其實好想問一個問題好耐, 乜野叫 "烈女"?? 我頭先睇報紙娛樂版一段關於楊千嬅嘅文章, 報紙又用 "烈女" 來形容佢....
點解叫佢"烈女" ?? (我只知佢好似有首歌個歌名叫 "烈女")。 何解香港有D報紙雜誌好鐘意對 30歲以上嘅女性有咁多奇怪, 又好似帶有負面意思嘅形容詞?? 例如形容一位女性係"中女", 又經常見在雜誌封面, 或報章中大大隻字強調一個女性 xx歲 (例如40歲張曼玉xxxx), 但件事同佢個年齡冇關喎....
人年紀大左, 閱歷深左, 見識廣左, 講野更有見地, 乜唔係應該更值得尊敬咩?
之前同一位朋友講, 我有一個自我做腳底按摩, 有效抒援/解決足底筋膜炎嘅方法。終於記得影底一些相, 在此介紹一下。
呢個方法係我骨科醫生提議, 經過本人實驗證明, 真係有效用的。
不過先要長氣講一D前言先......
話說我右腳嘅足底筋膜炎, 由今年年頭開始。右邊近腳後跟嘅地方 (內側), 一行路, 每步一提起腳, 就會感到痛楚。通常每朝起身落床嗰下, 或者坐低一排, 而後起身要行走, 就係隻腳最痛之時。而當行左一陣, 痛楚好似消失, 但當連續行走大約一個鐘頭, 嗰種痛又會返來。
4月尾去意大利前, 先後睇左三次骨科, 但仍未斷尾。醫生開定三個星期藥我食頂住檔。D藥我覺得止痛作用居多, 因為食左藥後腳就冇咁痛 (而唔係唔痛), 我覺得無理由長睇都唔好, 亦唔想長食藥。脚痛好影響日常生活, 篇篇遇啱我即將要去旅行。 在旅程中需要不斷行路, 仲去行山添, 所以真係有苦自己知。
呢位骨科醫生唔係太建議打針, 我都視打針為最後無計可施嘅辦法, 因有針有少量類固醇, 最重要係, 在腳板底打針真係痛到飛起, 兩年前我左腳足底筋膜炎又係食藥攪唔掂最後要打針。 支針打在我腳板底嘅弓位, 個醫生係 "ug" (ugly個 ug)支針入去最痛嘅位有成30秒, 當時痛到我大叫, 仲流左眼淚水添。好恐佈!
可能有提過, 去完旅行返來, 隻腳痛更嚴重, 莫講係行, 直情隻腳掂一掂地都痛, 我覺得事態嚴重左, 我行路好似成個鐵拐李咁 (好彩平時我著波鞋返工, 我連平底鞋都著唔倒)。 但係我選擇左睇針炙...針炙冇得claim番公司保險, 加上情況冇乜改善, 多位朋友叫我快D睇番先前個骨科醫生, 找出真正病症好過。
終於 ~ 從善如流, 我睇番先前個骨科醫生。佢問我有冇做佢教我嘅腳底按摩方法....查實佢一早就教我此辦法, 但我做兩做就停左 (冇耐性嘛, 又自以為是覺得呢D方法邊度會有效)。 我問醫生可唔可以幫我打針........我諗定打針喇, 長痛不如短痛!!
救命.................... 支針打落黎真係痛到飛起........ 打完行落街返到屋企, 打完針嗰位仲痛緊。
打針並未完全解決到我個腳痛。醫生話我一定要有恆心, 連續最少6星期, 每晚用波子 & 熱水 "碌"痛嘅地方。
我在不同書局查找一番, 終於被我揾到一本講 "如何自己醫週身骨痛" (類似題目) 嘅書喎! 我要求證一下個醫生講嘅野係咪啱先。依........真係有呢個方法喎, 仲話有效添.....
如是者, 我已經用呢個方法抒援足底筋膜炎 (起碼依家行路唔痛了).....其實我覺得呢個方法嘅原理, 可能 (我只係估) 同物理治療師在做物理治療時, 在要物理治療嘅地方用凍啫喱搽, 然後用有熱力好似有針嘅儀器按嘅效果差不遠。 物理治療要比錢做, 在屋企做呢個腳底按摩, 唔駛錢又方便。
另外, 書本講話用熱水浸脚原來有保健作用, 但可惜又冇講點樣保倒健; 而冷天用熱水浸脚可以保暖, 浸完脚即刻瞓覺, 不知幾爽添!!! 
醫生話: 自己有恆心浸脚啦, 應該好ga喇。冇事唔駛返黎覆診。 咁又係, 用天然療法幾時都好過打針食藥呢。
依家: 我行路唔痛, 著倒平底鞋。我上星期去飲宴, 著有踭嘅鞋都冇事 (touchwood先!!!)
不過都要繼續浸腳。
培養用熱水浸脚碌腳成為生活習慣都唔錯吖。
呢個腳底按摩, 只需一小盤熱水, 以及一堆波子 (但我覺得一個碌腳板底用嘅木珠更有效), 在屋企浴室進行, 一路睇書或者閉目養神, 一路碌腳, 好健康。
我就係用呢個木珠喇....好耐之前在 Citysuper買的。呢個木珠如果就咁碌, 係碌得唔順同埋會發出D支支聲的; 但放在水之後先碌, 就碌得好順好爽呀!
今個星期唔駛分身乏術, 因國米對祖記場國家打吡, 同埋熱拿亞作客拉素嘅賽事不是同時間進行。
國米 對 祖雲達斯
(1:0)
因為星期六晚去左飲宴, 冇力氣凌晨起身, 所以諗住睇重播算數....點知, 晚上去洗手間時, 剛遇啱係下半場準備上演喎....咁就睇左下半場直播喇。
原來上半場好早時段, 泰亞高已經傷出....
...據稱要休息至少一個月添....祖記傷兵魔咒延續, 好慘....今勻應該可以有基奧雲高多蒲頭喇卦.....
以我只睇下半場嘅感覺, 隊長表現好似一般 (可能因受制於對手嘅嚴密看管)。
右面位阿叔 (伊巴), 雖則腳法好, 但人品球品就幾討厭下...
竟然比佢符符碌碌入左波喎, 祖記輸得幾唔抵。
拉素 對 熱拿亞 
(1:1)
講唔抵, 熱拿亞今場打和只攞得1分重唔抵。
雖然坐到 "山卡拉" 咁遠, 都無損熱拿亞球迷支持球隊嘅熱情。
呢場波, 熱拿亞絕對踢得好過拉素, 可借首先在39分鐘時 米列圖嘅入球竟然被旁證誤判越位, 個旁證極之離晒譜, 水準太低!! 上半場 0:0完。
下半場, 球證應該諗住送番個大禮比熱拿亞, 史古利在對方禁區內搏得個12碼, 米列圖操刀, 不過暫列神射手第一位嘅大米唔知仲乜鬼, 將個波射鬼左上太空!!!
等到69分鐘, 辛勤終於得到回報, PALLA將波帶到底線, 傳送比左邊近門嘅莫達, 左攪右攪一番, 仲可以出番個波比喺中間嘅大米, 大米即時抽個波入網。
可借熱拿亞守唔到優勢到完場, 反而在80分鐘, 熱拿亞門將魯賓奴犯錯誤, 接唔實拉素球員達寶 (Dabo)射嘅遠射波。有乜理由佢會想抱住個波得ga?? D隊友真係多得佢唔少! 3分變1分! 如果唔係球隊就可以作客開齋嬴波啦。
30號星期日, 第14輪意甲, 將有:
祖記主場對里賈納; 熱拿亞主場對博洛尼亞。里賈納同埋博洛尼亞都處於護級位置 (里賈納只得11分, 排緊尾三; 而博洛尼亞仲衰, 13戰後都係只得9分, 排緊尾二)。 為護級, 兩隊一定勁搏, 但好彩祖記 & 熱拿亞都將會主場出擊, 取勝更有信心。
希望唔該唔好兩場比賽同時進行呀.....
除左英文, 唔知各位有冇學過任何外語?
如果你學過, 咁某間機構嗰句經典說話: 三個月學會外語" ~ 你一定唔信有可能!! 莫講三個月, 想三年學會外語都難。何謂學會先?
我以前學過西班牙文, 學過日文。但係絕對失敗, 原因同冇興趣有極大關係。當年本來一心想學意大利文, 但香港冇乜地方有得學, 加上勁貴。諗住西班牙文同意大利文最接近, 而且好多地方有得學西班牙文, 既方便又便宜, 於是就學西班牙文, 以 "了解" 意大利文!!! 第一次被拉丁系語文極之繁複嘅文法攪到我亂晒寵, 我完全不能想像到一種語言可以有超過十種 tenses, 而每種 tense (例如現在式)裡, 一個動詞可以有6種變法! 對中文人來講, 簡直係發神經! 我唔知點解當時錢多得滯, 唔温書又唔明, 都讀左兩年, 真係浪費 $又浪費時間。
至於學日文, 其實本人係毫無興趣可言。我唔鐘意日本同日本文化 (不過不是仇視)。我諗起三年零八個月, 黑太陽731呢類事件, 嗰D平時少見嘅民族性就會無啦啦走出來......。 學曰文完全因為工作需要, 當然我唔需要流利日語, 最緊要識睇識讀嗰D乜鬼平假名 & 片假名字母就可以。 當初諗住求其讀個 工聯會日語初階就算鬼數, 但因為個阿Sir 教得勁好, 佢上堂又攪笑, 就讀下讀下....連曰語能力試4級 (最低1級)都考鬼埋, 仲竟然合格喎!!! 之不過......, 由於冇興趣緣故, 就停左....依家, 我大概淨係記得D平假名 & 片假名嘅發音, 連星期一至星期日點叫都唔記得晒, 大部分送番比個阿Sir 囉。
講開日本, 有件我經常想起都會唔開心嘅事。話說上年, 我喺羅馬讀意大利文時, 認識左一位日本女仔, 個女仔好乖好好人, 會留在羅馬讀意大利6個月。有一日, 我地放學後約埋一齊食lunch, 然後諗住一齊去台伯河區遊覽。
我地去到一個地方, 覺得好頸渴, 於是就走入一間舖頭買野飲。舖頭裡個阿叔見到我地兩個, 就開始吹水。佢一問就係嗰D "Where are you from?"呢亭問題。答完之後, 個阿叔向住個日本女仔, 舉起手指公話, "Japan, it's Number one."...個茂里只係讚日本。我內心當時真係好唔開心。首先, 點解日本係 number one先? 佢D科技係勁, 但係先係靠抄人起家! 第二, 點勁呀? 唔通阿叔講緊, 日本天皇同希特拉 & 阿叔國家嘅墨索里尼發動二次大戰勁呀??? 日本侵華, 好彩美國在廣島投下2件原子彈。 難為D日本人每年紀念廣島原子彈事件時, 講到自己幾慘, 我地亞洲D人仲慘呀!! 我地D阿爺阿嘛年代嘅人最慘最可憐最無估呀。有幾多慰安婦?? 有幾多人仲揸緊D換唔番錢嘅日本軍票?? 難為有好多不知所謂嘅日本官想盡辦法要篡改歷史教料書, 企圖瞞騙佢地D下一代。
仲有....仲有當然係班不知所謂, 成日整假野 (雞蛋都話假), 又毒奶, 又人蛇....中國人嘅形象真係極差....有乜人可以好似某D中國人, 連自己國家嘅人都咁害法??? 為錢而不擇手段, 令人悲哀...
講講下又離晒題添......以上歷史方面嘅野, 有錯請指正。
實在好手痕, 所以想寫下blog添...
因為工作關係, 久唔久要同非廣東話人聯絡, 而共同語言就係英文。有時覺得有D外國人嘅英文口音好難搞 (先事強調本人都只不過係用Chinglish ~ 中式英文用語嘅人
)。
上星期四我要打電話去澳洲悉尼, 揾一位仁兄。我地同佢多數 e-mail 聯絡, 但見佢唔覆, 要打電話揾佢。澳洲人普遍好友善, 但佢地嘅澳洲式英文, 有時真係考起我!
今次呢位澳洲人話我地想知資料嘅嗰單deal, 佢唔係負責人, 叫我揾紐西蘭嘅 xxxxx, 呢位xxxxx, 我以前未contact 過, 所以佢話我知姓名 & 電話號碼。 我聽到佢讀xxxxx嘅姓氏係 "what", 當然冇人會姓 "what", 我就問, 佢嘅姓係咪 "Watt" (當時串個字比佢聽), 點知澳洲人話, "Oh no no, the same as the colour white"! 呢個澳洲人竟然將個 "White"字讀成 "Watt"音!!! 咁騎呢嘅, 估一世我都唔會估得啱..... 
講開紐西蘭, 我試過一次有趣經驗。話說以前同個好友去紐西蘭玩。去到一個叫 Queenstown (皇后城) 嘅地方。此處除左係 bumgy jump嘅發源地, 亦有一樣好刺激嘅玩意, 叫 "Shotover Jet" (係十幾人坐架快艇, 有專人揸住架快艇, 在條布滿石頭, 左右兩邊係懸崖嘅河上係咁 "片", 好刺激的)。在坐van仔去呢條河嘅時間裡, 位導遊姐姐 (紐西蘭人)介紹佢地個著名玩意時, 不斷將 "Shotover Jet" 讀 "Shotover Jit"....連之後車上個電視播嘅錄影帶 (關於呢個"片"快艇之旅) 嘅旁述, 都不斷將個 "Jet" 字, 讀成 "Jit"音, 我同個朋友忍唔住笑左出來, jit, jit聲, 個讀音真係好鬼 "un" 耳
..... 但我查過字典, 個 "jet"字何解會被佢地讀成 "jit" 咁得意??? 定係我地見識少, 唔知個 "Jet"字有幾個讀音的??
又由於工作關係, 我經常有機會要打電話去東京。大投資銀行, 接線嘅好多時都係女士。 日本人 (尤其女士)真係好有禮貌, 不過好多英文係有限公司。 我試過起碼3次以上, 打電話去唔同公司, 有同一種經驗: 當對方用日文在電話打完招呼後, 聽到我用英文查詢, 即時不知所措, 如臨大敵, 對方電話筒那邊突然靜晒喎, 我以為佢hold住條線, 幫我揾緊答案; 但如事者, 等呀等, 條線 cut 左喎! 原來對方應該驚到一早收鬼左線!!! 咁大間公司, 想唔到唔識答人野唔係傳比識答嘅人, 竟然係 cut 人線。
但, 本宇宙最考起本人嘅肯定係印度人嘅英文!!! 真係難聽到冇人有。以前讀中學時試過有兩年係印度老師教英文同做班主任。印度人英文程度極高, 好過我地好多香港人多多聲, 唯獨D音我覺得聽得非常辛苦, 我諗我 listening有問題, 或者要驗耳...... 之後, 依家份工都試過要打電話去 Bombay (之類).... 成段對話, 簡直叫救命, 我不知幾想問佢有冇 e-mail。
提起呢位印度老師, 我記得當年佢改完我地一次英文作文後, 派番D簿比我地, 講我地嘅錯處....最最最深刻係佢話: 有冇攪錯, 你地竟然仲有人會寫 "flower shop"!!! 係 florist, 記住佢!
講開英文, 我上司 (英文人)好耐之前提過, 佢話成日在香港聽人講company chop呢個字......但應該係稱company stamp (公司印章), 佢地冇人叫 company chop的。
讀一種語言, 真係好多學問呢.........
突然記起一件一定要提嘅事 ~ 話說前兩日在醫院時, 親眼親耳見住一位年輕嘅護士, 同一位外籍 (可能係南亞人)女士講野, 內容大意係叫病人落去某層樓等某D報告.....私家醫院, 讀過書嘅那個護士, 用我覺得非常有問題嘅態度同無禮嘅英文話, "You go down to the xxx floor. Now. Quick, yes, now, go down....... (+ 不耐煩表情)", 諸如此類.... 好核突!!! 你估依家命令你個仔做野呀??? 加個 "please" "can you"唔通好辛苦?? 唔知呢亭人見到洋人態度唔會唔即刻唔同晒??!!!
由於星期六 (16號)下午, 都靈奧林匹克球場將被用作舉行意大利對阿根庭嘅欖球賽, 因此, 祖雲達斯 vs 熱拿亞嘅意甲賽事要提早在今晚 (星期四)進行。
星期五凌晨 3:30am NOW 633
聯賽榜第6 (祖記) 對 第7 (熱拿亞) ~ 對雙方球隊來講, 今場比賽非常重要。如果祖記嬴波的話, 可以延續聯賽連勝紀錄至5場, 可再增添士氣; 排名仲會即時大升 (因為只有佢地兩隊提早比賽), 可以暫時有幾日, 同國米並列聯賽榜。 至於對熱拿亞來講, 如果能夠在都靈奧林匹克球場嬴波, 意義更加重大 (嬴倒傳統勁旅祖記喎), 熱拿亞今季仍未曾作客嬴波, 作客成績勁差, 同主場表現相差好遠。
祖記中場保臣 & 馬治施奧傷癒復出; 還有施素高竟然可以逃過秋後算帳 (太好運), 人腳上多左人可被雲帥調動, 乃一件好事。
至於熱拿亞嘅 "大米", 佢阿根庭國家隊領隊馬納當拿, 近日亦話會考慮召 "大米"入國家隊, 咁今趟 "大米"就更加全力以赴喇。
隊長廸比亞路被問到祖雲達斯 vs 熱拿亞呢場比賽時, 佢話:
Finally, on Thursday night's match against Genoa, Pinturicchio said: "They say too much praise can hurt, we have received a lot of it the last few days. Thursday against Genoa we will see what effect it has had on us, we'll have to be careful because we are facing one of the most in-form teams."
至於今屆被借去熱拿亞嘅 PALLA, 將會首度倒戈相向, 在奧林匹克球場面對舊球會 & 舊隊友, 今趟仲著住件10號波衫添。可借PALLA在聯賽暫時只得1個入球 (助攻反而有好幾個)。
被熱拿亞官網訪問時, PALLA透露:
"It will not be a match like the others for me," he admitted, "it would be hypocritical to say the contrary. But, although I don't need to say this, I only think about Genoa, where I am doing great. We should not fear anyone or anything, we will enter the pitch with the same mentality as always. We'll have to wait and strike at the right moment, we cannot make mistakes."
"Juve are going through a great moment of form, look at [captain Alessandro] Del Piero: he's infallible on free kicks, a true captain, with whom I have a very good relationship, we frequently talk on the phone.
"Juve's strength is mainly in the old guard, for youngsters it's not easy to come through," Palladino concluded.
個人最希望PALLA在呢場比賽可以入番1、2粒, 但祖記就嬴波
!
之但係祖記防守一向 "洒家", 而且今場仲係主場出擊, PALLA要入波並非易事呢。且看呢場比賽鹿死誰手啦!!!
明早我要入廠修理.... 我對眼因為視網膜薄左, 要造修補手術。都有D驚驚地, 事關一次過做晒一對眼。有朋友告之, 話手術好簡單, 但話晒在對眼做激光, 有D擔心.... 應該冇乜危險卦.... 我只知唔盡快做就好危險, 因為如果視網膜穿左, 怎至脫落就弊傢伙, 所以做修補手術係要。 話時話, 視網膜薄左原來幾常見, 但唔去眼科醫生度驗眼就未必發現的。
