歐聯比賽 + 羅馬假期

今日國慶日假期, 唔打算出街, 因為想留喺屋企做下自己野。

一早起身睇番凌晨祖記作客巴迪場歐聯比賽, 睇到我膽戰心驚, 因為冇想過祖記在23分鐘已經先輸2粒!!  巴迪只係歷史上首次晉身歐聯比賽, 第一次在主場踢, 就可以先入兩粒, 如果唔係有基亞雲高同埋伊亞昆達嘅合作追番兩粒, 祖記真係醜死。場波最後以 2:2完場, 祖記又只係和波收場 (唯一叫做係攞番兩粒作客入球), 唔知領隊雲尼亞里又仲係咪對和波又話好滿意呢?  球迷就認真唔滿意喎!!!  下兩場接住要硬拼皇馬, 仲有作客辛尼特添, 以祖記呢條冇乜創造力可言嘅中場線, 都唔知點應付黎緊嘅各場歐聯再加國內嘅意甲 + 意大利杯比賽。

之後, 就睇左前幾個禮拜買嘅一隻DVD碟 ~ Roman Holiday羅馬假期 (另有譯作 "金枝玉葉")。

電影"羅馬假期"嘅意大利游報。電影贏得第26屆奧斯卡最佳女主角, 最佳原著, 最佳服裝設計3項金像獎。

一部經典荷里活電影, 1953年出品。其實我好有興趣睇舊片, 不過就唔係咁慣睇黑白片, 因為總覺得視覺效果會差D。但我睇左呢套片後, 就發覺之前想法好錯, 原來黑白片可以幾好睇喎, 加上上幾代嘅明星真係好靚好有風采。

我第一次睇柯德利夏萍 (Audrey Hepburn)嘅電影, 佢真係非常非常清麗脫俗, 黑白片都影得佢咁靚, 如果係現代彩色版, 佢應該係更加美麗。而男主角Gregory Peck亦高大英偉兼有型。

故事情節在今天來講可能係比較老土, 不過演員們演得好出色, 仲有就係全片羅馬實地拍攝 (呢個係我原先一直想買隻碟來睇嘅原因): 羅馬競技場, 真理之口, 西班牙石級, 聖天使堡, 仲有羅馬嘅街道等等..... 雖然我唔多鐘意羅馬呢個地方, 但羅馬呢個永恆之城 (The eternal city), 千年歷史建築物的確係非常壯觀宏偉; 但又想到, 當我地睇香港嘅粵語長片時, 能夠搵到幾多現在仍然存在嘅建築物呢?  政府中人完全唔尊重人民歷史同好珍貴嘅舊建築, 真係一大遺憾。  

(我突然想起, 我之前寫緊嘅 "穿梭羅馬07"嘅blogs寫寫下停左...講番上年嘅羅馬之旅, 有好多野想講呢, 希望遲D可以寫番作為紀錄....)