近排由於工作關係, upldate個葡萄牙旅程嘅進度又慢左少少, 雖然如此, 我對個旅程嘅記憶仲好深的, 嘻嘻!! 
去到里斯本, 斷斷唔能夠唔去 Belém (貝倫區)。 Belem區擁有建築華麗嘅 Jerónimos修道院 (Mosteiro dos Jerónimos), 發現者紀念碑 (Padrão dos Descobrimentos), 貝倫塔 (Belém Tower), 國家馬車博物館 (Museu Nacional dos Coches), 仲有超級好味, 我食左好多個嘅正宗葡撻 (pastéis de nata)!!! Belem區真係值得一去 - 再去 - 再去!!! 依家一齊去Belém喇 !!! 
我在除夕日去左一日Belém, 但都幾趕, 因為呢個區有四個重點要睇嘅景點, 加上仲要去埋食葡撻, 超級忙碌! 所以....我在1月1日又搭電車去左一次Belém。下次如果再去里斯本, 我都一定會再去Belém的! 
Jerónimos修道院 (Mosteiro dos Jerónimos) - 被UNESCO列為世界文化遺產嘅修道院非常巨大, 簡直壯觀! 就算分開兩張影, 都唔係好影得晒修道院嘅全景。
修道院係葡萄牙皇帝Manuel I (1515-1521) 在位時, 為慶祝達伽瑪 (Vasco da Gama)從印度發現航海路線凱旋而歸, 而在1502年時下令建造, 歷時50年才建築完畢。 當年葡萄牙因為航海大發現而急速富起來, 要建造雄偉壯觀嘅Jerónimos修道院, 經費完全不成問題呢!!
修道院裏嘅中庭, 四周被上等石灰岩打造嘅迴廊所包圍。兩層高嘅迴廊, 全部都有著超高技藝嘅雕刻, 睇到我嘩嘩聲, 靚得緊要!!
修道院裏嘅教堂, 建築亦都一樣咁宏偉!! 
發現者紀念碑 (Padrão dos Descobrimentos) - 見證葡萄牙過去光輝航海歷史嘅, 一定唔可以唔講呢個紀念碑。此紀念碑靠近Tagus河邊, 當年大航海時代, 葡國嘅船隻, 就係在此出發, 航向未知之地。紀念碑設計係一隻帆船, 上面載着嘅全都係葡國著名人物, 最前頭嘅係 Prince Henry (Henry the Nevigator)。 1394年出生於波圖嘅Prince Henry, 係King Joao嘅第三子。由於對航海嘅熱愛同埋對海洋探險嘅好奇, 佢支持籌組探險艦隊。艦隊成員先後發現多個群島, 包括直至現在仍然擁有嘅Madeira Islands (C朗家鄉)和Azores Islands。
貝倫塔 (Belém Tower) - 成座海上堡壘嘅貝倫塔, 慕名而來嘅旅客絡繹不絕。當日好彩我地早參觀, 因為當離開嘅時候, 外邊已經出現一條長人龍, 排隊等入內參觀。 印象最深係那條好窄嘅樓梯, 由於塔總共有六層, 要每層欣賞, 每人就要上上落落那條樓梯, 條樓梯又黑又窄, 仲要上下都有咁多人, 迫到神經。我地一路上去, 一路呻, 哈哈哈! 但呢個塔, 絕對值得參觀, 唔來過貝倫塔, 點算來過里斯本, 來過葡萄牙呀!!! 
國家馬車博物館 (Museu Nacional dos Coches) - 呢間博物館我本人好喜愛, 因為在此可以一次過見識晒所有葡萄牙皇族+貴族所用過嘅馬車。 部分馬車製造得超級華麗, 鑄有黃金, 雕有木刻, 簡直令我大開眼界。 另外據講其中一架馬車入面有埋坐厠, 但可惜, 我地睇來睇去, 都搵唔到呢架傳說中有馬桶嘅馬車添!!! 擺放展覽嘅馬車由16至19世紀, 製造自葡萄牙、意大利、法國、西班牙、奧地利, 以至英國。
Pastéis de Belém - pastéis de nata係葡撻嘅葡萄牙名稱, 來到葡萄牙, 我一定要食番幾個葡撻先對得住自己。而最享譽嘅, 就要數Belem區嘅葡撻店Pastéis de Belém。普通葡撻只可以叫 pastéis de nata, 而能夠叫做Pastéis de Belém, 就只得呢間店嘅葡撻。我連續去左呢間店兩日, 第一日食左一個撻, 第二日去, 我一個人食左四個撻, 我當lunch咁食!!!! 當地人食法係葡撻加一杯葡萄牙espresso咖啡 (叫做 bica), 我都扮下野, 做個道地人先!! 哈哈哈!
唔好講笑, 佢地嘅葡撻真係好味到不能形容。個蛋心好甜但好好味, 而個皮就脆到不得了, 好多層嘅皮, 超級鬆脆, 簡直回味無窮!! 葡萄牙人喜愛在好多食物上加上肉桂粉 (cinnamon), 葡撻都唔例外, 我都在葡撻上灑上肉桂粉, 又真係幾好味喎, 大家下次不仿都照做睇睇效果如何。咁好味嘅葡撻, 唔怪得每日都有咁鬼多人幫襯啦!
店就在Jerónimos修道院行過少少, 好易搵!
下站繼續里斯本之旅 (最後的一集, 好快可以講第二個城市喇)....
穿梭葡萄牙之旅2009/10 - 待續
間修道院超靚，我諗我都唔願走！ 。。。
ReplyDelete如果可以比我坐一次南瓜車就好啦！好恨！好恨呀！
葡撻超高卡，你一次食四個，下午茶都可以慳番啦！不過一次半次，又真係好難忍口既。。。
[版主回覆03/04/2010 22:22:00]我又係, 都不知幾想坐上架馬車, 最好可以出埋去市中心走番個圈添, 哈哈!! 我食葡撻嘅時候, 完全冇想過卡路里嘅問題, 因為學你話頭, 我忍唔到口呀!!! 我食左四個葡撻後, 真係飽左成個下午.... , 但真係好回味, 我之後再食唔番一樣嘅感覺呀。
想同你講, 我訂妥晒 D內陸機票同酒店啦, 現在尚餘火車票同波飛, 同埋未計畫個行程, 算是進入直路了, 好緊張呀........
ReplyDelete[版主回覆03/04/2010 22:24:00]嘩, 恭喜晒, 起碼開左個頭了, 之後每步就知點繼續做, 咁你地決定波飛方面點搞未呢?
至於波飛, 我地諗住等佢地個球會網站有 online booking 至買, 其實都有些擔心會買唔到
ReplyDelete[版主回覆03/05/2010 00:25:00]唔記得係咪通常比賽前一個星期先online有波飛買添....不過唔緊要, 應該可以買到的, 希望你買到呀, 到時記住話我聽呀 . 你地總共去意大利幾多個地方呀
Ta: 明,我明你講咩...所以我而家決定應該choose international school... 另外.我入左afs既1st inter view,黎緊會2nd in! thanks for advise. 下次有事再向你稟報! YUKI
ReplyDelete[版主回覆03/05/2010 00:27:00]Yuki, 恭喜晒你呀!!! 嘩, 乜有咁多interviews的!! international school比較穩陣, 到時你就唔駛咁驚, 好呀!!! 努力努力, 祝你一齊順利, 記住有最新消息通知我呀!! 好替你開心呢!!
咁grand既灰白色修道院加埋d雕刻，身處現場一定好震撼。 原來你咁鍾意食葡撻既....我就好怕陣牛油味，鍾意食蛋撻多d
ReplyDelete[版主回覆03/05/2010 22:00:00]個修道院真係好靚, D雕刻好精細, 唔明D師傅手工點解厲害得咁緊要的, 佩服佩服!!
原來你怕牛油未架?? 蛋撻都好味, 但葡萄牙嘅葡撻真係好好味, 可能你食過都會改變想法的, 哈哈哈
我地會去都靈, 羅馬, 威尼斯, 米蘭 四個地方
ReplyDelete[版主回覆03/05/2010 22:03:00]行程好正喎, 留都靈幾多日呢?? 一除左睇祖記, 我個人推薦去Egyptian Museum同埋 Museum of Cinema, 仲有 La Mole...
多謝提供景點 , 我地會逗留都靈 3 日 , 暫時諗住會去 祖記的 club or museum 8 下 , 同埋會去睇 Holy Shroud
ReplyDelete[版主回覆03/06/2010 10:40:00]係喎, 記得你話要去祖記個club同museum睇下野 . 你地有興趣去睇 Holy Shroud, 好有意思呀, 我好少會聽到有香港旅客會有呢個興趣, 欣賞欣賞!!
唔來過貝倫塔, 點算來過里斯本 -> 咁我未去過, 即係話應該要列入to go list之上! 上次傻下傻下, 去到唔知點解冇行到過去貝倫塔!! 馬車博物館我都想去架, 但太趕la, 冇時間去! 其實... 淨係為左個葡撻都會再番belem啦~~ 佢個沙翁都好正架!! 我買左一個, 食唔落放到第二朝先食, 都仲好鬆化, 正!!
ReplyDelete[版主回覆03/07/2010 21:10:00]Iris唔緊要呀, 咁即係你有原因可以再去里斯本呀, 哈哈哈!! 我反而冇食到沙翁, 因為我食左咁多個蛋撻之後, 飽到神經...下次一定要聽你推介食埋沙翁先得
H i , 我有嘢想請教 , 如果我地到達米蘭後 , 想搭火車到都靈 , 火車類別有多少種類可選擇 , 是否最好係揀快車 , 火車飛在出發前在網上預訂還是到達後才購買 , 那一樣軗較好 , 可以給我們意見嗎 ? 謝謝 !
ReplyDelete[版主回覆03/14/2010 00:16:00]冇記錯我當時係坐eurostar, 快車到達....超方便。米蘭同都靈距離唔係太遠, 我諗唔搭快車都唔會搭太耐, 我當時搭快車好似個幾鐘就到都靈了, 好快呀。我當時係即刻買飛等一陣上火車, 因為係5月, D車又密, 所以冇問題, 如果你在網上預訂飛, 好似去到火車站要再在自動售票機再做D手續張飛先至算係生效, 但因為我全程都冇網上預訂過飛, 所以抱歉答唔到你添....不過我朋友應該記得點做, 我聽日見到佢問下佢先, 聽晚再詳細D答覆你
真係唔該晒你, thank you
ReplyDelete[版主回覆03/14/2010 20:57:00]唔駛客氣 !! 我今日問番同行朋友, 佢話我地米蘭去都靈係坐普通火車, 唔係快車, 但如之前所說, 都係好快去到。抱歉, 相信你要上意大利火車的網站 (tren initalia) check下, 事關我地兩個都唔記得左在網上預訂完火車飛後去到火車站點做添...sorry....
上次去到貝倫塔開心死我, 無乜人參觀之餘學生我記得係唔收入場費添呀. 唯一遺憾係當時我無入到修道院啊, 淨係出面影左張相!
ReplyDelete[版主回覆03/23/2010 21:36:00]咁你當時如果入埋去修道院駛唔駛入場費呀? 點解唔去埋參觀呀?
我上次同朋友一齊去, 朋友唔多想入, 所以咪無去囉. 真係可惜! 希望下次補返!
ReplyDelete[版主回覆03/31/2010 20:14:00]同朋友一齊去旅行, 有時又係有少少麻煩之處...你咁近, 隨時返去再參觀都得啦, 羨慕C我呀!!!
你好呀阿ta~~最近好嗎﹖~ 首先好多謝你之前既幫助，幫我問野呀....教我咁..... 因為家中有點事令我不能過澳洲了，突然諗到之前問過你咁多野，又當你是朋友，所以很想同你講一聲~^^~~不過唔緊要，雖然去不了，不過我會在香港學習呀 ^^~
ReplyDelete[版主回覆03/31/2010 20:19:00]Hello力高!!! 好開心又見到你呀!! 我呢排好鬼忙, 所以有好多日冇上來check, 又已經好耐未update我個葡萄牙之旅, 希望Easter有多D時間做番呢樣野先
oh, 去唔到...不過唔緊要, 年青可以有好多選擇, 暫時唔去住, 當依家賺多D錢先, 過一排再去都得呀!!
好多謝你當我係朋友呀 !! 我地繼續在blog交流傾下計吖!! 嘻嘻!!
Ta, 其實我真係好想知, 葡萄牙既正宗葡撻同澳門嗰 D 有冇分別架 ??
ReplyDelete[版主回覆03/31/2010 20:21:00]Ah dull, 返左黎喇?? 等陣過你那邊睇下先, 哈哈哈! 葡萄牙同澳門嘅葡撻有乜分別呀....?? 好難具體講, 係一種感覺....哈哈哈, 你幾時會去葡萄牙食真正葡撻去搵出個分別呢???
wow...我聽到你描述d葡撻，真係好想食呀!xdddd
ReplyDelete不過，個修道阮同museum都真係好靚呀...唔知d 雕刻有冇意思呢???
btw, o個架有馬桶的馬車真係好特別...我諗緊d人點用...xddd
[版主回覆03/31/2010 20:24:00]你依家提番起D葡撻, 我直頭想即刻飛去葡萄牙吃呀!!! 哈哈哈!!
里斯本嘅呢間修道院同其他景點都好值得去參觀, D雕刻有冇特別意思?? 唔......我都唔知呀, 哈哈! 你估一路坐緊馬車一路用個馬桶, 會有乜感覺呢???
TA, 我返咗嚟好耐啦~~
ReplyDelete不過..........我邊有咁快手吖~~ 我嗰邊梗係唔會咁快有嘢睇啦~~
我未去過葡萄牙架.......希望我都有機會去睇下同食下葡撻啦~~
[版主回覆03/31/2010 21:37:00]係呀, 我幾低能呢....原來你一早返左來喇, welcome back!!
你快D講下我地知蘇梅島有幾好玩呀, 如果唔係, 你就快又出發喇, 到時你講得邊度好呢....哈哈哈. 蘇梅島你咪日日都可以晒太陽囉?? 好正呀!! 我希望去呢!!
Hi, lisbon要行路很多嗎? 我老豆行路很差的, 走20分鐘便要休息, lisbon好像很多山路, 景點都有公車電車可到嗎? 一般要行路多嗎?
ReplyDelete[版主回覆04/08/2013 17:54:33]Hello Catherine. Lisbon的交通基本上很好, 有地鐵, 電車和古老電車, 但因為它山路多, 上上落落, 交通公具很難完全cover所有景點, 要有心理預備要走路, 但放心, 我們好多時也會行下停下。