食食食 - 澳門美食 - 2010

講左在澳門食過嘅葡國菜之後, 諗諗下, 都應該講講我地食過嘅港式美食先得架 !!

澳門嘅港式野食都幾好味喎, 不過好似價錢都唔平, 直頭係香港式水準, 香港式價錢呀!! 

我朋友在第一晚放工後從香港搭船到達時, 我已經自己一個人享用左一餐正正嘅葡國菜, 她到達時其餘好多舖頭已經關門, 所以就與朋友到我們住嘅酒店附近, 搵野食。原來酒店附近行一陣就到十月初五街, 那裡都有唔少野食呀。

朋友話之前去過呢間 (牛記), 食過佢地嘅咖哩野食, 話好味要再食, 於是我地就入左去喇。朋友叫碗麵, 同埋個野飲。佢話個麵幾正, 但真係辣到神經!

 

本來我想去隔離個大排檔外賣碗權記骨粥, 但真係太飽食唔落, 費是浪費。但就行前去另一大排檔 《勤記甜品》食佢地出名嘅麻蓉湯丸 (HK$1/粒), d湯丸又真係幾好味喎, 下次來都要再食過呀。

 

第二朝早, 因為我個朋友身體唔舒服想瞓耐d, 於是我就一個人, 拿住本旅遊書推介, 走去附近一間有幾10年歷史嘅舊式茶餐廳食早餐。叫左個鹹餐, 其實都係平時常會食到嘅早餐東西, 不過加多d懷舊感啦, 哈哈哈!!

 

去澳門食好野, 我冇忘記出名嘅 — 官也街!!  去食沛記嘅合桃蛋糕。之前睇網上邊d人講到幾咁好吃, 但唔知我係咪唔識食呢, 我又唔覺得d合桃蛋糕有乜咁特別喎, 唔係話特別香, 又唔係特別鬆軟啫。但呢間舖的確超多人幫襯, d人來買合桃蛋糕, 係幾打幾打咁買架, 好嚇人! 

 

再跟著就試天娜嘅出名蛋蛋布甸 & 木康布甸, 但真係唔好意思講句, 係幾好味, 但個人覺得好似冇網上嘅人講得咁厲害。同埋, 點解佢地整布甸整到咁實嘅??????? 

 

仲有就係莫義記嘅椰汁大菜榚。

 

當以為被官也街嘅甜品攪到好失望之際, 卻因為黃枝記嘅一碗艇仔粥, 令我又再度精神振奮, 哈哈哈!! 在香港我反而未去過黃枝記食野。呢碗粥煮得好棉好滑, 用料十足, 同埋侍應們好有禮貌, 個人十分欣賞。下次返去澳門要再幫襯佢地以示支持。

 

都係食得太少好東西, 嘻嘻, 下次再去澳門時, 要再食勁d先得!!! 

 

睇睇睇 — 水舞間 — 2010

今次去澳門嘅最大目的, 係因為一位好朋友送我《水舞間》(The House of Dancing Water) 嘅免費入場票! 咁發達當然一定要去啦。真係人出豉油我出雞, 張飛只係$380, 但我就要搭船同埋租酒店住, 不過冇所謂, 一飛難求嘛!

《水舞間》在氹仔新濠天地 (City of Dreams) 嘅一個場館舉行。與朋友特地在 5pm開show前, 預早去睇另一個表演, 叫做《龍騰》(Dragon's Treasure)。《龍騰》係免費show, 半小時做一場, 每場為時大約20分鐘, 但要先到《龍騰》嘅表演起地外票務處先取門票。好彩問一問, 先知原來持有當日睇《水舞間》嘅票, 可以優先取票睇《龍騰》, 正!

 

《龍騰》個show幾好睇呀, 不過就要企係度, 久不久抬高頭, 久不久又掂轉頭睇, 所以條頸有d倦呀。

睇完《龍騰》, 時間啱啱好, 行過去另一場館 (都在新濠天地商場入邊的), 準備入場睇《水舞間》。今場全場爆滿 (查實係每場都爆), 同埋之前聽講有極好口啤, 所以對呢個show有好大期待呀。

坐第一行感覺真係好得意 - 除左前面冇人阻擋視線之外, 久不久仲有舞蹈藝員會行到你面前, 做d古靈精怪嘅表情, 我地附近仲有位外國觀眾, 仲被一位舞蹈員整古, 攞左佢大脾上面塊毛巾抹頭, 哈哈哈!!!  坐頭幾行會有毛巾供應用來遮住對大脾, 但我地坐第一行, 其實應該要多一塊毛巾遮頭添, 因為有一 round, 係會持續被水淋成幾十秒呀 (雖然唔係好大水量, 但個頭一定會濕晒)。

 

 

整體而言, 個show係勁好睇呀!  我會再去睇的, 不過就唔會咁快即刻再睇, 等一排先都唔遲呢。

 

 The House of Dancing Water (水舞間)嘅official website: http://thehouseofdancingwater.com/en/#/home

食食食 - 葡萄牙菜 - 2010

去澳門去上癮添....哈哈哈, 又剛剛去完澳門回來。今次去, 主要因為有位好朋友, 送我免費《水舞間》嘅表演門票, 而票要在10月尾前用左佢, 所以來個悠閑的澳門之旅。未講《水舞間》呢個表演之前, 先講講食先啦 (本人最大嗜好是也)。

本來想去到餐餐食葡餐, 但冇乜可能, 是關一齊去嘅朋友都唔會採我啦,  而且我都冇理由咁自私叫人地餐餐陪我食我想食嘅野的, 都要食下澳門好食嘅中餐的!!  雖然不能餐餐葡菜,  但都有機會試左幾間 "傳說中" 煮得一手好葡菜嘅葡菜餐廳。

在澳門食葡菜, 除左選擇多之外, 仲比較便宜。

 

第一晚自己一個人去左呢間據講去澳門一定要去試嘅葡菜餐廳....唔知點解自己去過澳門無數咁多次都係第一次去... 我無book枱, 諗住唔會有位, 到達碼頭後就打個電話去餐廳試試, 點知佢話大把位, 叫我快d喎, 太神奇喇, 事關所有人都話呢間餐廳如果你唔先book位, 諗住walk in的話, 搵到位的機會係近乎0%的!!  我諗我咁好彩嘅最大原因係因為超級颱風嚇到好多人cancel booking, 我先可以乘虛而入, !!

呢餐簡直係好食到不得了, 而且侍應們看似好cool好惡, 但原來非常友善。呢餐我食左: 豬仔飽 (好鬆好軟熟), Caldo verde湯 (好好味嘅青菜湯), 葡萄牙乾肉腸 (少少肥, 亦都頗咸, 但一般葡國腸都係如此, 預左), 蓉蒜+ olive oil 炒蜆, 再來一枝 Super Bock啤酒 (葡萄牙牌子).... 實在要再講, 好正呀!  呢間嘅真係好好吃呀!!!

 

第二晚我地睇完《水舞間》, 專誠搭的士去路環一間餐廳食葡國菜。今次呢間亦係網上食客們都推薦的, 而且餐廳大門上貼左好多外國旅遊書都推介嘅貼子。不過吃過之後就頗為失望, 是關某部份食物煮得好麻麻, 加上d侍應態度幾差, 所以我肯定唔會推介比朋友呀!

 

 

據網友講呢個caldo verde青菜湯好好味, 但係本人一吃就覺得與尋晚 A Lorcha嘅同一個湯差好遠, 冇乜味又唔香。右邊那個八爪魚沙律最難食!

 

雖然頭兩個菜令人失望, 但係下面兩碟菜又幾好味喎!!  個蒜蓉蝦, d蝦好爽呀, 而且真係煮得好濃蒜蓉味, 我地仲用d汁來送麵包食呢。第二張相嘅那個鴨飯, 仲好味呀!  雖然d鴨肉有些少"so"味, 但係就焗得好夠味, 一d都唔乾, 因為d鴨都幾出油 (不過唔算肥林林)。 我地食唔晒打包, 第二朝早叫酒店 reheat 番再食, 仲好味過之前一晚添呀, 哈哈哈!! 

 

餐廳轉角就係著名嘅安德魯葡燵店, 買左個葡燵食, 都幾好味, 但個人覺得, 同真正在葡萄牙里斯本 Belem那間葡燵發源舖食過嘅, 就不能相提並論了。

 

呢餐葡國菜, 我地只係食左兩個餸, 就係出名嘅葡國乳豬, 同埋葡國海鮮飯。個乳豬幾好食, 表皮好脆, 肉幾嫩。但個番茄湯做底嘅海鮮飯就好杰, 唔知會唔會係因為以番茄湯做底, 所以攪到個飯咁杰呢?