相距上一篇有關我葡萄牙之旅嘅文章, 已經係好耐之前嘅事!! 呢排終於多番多少少時間, 決定要好好寫完呢個旅程嘅點滴先得, 唔想爛尾呀!! 
Tomar呢個城市, 應該對大部分香港人來講都好陌生, 除非閣下好似我咁鐘意 "娟窿娟那"去埋D唔係咁在葡萄牙以外出名嘅旅遊城市。
我唔知Tomar有冇中文譯名, 不過就算有, 我都唔會記得, 記住Tomar呢個名仲方便簡單呢
真係人都顛, 每日雖然有好幾班長途巴士會由里斯本開往Tomar, 但由於我想一日遊連踩兩城市 (早上Tomar, 下午到另一著名城市Fatima)關係, 我要搭早上7am開出嘅巴士!! 冬天嘅里斯本雖然唔係話凍得好交關, 但係加埋成日出現嘅大雨, 真係唔講得少! 最離奇係里斯本地鐵開6:30am, 但我住嘅hostel, 有點唔方便, 照道理係冇可能搭到呢班車。好彩我個當地朋友救我一命 (當中細節唔詳講喇, 就算多謝佢佢都唔知架啦, 哈哈哈), 總之最後趕到搭呢班車, 我嘅旅程因為有一個當地朋友而變得太順利太美好喇!!
順便講句, 我平常唔主張咁趕去旅行, 但葡萄牙小鎮一般半日遊真係已經足夠, 如果玩全日真係多左少少, 加上如果係冬天旅遊當地更加如此, 快天黑 (大約5-6pm), 店亦較早關門, 所以不如把握時間一日去多另一小鎮參觀。
左圖：Tomar巴士總站看來有點陳舊, 但裡面的職員很好, 比左個鎮地圖我, 又教我點行去鎮中心。
右圖: 從巴士總站遠看, 可以見到鎮上最高處嘅Templar Castle (Castelo dos Templarios)
由於去到Tomar都未到9點半, 早得太誇張
, 店舖根本一間都未開, 個小鎮靜到有蚊經過都聽得到, 鬼影都冇隻, 好間中有一、二個當地人行過, 佢地當我係怪獸咁睇呀!!! 緊係啦, 邊有遊客好似我咁顛, 咁鬼早到....加上今日係12月22日, 就快聖誕, 節目氣氛咁濃, 根本好多人開始放假, 都冇人會咁早行街咁痴線啦!
由巴士總站步行去小鎮中心嘅途中, 有間cafe有開, 即刻走入去買野食醫肚。不過全個牌都係寫葡萄牙文, D字又同意大利文唔多同, 我都唔知D野食係乜。店員又唔識英文, 我本來去去識個幾隻葡文字在此完全不能派上用途, 葡萄牙人真係好有耐性
, 我同佢地 (因為有其他食客加入想幫手拯救我
...哈哈哈), 但最後雞同鴨講一大輪, 大家都仍然唔知大家講乜囉!!! 真係笑爆!!
最後...佢地只係聽得明我講嘅 Chocolate一個字, 而野食...我係亂點一通, 我都唔知食左乜落肚!!!
普遍葡萄牙人嘅英文程度其實我覺得絕對比意大利同西班牙人好, 不過你不能期望在一個小鎮裡嘅一間小店都會有操流利英文嘅人, 所以, 冇所謂, 我enjoy!!!
靜到人都唔多隻嘅早上......Tomar鎮
夏天嘅Tomar假日非常熱鬧, 但可惜.....我在12月凍到鬼嘅時候去, 天氣唔穩定, 天色成日都差, 我當日去到本來都黑天黑地, 到我就來走時仲開始落起大雨添....
從Tomar main square旁邊有路, 沿著上, 經過一D石仔路 (落雨濕濕行記得要好小心, 我幾次差d滑低)。雖然都已經早上11點有多, 但沿途人都冇個, 其實我一個人行都有d驚, 一來驚行錯路唔知上左邊個山頭, 另外又驚有賊人突然撲出來! 好彩, 最後安全到達, 而且在Templar Castle (Castelo dos Templarios)內碰到一班台灣人, 大家仲傾左一陣計, 好開心呢!!
Castle內最出名係 Convento de Cristo (Christ Convent修道院), 修道院建於1162年, 雖然外牆已經頗為殘舊, 但建築真係好靚, 大大嘅柱, 闊闊嘅廊, 加上葡萄牙傳統嘅磚牆 (azulejos), 所以旅遊旺季時吸引好多遊客前來參觀 (今日例外啦, 哈哈)。
如果在天氣好嘅日子, 相信半日遊Tomar都會好趕, 但今日我來到, 店又遲開, 周圍人又唔多, 所以時間簡直多得滯.....臨離開修道院前發生左一段小插曲, 話說因為修道院個個地方都差唔多, 我在裡面迷路!! 攪左成15分鐘先出番大門 (仲要原來入口同出口係唔同, 比佢玩死!!), 嚇到我死, 因為我買左巴士票, 要在下午去另一城市Fatima, 如果miss左班車, 除左浪費左車費外, 仲大鑊係要等過另一班兩、三個鐘後先有嘅巴士!!
死跑爛跑, 衝落山, 跑番巴士總站, 好彩....仲有時間剩, 我仲去買左一個我在葡萄牙嘅第一個葡tart來食, 超好味呀!!!!!!
好野, 終於今日有所作為, 寫完Tomar之旅, 下一站 -- Fatima!! 普遍天主教徒都應該識嘅城市, 因為.......下回分解!!
穿梭葡萄牙之旅 2009-2010 - 待續!
