葡萄牙之旅 5 - 在里斯本四圍去 (3)

我希望可以盡快講埋有關里斯本嘅景點, 不過我相信講埋呢篇, 都仲要寫多一篇, 因為里斯本嘅景點好多 (仲要我係去唔晒), 我唔想草草了事, 但長長氣氣不斷寫又煩氣呢...哈哈哈

繼續里斯本之旅....

 

Sé Catedral - 里斯本嘅大教堂, 建於12世紀中。 我記得當日我在聖誕日下午去參觀, 雖然聖堂有開放, 但我在一樓欣賞緊聖堂著名嘅玫瑰玻璃時, 教堂負責人突然在樓下大叫一輪, 跟著, 佢就開放始關燈, 仲聽到鎖門聲!! 嚇到我地在樓上睇緊野嘅遊客即刻跑番落下面。我諗當日, 聖堂應該只開一陣就休息, 可能只係因為彌撒完畢開多陣等訪客睇下野咋!!

 

Castle of São Jorge (San George Castle) - 位處里斯本山上嘅城堡, 從呢處睇里斯本市中心好靚。

 

城堡內有好靚嘅瓷磚, 砌出當時打仗時嘅情景。

 

以下相片上半部嘅建築物, 就係城堡晚上嘅優美景色。呢張相係我在Elevador de Santa Justa電梯頂影嘅。

 

Elevador de Santa Justa - 1902年建成嘅呢座電梯, 最初係蒸氣運作; 直至1907年改為電力操作。電梯可以話係里斯本一個主要象徵之一。

如果有張1-day Lisbon Card, 就可以免費搭電梯上頂部睇盡里斯本全景。查實我覺得搭呢座電梯有少少搵笨, 因為旅程1分鐘左右, 但我在樓下就排隊排足40分鐘。而且根本可以行路都行到上呢座電梯嘅頂部, 只要你唔怕行下斜路就完全冇問題。

 

里斯本著名嘅28號電車, 穿梭行走於市中心大部分景點, 仍其如果地鐵去唔到嘅地方, 搭電車都可以到達得到。

 

Elevador da Bica - 呢架上山電車我個人高度推介!! 小小電車, 穿越 Bica小區, 途經民居住宅, 感覺很可愛地道。想搭呢架電車, 可以先去Chiado區行街, 呢區好多名牌同特色店, 慢慢行慢慢逛, 最後搭呢架電車落番山, 再沿路行去最近嘅地鐵站 Cais do Sodre,  搭番地鐵返市中心嘅Rossio或者Restauradores站。

 

Elevador da Glória - 聖誕節冇乜野好做, 又落雨, 所以就走去坐下呢架電車自我浪漫一番!  講真, 如果唔駛錢就不訪坐下, 否則可免, 呢條電車路線一D特別都冇。

 

唔知大家有冇聽過一種叫 Fado嘅音樂呢?  Fado (意謂命運或者宿命), 係一種憂鬱嘅歌種, 葡萄牙獨有。Fado特色係音樂同歌詞都好,悲慟, 通常與海或悲慘的人生有關。Amalia Rodrigues被葡萄牙人視為Fado女皇, 被受所有葡萄牙人所尊重同敬仰。

以下在市中心一個角落嘅塗鴉, 係葡萄牙朋友在我去葡萄牙旅行之前無意中發現, 我叫佢帶我去睇, 原來塗鴉就在我住嘅酒店附近, 據朋友所講, 塗鴉係新畫上去, 好新呀!!! 畫得有99%似Amalia真人, 塗鴉嘅人好厲害!!

另一張相, 係在市中心一架專賣Fado音樂嘅車。

 

Igreja do Carmo (Carmo Church) - 原建於14世紀末嘅Carmo聖堂及修道院, 不幸在1755年11月1日一場超強烈嘅地震中受到嚴重破壞。聖堂內部已經冇左上蓋, 內部有D殘缺, 不過都值得參觀, 可藉此懷念一下地震嘅巨大力量。

 

Cristo Rei and Ponte de 25 Abril (基督像及4月25日大橋) - 呢兩個景點地點好唔方便, 因為佢地位在市中心對面岸, 正常來講, 係要搭完船再搭巴士上呢個Cristo Rei參觀。

有點好笑, 係呢個建築都係抄人家的傑作! Cristo Rei係抄巴西里約熱內盧著名嘅Cristo de Redentor基督像; 至於Ponte de 25 Abril, 就係抄美國San Francisco嘅金門大橋。 

可惜係, 冬天嘅里斯本雖然比起其他歐洲各國都暖和得多, 但天氣不是太好, 經常落大雨或者黑天黑地, 直至準備離開時, 天氣先開始晴朗。激死人!!

 

下站繼續里斯本之旅....

穿梭葡萄牙之旅2009/10 - 待續

 

葡萄牙之旅 4 - 在里斯本四圍去 (2)

近日因為對眼唔係咁舒服, 所以寫呢個遊記都慢晒....

繼續我的開心葡萄牙之旅!!

在里斯本遊玩期間, 我參觀好多地方, 不過就係分日進行, 事關在我逗留期間, 有一些日子, 我去左里斯本附近一些小鎮作一日遊, 關於小鎮嘅遊記, 會在之後報道, 現在講番里斯本先。

Rossio Square係里斯本嘅重要landmark之一。Rossio本身有一個地鐵站, 周圍都係行街同食野嘅地方, 每日都熱鬧非常, 來到里斯本, 冇可能唔識同唔去Rossio Square。

從19世紀開始, 廣場地上鋪上灰色同白色嘅波浪形磚塊, 從此廣場被冠以 "Rolling Motion Square"

晚上嘅Rossio一樣美麗。

Rossio隔離就係Praça da Figueira (= Square of the Fig Tree), 廣場四周被四層高住宅圍住, 旁邊有呢個叫 King Joao I 嘅銅像。

Igreja de Sao Domingos (= Saint Domingos Church). 距離Rossio廣場不遠有呢座歷史悠久 (建於1292年) 嘅聖堂, 聖堂內部頗為黑暗, 而且感覺相當殘舊。原來聖堂飽經風霜, 先分別在1531及1755年被地震所破壞, 在1959年再受大火摧殘。聖堂免費參觀, 我仲去左呢度參與聖誕子夜彌撒。

Confeitaria Nacional係一間好有歷史嘅蛋糕店, 在2009年剛剛慶祝創店180年!  呢間店在聖誕前每日都有一大條長龍, 排隊買葡萄牙嘅傳統聖誕麵包 Bolo Rei。相中大家都應該見到店外有一條大長龍。今次冇時間, 下次一定要上去佢地一樓, 坐低食個飽, 飲杯咖啡先得。哈哈!

位處Rossio嘅Nicola, 在里斯本很出名, 我都慕名去食左餐午飯 (Bacalhau a Nicola Style - 我在葡萄牙第一餐食嘅馬介休), 坐出面原來係最貴。

或許以下景點唔係一般旅客去里斯本嘅目的....引水道 (Aqueduct)。 自從我知道里斯本有一座引水道之後, 我就搵盡方法, 要查出點樣可以搭車去得到。

呢座在里斯本近郊嘅引水道, 叫做 Aqueduto das Águas Livres, 在1755年大地震前10年興建完畢, 並且冇被地震破壞。此引水道共有35個拱門, 誇越差不多1公里 (1km)。

以下呢個景點係我在聖誕節那日去參觀的, 因為當日大部分景點都關門大吉, 所以我就諗不如去一些唔需要入場嘅地方睇下野。

Casa dos Bicos建於大約1523年, 位於里斯本Alfama區。 1755年大地震中, Casa dos Bicos雖然都有破壞, 但並無倒塌。

下站繼續里斯本之旅....

穿梭葡萄牙之旅2009/10 - 待續

葡萄牙之旅 3 - 在里斯本四圍去 (1)

里斯本 (Lisbon) 係我在葡萄牙南部的跟據地, 由里斯本, 可以坐巴士去附近不同小鎮作一日遊。

葡萄牙面積唔算好大, 對大部分香港人來講, 呢個國家係冷門旅遊之地, 好多人去埋葡萄牙玩, 只因佢地理上連接西班牙, 所以好多人去西班牙時, 就 "順便"去埋葡萄牙, 但卻只逗留一、兩日, 仲要只去下里斯本就算!   我個人非常喜歡葡萄牙, 我想大力sell下呢個國家, 唔好淨係去一、兩日, 起碼去一個禮拜啦!  當然我明白時間金錢係考慮因素, 但我個人就比較喜歡仔細一D欣賞一個國家, 深入去食多D佢地嘅野, 睇佢地嘅野。

因為個人喜歡葡萄牙, 我今次係用兩個幾星期獨玩葡萄牙, 仍然都唔夠時間, 所以我絕對唔贊成葡西一齊玩, 除非打算去呢兩個國家玩一個月或者以上 (只係我個人意見)。

Source: http://www.lonelyplanet.com/maps/europe/portugal/

 

里斯本係葡萄牙首都兼全國最大城市, 佢地嘅旗幟係以黑白色為主 (又再度令我想起我嘅愛隊祖雲達斯Juventus添... haha), 所以...好有歸屬感呀!!  呢個城市係歐洲大陸最西嘅首都, 面向大西洋。

 

I found the picture below super beautiful, and therefore I wanna include it in my entry here. The picture shows all the major and beautiful scenery of Lisbon.  I thought I have more or less seen those places... only briefly though, haha.

Source: http://en.wikipedia.org/wiki/File:Lisbon_set_of_images.jpg

 

未去其他小鎮作一日遊之前, 我都唔會錯過機會, 盡我所能遊覽里斯本市內大大小小嘅景點。

我第一日到達里斯本, 係上午時份, 雖然經過差唔多15個鐘頭嘅飛行旅程, 但好彩唔覺好倦, 所以把握時間食左野就周圍行。

第一個去處係: Campo Pequeno。呢個地方其實係一個鬥牛場, 不過呢間鬥牛場嘅鬥牛表演通常係在每年五月至九月舉行, 所以我今次只在場外影下相, 並未有機會入場觀看鬥牛表演。

據講葡萄牙式鬥牛表演與西班牙嘅形式有好大唔同, 其中一個最大分別在於: 葡萄牙人唔會在鬥牛場內刺殺隻鬥牛嘅。但因為我從來都未睇過鬥牛, 所以唔敢亂講扮代表。有興趣了解多D的話, 可以看看呢個網址, 會有更準確介紹:

葡萄牙式鬥牛http://en.wikipedia.org/wiki/Portuguese-style_bullfighting

又或者睇睇呢個在里斯本舉行嘅鬥牛表演片段吖!! 

 

 

Parque das Nações (=Nations Park), 中文版關於葡萄牙嘅旅遊書, 我機乎冇見過介紹呢個地方, 但如果睇英文旅遊書, 就一定唔會冇講。 Nations Park係集休閒、旅遊、商業同住宅於一身嘅社區, 位於里斯本市西面, 地鐵站Oriente一出就搵到。

呢個雖然叫做公園, 不過功能絕對大於普通一個公園!!  .  Nations Park原址係1998世博地點,

 

Nations Park有cable car坐, 可以悠閑地從高由頭到尾看盡成個區。雖然冬天嘅葡萄牙天氣在歐洲各國之中叫做和暖, 但變化認真大, 唔講得少!  呢頭落雨落到暈, 但隔左一、兩個鐘, 又變成藍天白雲, 好神奇的! 

我係買左Nations Park嘅套票, (18 euro/person), 當中包括乘坐來回兩程cable cars, 個人覺得幾化算。

 

下圖見到個巨型建築, 叫  Atlantic Pavilion Concert Hall, 好多大型演唱會都在此舉行。

 

Oceanarium - 呢個水族館好大, 係全世界第二大水族館!!  裡面有好多巨魚睇, 令我大開眼界!  如果係買套票的話, 就可以免費入場。

 

公園內有好幾多呢種 volcanoes, 你見依家好似冇野發生, 但等5分鐘左右, 佢就開始準備大爆發, 我都錄左個過程, 好得意的。

 

 

呢個公園對面有個好大嘅shopping mall, 叫做 Vasco da Gama, 我未行晒, 下次去時再行耐D先得。

 

穿梭葡萄牙之旅 2009/10 - 待續