香港大小縮影 - 2

近來因為補習, 忙到痴線; 查實最忙嘅日子仲未完結, 因為來緊兩個星期先係小學考試高潮, 到時就真係10級忙碌。

可能大家覺得, 補習啫, 點解忙得咁緊要呢?  其實係因為D家長知道就快考試, 所以就 ~~ 谷盡佢!  加堂加堂再加堂, 我根本邊有咁多時間比佢突然加堂加鐘啫?  盡人事啦, 多錢一個鐘嘅學生當然會優先 (我都要搵食架)。同埋我要不斷集合唔同街外練習出題目比佢地做, 淨係打出來都用好多時間。

上次  香港大小縮影 篇文章講左D關於依家某些香港人同學生家長嘅奇怪野, 今次都想再講多少少。

 

事件一:

唔知各位記唔記得我上次講有個學生, 第一次去到佢屋企補習, 佢帶左mask, 佢屋企人又唔開風扇, 連水都唔比杯來飲呢 (但佢阿媽就在我面前比左杯水佢個女飲囉!)?  呢位阿太, 我剛剛過去的星期六 & 日連續兩日朝早 (9:30-11:30am去佢屋企補習。之前一晚 (星期五), 我同班friends在灣仔食緊飯時, 佢打來, 問我可唔可以帶 mask上堂.... 唔通我話唔可以咩?  但我上到佢地屋企真係想叫救命, 連風扇都唔開, 又係水都唔比人飲..... 講真, 我真係想熱到想殺人!  我細細聲問補習妹妹可唔可以開風扇, 佢竟然話: 吓, 但我好凍喎!!!  ... 好彩我唔係世上第一個死於戴 mask!!!

吹佢唔脹, 大熱天時話好凍, 就算考完試佢summer繼續補, 我都應該唔會補: 第一, 佢出手超低, 我唔係初頭冇工, 都唔會接; 我好怕熱, 夏天佢地唔開風扇我驚會死喺佢地屋企, 因為佢地個廳冇窗!  最重要係, 我覺得呢家人個阿媽有嚴重潔癖, 我頂唔順呢種神經質嘅奇人!!   

除左家奇怪家庭外, 大致上D補習家庭都冇乜痴線野.....

查實補習以來, 都有好唔開心嘅時候, 不過真係一言難盡.... 而且D心情有時都會變得好差....試過返到屋企冇心情食飯, 連電話都唔想聽; 亦試過朋友嘅SMS又唔回, 攪到前兩日有個friend, 打電話來問我: "Anita, 你冇野呀嘩?  我見你連SMS都唔覆, 平時你一定會show up喎"。 好耐冇見又唔知我冇野做嘅朋友, 我更加唔想浦頭, 因為我真係冇興趣重複又重複講番點解會咁呢種野....

 

事件二:

我有一位在 international school讀書嘅P.1學生, 佢做功課嘅速度真係呢個世紀最慢!  international school已經冇乜功課架啦, 兩樣功課可以做足大半粒鐘!  又要每日上網睇兩篇 中文文章, 所以我每日在一個鐘裡講得最多嘅係: 妹妹, 快D啦"

由於佢仍然慢到飛起, 我成日都要遲走, 好彩佢係我一日中最後一個學生, 本來補佢補到7:30pm, 但成鬼日攪到我 7:45pm或成8pm先走得!  激死人!!   

終於我想到一個方法: 送貼子!  呢種方法對付某些學生好有效。雖然要花D錢同時間買貼子, 但我寧願咁做, tum佢快脆攪掂晒D功課, 我都唔駛咁鬼勞氣。

 

果然小妹妹對我D貼子異常興奮 !!  我D貼子一D都唔平, 但因為收佢補習嘅價錢都唔差, 咁送番D野 tum佢開心都不為過。 自從上個星期開始左送貼子呢樣行動後, 佢做功課真係認真又快左幾十倍有多!!  仲有係, 佢話我D貼子靚過其他補習老師嘅貼子, 咁緊係啦, 我D貼子好鬼貴下架!!!!  另有一樣野, 妹妹話: "Miss Wong, 我依家冇攪頭髮, 冇咬手指喇"!!  因為我第一日補習見佢做呢種唔好習慣, 成日叫佢即刻停, 唔准做!!  我都唔發覺佢原來已經冇做, 係佢講我先發覺....

見到佢依家快左做功課, 又冇左唔好習慣, 都覺得叫成功左啦, hahahaa!!  同埋佢仲叫佢阿媽買貼子, 佢送番貼子比我喎!!!

 

事件三:

之前講過有個學生, 叫佢做練習又話要去大解, 攞本練習入 toilet抄答案....

話說我前幾日印左D練習比佢做, 在頁紙最下面, 我印有:

By: Miss Wong

咁佢就係咁笑, 話, "乜野係 By Miss Wong呀", 我話: 因為呢份野係我打出來嘅, 我咪寫 By Miss Wong囉。

點知佢竟然寫左D野在 By: Miss Wong 後面喎......is a good teacher!

哈哈哈, 當時我都幾開心架.....

呢個學生我平時乜禮物貼子都唔送的, 我冇利益收買過佢的。