本雜誌同支筆交翻比我!!!!!), 簡直有禮貌到爆!!! 

不過當日見唔倒Nedved & Camo....可惜可惜。另外，當保桑出現時，我隔離嘅球迷們全部都細細聲 "yeeeeee", 擺明唔喜愛佢，梗係啦，炸彈人呀，怕左佢怕米貴!!!不過大家都叫做尊重佢，冇噓佢。

Palladino在我即時買的祖記官方雜誌上簽名。

巴沙列提給我嘅親筆簽名。

比連度利嘅親筆簽名 (海報橫誇兩版)。

******* 以下嘅祖記球員親筆簽名，其實係2005年祖記到訪香港時，我得到嘅。***************

隊長廸比亞路嘅簽名!!!  佢勁好人，簽名時特登移一移本雜誌，仲好小心咁簽喺張相裡面, 唔好出界。當我讚佢 "Sei bello" (You're handsome)時，佢簽緊名，但停一停，抬高頭，望一望我，然後向我講左句 "Thank you.", 好有禮貌喎!! 

利維特的親筆簽名。當佢簽完名後，我講左句 "Thank you", 佢又係好有禮貌，抬高頭望著我，微笑左一下。嘩，佢對眼好鬼靚，好似係藍眼珠的。

呢個應該係卡比路嘅簽名。

比索圖的簽名。

杜林的簽名，佢人非常友善的。

呢個係 ~ 之唔係薛比拿嘅簽名!!!

左邊係基拿迪，右邊就係卡比路嘅簽名。順便一提，卡比路幾nice, 但基拿迪就幾鬼cool, 少少寸添!!!  不過最寸係嗰個2打6 Sculli (依家踢熱拿亞前鋒嗰個) 。

睇開d收藏，發現一份關於祖記2005年來港時嘅報道, 原來當時借左歷高達利過來幫手喎!  當時我完全唔識佢, 有眼不識山添!!! 

都靈奇妙之旅, 待續 ~~~