Part 7 - 到都靈奧林匹克球場看球賽!!

2007年5月12日，星期六, 第一次親身喺祖雲達斯主場睇球賽，心情非常興奮!  (第一次睇祖記比賽就係 2005年6月4日，祖記駕臨香港, 算係叫祖記作客啦!) 

因為當日球賽 (乙組賽事: 祖雲達斯對博洛尼亞)係喺下年四點開始, 所以之前有大把時間可以在市中心行下街。一早我已經問定左酒店員工點搭車去球場，諗住在市中心搭有軌電車半個鐘就到，唔駛咁早去啦 (原來係錯, 跟著會解釋點解)。我2:30pm左右，已經坐電車, 架電車簡直係為球迷而設咁滯，車上絕大部份係球迷, 好多球迷着住球衣，有d又戴祖記嘅caps, 勁巾咁, 未去到球場已經好感受到d氣氛。在電車上邊，好多人眼望望下我 (我並無着波衫，因為好邪, 着親波衫隊波都輸；我當日着左件祖記t-shirt), 但無尼啦間得我一個人係異類, 所以比較突出。 

當見到全世界都喺個站落車，度就係都靈奧林匹克球場喇。落左車後仲震驚，簡直係人山人海。只係見到d人向着左手邊一個方向直去，咁我都跟著人行。

球場就喺前面咋!!

好多球迷即場買飛入場，不過我就一早買定飛，因為之前驚即場無晒飛買，咁我就好混吉了。

我拿著張voucher, 要去到球場再換真正嘅飛。但球場外實在有d混亂，好多入口，又唔明d入口有乜鬼分別。我每個入口都問職員究竟邊到係我去換飛的counter, 但每個入口嘅職員都話唔知，只係叫我向前行，叫我問下一個入口嘅人 (仲有好多人唔識英文，同佢地講野簡直就係9唔搭8)!!  見到一大班防暴警察，咪上前問其中一位....真係 "side" gas C...又係唔識英文嘅，仲要唔多願答我問題 (可能因為佢地要掛住維持治安啦, 廢話!!)。個茂里防暴警察又叫我向前行喎....

如是者，我行左成半個鐘，人都顛!  再問人，個職員就話我聽我行過左龍，應該行番轉頭...我行番去，但又唔係喎，係個泳池黎....

終於，又一次人都顛, 我將成個球場行左一個圈呀!!  唔知我係咪第一個香港人 (正確d講係白痴仔), 將都靈奧林匹克球場行左一個圈!!! 成身汗，都仲未揾到, 球賽已經開始左添，激鬼氣，我足足喺個球場外比人舞左一粒鐘呀陰公!!!  最後，我終於揾到喇，我當時真係想講粗口咁滯........死得佢，原來個counter係在我一落車的右邊咋!!!  我攪乜跟所有人向左邊行呀。

即時換飛，即刻飛入場，已經開左波10分鐘了, 好彩未有入球咋!!  下次, 以後，永遠, 我一定要早2粒鐘以上去球場!!!!!!!  去球場睇波應該好似去機場check in咁, 至少2個鐘前到達呀, 唔係就後悔莫及。

環遊球場外一圈.....初頭仲以為大把時間剩，得閒到周圍影相。

幾奇怪，球場外有真嘅祖記專門店, 但亦有好似下邊的假貨舖，公然賣假野都得!!!

因為遲左入場，所以唔得閒影咁多相，睇波為主。

半場休息，球員返回更衣室。

話說有兩單攪笑事件...

1)  中場休息時，我走左去球場內一個地方食野 (唔駛$的，只限某d觀眾可以入去), 入到去以為自已去左邊..... 嘩!  d人好似喺搶食世界咁, 搶呢樣，搶樣食，又成枱同成地垃圾，好得人驚!!!  痴線!  我求其食d野，飲杯野就走喇, 唔想留係度。

2)  離開頭先個嚇人地方後，就去洗手間啦....我盲鼠鼠，dup低頭 行 (可能被頭先的事情嚇死左一半), 冇睇清楚，差d入左男厠, 好彩臨入門口前即刻停低。咁行番去女厠啦....嘩, 攪錯呀，又係一堆男人排梗隊嘅 (但中間又有幾個女人喎!), 我以為自已睇錯野，走出門口再望多次個牌，明明係女厠喎.....於是，唔知點解咁夠畺，我入去向著班男人話, 呢處係女厠喎, 但竟然有幾個男人仲實牙實齒話, "No, it's Men's toilet."...咁我就禮貌地，Yap一yap手, 請佢同我一齊出去看看個牌...佢真係同我一齊出去睇喎!  一睇到，佢即刻話 "eiya, sorry..." (我懷疑佢地其實係扮野), 跟著佢走番入厠所，講比其它人聽，然後全部男人就走番出去!!!  最正係其中一個男人講左句 "You know, this is Italy."  救命，意大利就係咁喇，冇乜秩序可言，亂黎一通!!!!  (不過我仍然非常愛意大利!) 

球賽的片段....

個場都幾full, 而且係第一次見呢d球迷組織 (Ultras), 佢地好鬼勁，叫好多口號的，又唱晒歌，所以氣氛非常好。 祖記一入波，大會即刻播歌，個個都大叫、拍手、吹雞，乜都有的。

雖然先失一球，不過最後祖記都贏3:1, 賽後即刻有記者訪問隊長廸比亞路。

臨離開球場之前，影多張相先。 

~ 都靈奇妙之旅, 待續 ~ (下集將會係最後一集)