好似已經好耐冇講意甲嘅野.... 今個週末, 繼續有我最喜歡嘅 ~ 祖雲達斯, 同埋Palla! 好開心, 因為佢地分別有大戰, 所以電視有直播!!! 正!!!
兩場大戰都係禮拜六凌晨上演...
星期六凌晨 1:00am Cable 61, 64
VS
熱拿亞主場惡鬥國米, 當然支持熱拿亞啦!! 
星期六凌晨 3:30am NOW 633
VS
又係禮拜六晚喎...如果我兩場都睇, 我諗我成晚唔駛瞓都似
PALLA, 你快鬼D攞番幾個入球啦, 成鬼日淨係助攻, 咁攪點返祖記呀! 
且看呢兩場比賽鹿死誰手!!!
餓波太耐
今星期都唔錯, 愛隊祖雲達斯場比賽在週日舉行, 時間10pm (香港); 至於熱拿亞比賽在之前一晚舉行, 咁就可以睇到晒喇, 正!
祖雲達斯 對 錫耶納 (1:0)
Juventus: Manninger; Grygera, Legrottaglie, Mellberg, Molinaro; Marchionni (De Ceglie 79'), Sissoko (Zanetti 65'), Marchisio (Poulsen 85'), Nedved; Amauri, Del Piero
實情講真, 呢場波睇到有D炆炆地! 唔係得隊長廸比亞路漂亮到飛起嘅罰球, 以及門將 "萬能膠"嘅精彩表現, 球隊可能一早被追和, 甚至輸波....
球迷拉起超大橫額....我們向三粒星進發!
隊長廸比亞路在33分鐘又一球絕靚罰球!! 依家佢在射手榜有7個入波。由於國米主場只能迫和卡利亞里 1:1, 因此祖記同國米積分現只差距4分咋, 努力呀, 祖記!!
下週將要作客拉素....
熱拿亞 對 拖連奴 (3:0)
Genoa: Rubinho; Biava, Ferrari, Bocchetti; Mesto, Thiago Motta (Milanetto 85), Juric, Criscito; Sculli, Olivera (Vanden Borre 60), Jankovic (M Rossi 80)
熱拿亞今場比賽就超爽, 雖則有米列圖腹傷缺陣, PALLA又有傷在身, 但仍能大數拖連奴三球。 前祖記球員奧利華拉今場表現雖然麻麻, 但佢嘅隊友就好似個個上晒身咁, 極之厲害。
觀乎入球功臣: 18分鐘嘅比亞華, 48分鐘嘅真高域, 同埋85分鐘嘅莫達...
唔知佢地下週作客箂切, 會唔會仍然咁犀利呢?
18號先到下週賽事, 但週中又有意大利杯16強賽事:
國米 對 熱拿亞 (13號)
祖記 對 卡坦尼亞 (14號, 8:45pm, 意大利時間)
仲要竟然兩場, 無記電視都有得播喎....
(所有以上圖片均來自: La Stampa 報紙)
果然堅料, 聖誕節前發放好消息!! 阿YUEN前幾日在FACEBOOK嘅JUVENTUS HONG KONG FANS CLUB度留言, 話有消息, 今屆意大利超級盃將在北京鳥巢舉行。今日消息獲意大利足協證實!!
最好係: 2008-09意甲冠軍係祖雲達斯 / 意大利盃冠軍就係熱拿亞
咁到時, 就可以在北京鳥巢見晒我想見嘅人..........嘻嘻嘻嘻嘻嘻嘻!!!
若果真係 祖記 vs 熱拿亞 的話, 就要撲飛入場呀!!!
*********************************************
意超級盃明年8‧8鳥巢上演
2008年12月24日 ~ 摘自明報
【明報專訊】據意大利《米蘭體育報》報道，意大利足總官方宣布來屆意大利超級盃將於明年8月8日在北京奧林匹克體育場(鳥巢)舉行，剛好紀念北京奧運1周年。
北京市體育局長孫康林透露，當局將支付意軍的出場費，而以收取門票、銷售廣告等方式回收成本。據悉，這場比賽屆時將全球直播。意大利超級盃是由意甲聯賽盟主與意大利盃冠軍對壘，現時國際米蘭以17戰得42分高踞意甲榜首，是來京比賽的大熱，而緊隨其後的祖雲達斯及AC米蘭等勁旅訪華的機會也不少。
另外，意大利足總亦表示，意甲下一賽季會提早在8月23日展開，並在翌年5月16日結束，讓意大利國家隊獲較多時間備戰2010於南非舉行的世界盃。
阿特蘭大 對 祖雲達斯 (1:3)
完全意想不到, 今場波有個人搶晒鏡 ~ 馬基安尼! 攪乜, 今場完全上晒身呀! 先在30分鐘有越位嫌疑下傳左個波比門前嘅隊長射入, 今個係佢今球季第6個入波。 事後, 雲帥都認呢球係越位。
7分鐘後, 黑面神歷高達利接應角球, 攝前頭頂入網, 祖記拉開紀錄至2:0! 黑面神又打開佢件波衫, show佢件底衫D字 "Gesu' vive", 好頂佢唔住, 入波咪入波囉, 咪在人面前扮神聖啦, 好鬼嘔心。
換邊後只係3分鐘, 半場入替嘅韋利就入一球, 幫阿特蘭大追近至1:2。 隊長多番被阿特蘭大球員刻意侵犯, 終於在79分鐘搏到一個罰球..... 上左身嘅馬基安尼開個好鬼靚嘅罰球, 門前一班祖記球員中嘅阿瑪利用頭頂入, 再度拉開比數至1:3。最後比賽亦以 1:3完結。
以前鐘意馬基安尼時, 又唔見佢踢得咁好喎, 仲成日傷多過踢; 但依家憎到佢爆, 佢反以因甘仔成日傷而經常正選, 仲忽然神勇添.... 我都話我黑仔啦, 依家輪到連累PALLA....
今場, 馬基安尼會否係 MAN OF THE MATCH呢??? 哈哈哈!!!
基爾禾 對 熱拿亞 (0:1)
熱拿亞終於打開作客勝利之門! 但都嬴得好險, 88分鐘先由前祖記球員奧利華拉打開紀錄。小勝1球, 全取3分, 意義重大呢。
基於電視冇直播, 同時間又有祖記比賽進行....同埋冇用 "第二D" 途徑... 所以唔知場比賽有幾激或有幾悶。 但呢場波正選陣容好嚇驚 ~
Genoa: Rubinho; Criscito, Biava, Bocchetti; Rossi, Juric, Thiago Motta, Vanden Borre (Brivio 86); Jankovic (E lShaarawi 83), Olivera, Modesto (Papastathopoulos 60)
冇晒大米, PALLA, 史古利, 出動到好少出場嘅奧利華拉, 前面攻力差好遠; 但好彩奧利華拉爭氣, 少出場都一出就有波入。
聯賽榜排名在歇冬前冇改變, 祖記仍排 No.2, 熱拿亞就 No.6。
非常高興, 因為兩隊球隊今週皆作客嬴波!!
萊切 對 祖雲達斯 (1:2)
隊長廸比亞路今仗因傷沒有隨隊比賽, 加上伊亞昆達同查斯古特亦有傷, 故此基奧雲高今仗難得正選上陣。 今場除基奧雲高外, 馬治基奧同樣正選上陣; 而廸切尼亦後備入替。 雲帥唔知係咪聽倒我地日夜埋怨一眾小將缺乏上陣機會呢
基奧雲高全場好活躍, 仲有一個可以媲美隊長廸比亞路嘅美妙超靚罰球, 對方龍門掂到, 都抵擋唔到嗰種勁度!
之後雖然有對方球員Cacia 喺83分鐘嘅掃帚脚入球替萊切追和至 1:1, 但好彩, 好彩有阿瑪利89分鐘時門前個彈地波, 將比賽結果改寫成1:2, 亦以此比數完場。 全取3分後, 積分榜依然排第2, 與榜首件 國米仍距6分。
歇冬前仲有兩場比賽, 分別係下週對AC, 同埋最後一週對阿特蘭大。
森多利亞 對 熱拿亞 (0:1)
熱拿亞市打吡大戰, 慶幸熱拿亞終於叫 "作客"嬴波。賽前森多利亞球隊多次作出口水戰, 先有話呢場比賽球證 Farina係熱拿亞球迷, 故今場應該換球證。之後就到卡斯辛奴 "阿之阿左"。
熱拿亞平常喜歡打進攻足球, 但今場領隊竟然改為4-4-2陣式, 似乎要防守為上。個人覺得幾啱, 熱拿亞雖進攻唔曳, 但防守幾弱下, 對住有卡斯辛奴助陣嘅森多利亞, 保守D都唔壞, 至多咪搏同你打和攞番一分。
好一場火藥味十足嘅打吡大戰!! 一場比賽11面黄牌, 大家打到兇神惡殺!! 開賽10分鐘, 已經有11個罰球, 認真經典!
由於打兩前鋒關係, PALLA冇左正選出場 ~ 大米 + 史古利在最前。先講講, 本人對史古利呢位球員絕無好感, 最主要因為佢上次隨祖記來港時態度好差, 甚為討厭。
兩班球員, 身體接觸本無可避免, 但打波差D到打交咁滯, 尤其上半場, 雙方 (有時加埋球證)成鬼日圍埋理論; 件史古利一定以為自己係隊長, 嗌親交都見佢有份, 出左場在場邊都口多多, 真係討厭, 好心佢有牌在手就收嗲啦, 咪時趕你返更衣室添!
大米50分鐘時頭頂攻入一球, PALLA在75分鐘入替。之後雖則森多利亞積極反撲, 都改變唔到輸波事實。
大米入球增至12球, 但基拿甸奴都唔弱, 已經追到11球喇。
今個星期唔駛分身乏術, 因國米對祖記場國家打吡, 同埋熱拿亞作客拉素嘅賽事不是同時間進行。
國米 對 祖雲達斯 (1:0)
因為星期六晚去左飲宴, 冇力氣凌晨起身, 所以諗住睇重播算數....點知, 晚上去洗手間時, 剛遇啱係下半場準備上演喎
原來上半場好早時段, 泰亞高已經傷出....
以我只睇下半場嘅感覺, 隊長表現好似一般 (可能因受制於對手嘅嚴密看管)。
右面位阿叔 (伊巴), 雖則腳法好, 但人品球品就幾討厭下...
竟然比佢符符碌碌入左波喎, 祖記輸得幾唔抵。
拉素 對 熱拿亞 (1:1)
講唔抵, 熱拿亞今場打和只攞得1分重唔抵。
雖然坐到 "山卡拉" 咁遠, 都無損熱拿亞球迷支持球隊嘅熱情。
呢場波, 熱拿亞絕對踢得好過拉素, 可借首先在39分鐘時 米列圖嘅入球竟然被旁證誤判越位, 個旁證極之離晒譜, 水準太低!! 上半場 0:0完。
下半場, 球證應該諗住送番個大禮比熱拿亞, 史古利在對方禁區內搏得個12碼, 米列圖操刀, 不過暫列神射手第一位嘅大米唔知仲乜鬼, 將個波射鬼左上太空!!!
等到69分鐘, 辛勤終於得到回報, PALLA將波帶到底線, 傳送比左邊近門嘅莫達, 左攪右攪一番, 仲可以出番個波比喺中間嘅大米, 大米即時抽個波入網。
可借熱拿亞守唔到優勢到完場, 反而在80分鐘, 熱拿亞門將魯賓奴犯錯誤, 接唔實拉素球員達寶 (Dabo)射嘅遠射波。有乜理由佢會想抱住個波得ga?? D隊友真係多得佢唔少! 3分變1分! 如果唔係球隊就可以作客開齋嬴波啦。
30號星期日, 第14輪意甲, 將有:
祖記主場對里賈納; 熱拿亞主場對博洛尼亞。里賈納同埋博洛尼亞都處於護級位置 (里賈納只得11分, 排緊尾三; 而博洛尼亞仲衰, 13戰後都係只得9分, 排緊尾二)。 為護級, 兩隊一定勁搏, 但好彩祖記 & 熱拿亞都將會主場出擊, 取勝更有信心。
希望唔該唔好兩場比賽同時進行呀.....
