美味葡萄牙菜

呢個月, 因為係我嘅生日月, 所以有部分朋友約我出來食飯、飲野慶祝一番。

今年如果有朋友叫我提議食飯嘅好去處, 我都會話, 如果唔介意, 我想食不同國家嘅菜, 比較有趣味嘛, 哈哈哈!  首個慶祝係昨日去左一間葡萄牙餐廳食午飯, 午飯係 buffet lunch。食物當然全部都係葡萄牙傳統野, 太好, 好懷念葡國食物, 自從去完葡萄牙返來後, 只係2月時在澳門食過一d葡國食物, 一路直至昨日先再有機會再食葡國野。

葡國菜館唔似意大利餐廳, 在香港並不普遍, 所以在飲食網站同埋網上找尋左一輪, 先知原來灣仔有兩間葡國餐廳的, 真係完全唔知。今次選左一間叫 Nino's Cozinha嘅餐廳嘗試一下, 冇朋友食過, 純粹根據飲食網站裡曾經光顧過嘅食客嘅評分咋!!! 

《Nino的厨房》(=Nino's Cozinha) 都幾大, 分開兩層, 五樓那一層係食a la carte menu嘅, 但食buffet lunch的話, 就在六樓, 餐廳內部已經有樓梯, 可以自由上落。



我和朋友坐位附近有一個酒吧台。

餐廳內部裝修得好優雅古典, 枱與枱之間亦有頗大空間, 坐低食野唔會有壓迫感, 好舒服; 而服務員都幾有禮貌, 幾好招呼... (死, 好似好假, 我唔係賣緊廣告喎, 哈哈哈)。

葡國餐廳當然要有張葡萄牙國旗震住個場啦。

我應該當食物放滿全碟嘅時候影相, 依家有部分相, 看上來好似剩餘物資咁添....

左手邊那碟係葡萄牙其中一樣著名嘅食物suckling pig (乳豬), 右手邊那碟就係roasted pork 。

我見到咁多食物, 真係流晒口水!!!  最左手邊那碟係 chorizo (Chouriço 葡萄牙嘅臘腸, 另一樣葡萄牙嘅傳統美食)。 之前在葡萄牙旅行時, 在波圖 (Porto)曾經見過一個專賣Chouriço嘅肉店, 全間舖放滿臘腸, 大大小小, 好多款好多選擇, 場面好壯觀的!! 嘻嘻嘻!

來到餐廳坐低第一件事, 就係飲碗湯同埋食少少麵包。我選左一碗ox-tail soup (牛尾湯), 味道唔錯, 但正如一般葡國菜有一個特點 -- 鹹!!!  呢個湯有少少鹹, 不過就接受得到。至於麵包, 好鬆軟, 好好味。但經驗話我知, 食buffet唔好走黎係咁食麵包得架, 貪貴!! 

左手邊係葡萄牙家常菜 - Frango Piri-piri (辣味雞), 右手邊唔記得係乜添。

Frango = chicken, piri piri 就係一種spicy sauce, 用呢種sauce來煮雞的。

沙甸魚 - 燒得都ok!

葡萄牙Chouriço (腸)炒蛋, 呢個我個人覺得幾好味, 我攞左兩次來食。

我呢一碟食物包括有最下面嘅兩件乳豬 (塊皮超脆超好味呀, 我食左好多件!)、碟中間有一d臘腸炒蛋、仲有八爪魚 (Paul the Octopus??!!哈哈), 沙甸魚、同埋左上角一件roasted pork。roasted pork我個人覺得鹹到嘔!!  沙甸魚一定冇在葡萄牙時食緊新鮮即grill咁香噴噴, 但味道ok的。

食到飽到唔行得咁滯, 但我都要試甜點。Serradura - 木槺布甸。我在葡萄牙時未食過所以好難比較味道, 不過呢個serradura係好實, 口感似食雪糕。我以前自己造過木槺布甸, 通常會做得好軟熟, 輕飄飄的, 同呢個我昨日食嘅葡萄牙傳統木槺布甸都極之唔同。我都食左兩個!!! 

至於用匙盛著嘅係叫 Arroz doce, 係Portuguese Rice Pudding。呢個甜品好甜呀, 但幾好食, 我覺得d飯食落好似有些少似西米。

呢個buffet lunch查實除左以上嘅食物外, 仲有baby lobsters, salmon等等, 但我好白痴, 一件都冇吃到!  其中一個原因係如果忍得到, 我唔想食生野; 其次係我覺得lobsters & salmons呢類食品, 好多其他地方都有得吃, 唔需要來葡萄牙餐廳食, 所以我寧願將個肚填滿葡萄牙傳統野食多d!!

以下兩張相片同葡國菜冇關! 因為我知道呢位朋友一定會送生日禮物比我, 我覺得唔係幾好意思, 所以買左一樣佢應該鐘意嘅野比佢, 就係呢本新出嘅意大利語書。呢本書圖文並茂, 分種類講解意大利文生字, 係一本實用嘅工具書。

我並冇估錯, 朋友的確係送我一份禮物 -- 又係意大利東西, 哈哈!!  相機繩, 都竟然係意大利嘅紅白綠!!  真係咁啱大家都送關於意大利嘅野比對方......哈哈哈!!