意大利黑手黨 ~ 之一

近來一連睇左兩本書, 自己覺得兩本書都好好睇。

起先, 係因為在三聯睇書時, 見到呢本書: "黑手黨"

因為對黑手黨呢個題目好有興趣, 所以見到呢本書時, 就好想買左佢。加上呢本書頗薄, 而價錢亦好平, 就買左佢黎睇。

本書簡單講左意大利黑手黨嘅發展史, 而另外仲有講到關於世界其它地方嘅黑幫, 包括美國黑手黨、東歐黑幫、俄羅斯黑幫、香港三合會等。 書本原文係意大利作家 Paolo Pezzino著, 再被翻譯成中文版。

睇完之後, 唔知點解好想再睇多D關於黑手黨嘅書, 就走左去時代頂樓嘅 Page One搵下有冇呢方面嘅書。

點知咁啱見到呢本書.....

其實本來我都唔知頭唔知路, 只係睇到呢本書時, 諗住本書係關於意大利拿玻里嘅黑手黨, 睇埋書背嘅簡介, 同埋Contents內容後, 就買左佢睇。

返到公司後, 上網搵呢本書同埋作者嘅資料, 先至知原來呢本書, 同埋作者自已, 原來都係大有來頭。

作者Roberto Saviano ~ 出生同成長於拿玻里, 係意大利記者。佢2006年出版左呢本書, 因為大爆拿玻里黑手黨 Camorra嘅運作方式, 殺人手段等, 至令佢好快就收到死亡恐嚇, 而且要24小時接受意大利警方嘅秘密保護。

睇佢本書, 先知道其中一個我覺得係大秘密嘅事情: 原來意大利好多嘅名牌貨, 都係同Camorra有關。品牌邀請山寨廠嘅阿頭 (大多數係在拿玻里), 集齊在一個地方, 然後就在黑版上, 寫上想要要生產嘅貨物嘅資料同埋會付出嘅價錢。然後山寨廠嘅阿頭們, 就各自舉手....肯舉手代表呢間山寨廠肯以這個價起貨。每間廠會被規定製貨數量。貨物嘅原料方面, 例如如果係一個皮手袋, 品牌會供應所有皮比山寨廠。聽落好著數, 不過當然唔會有咁大隻夾乸隨街跳。

原來...就算你能夠以這個超cheap嘅價錢起倒貨 (過程中代表山寨廠嘅生產環境惡劣, 同埋工人嘅人工係極低, 唔知差唔差得過大陸嘅山寨廠), 但最後都要呢個品牌嘅負責人睇過晒D你製成嘅所有貨...如果貨嘅質素被接受, 咁呢個品牌就會以之前你舉手時承諾嘅價錢, 比番$個山寨廠。但係如果佢地覺得你嘅貨meet唔到佢地個requirement, 咁...山寨廠係一毫子成本都唔會收得番!!!

咁...山寨廠咪做咁耐得個吉???  原來如果品牌唔接受你所製成嘅貨物, 你所做嘅貨就....送晒比你地, 由得你自己解決D貨!!  山寨廠要咁多貨黎把鬼咩!!!  所以...黑手黨就會幫手出貨喇....怪唔得呢個世界上有咁多咁似真貨嘅A貨!!!!!

呢個故事, 只係作者所爆嘅其中一件不可告人嘅事件之一。 還有嘅, 仲有拿玻里垃圾, 同埋所帶來嘅環境污染, 如果大家有留意幾個月前, 新聞報道有講過拿玻里最著名嘅水牛芝士 (mozzarella cheese), 被發現有類似二惡瑛嘅污染物。此乃惡性循環所至 ~ 垃圾被非法地藏在泥地上, 大量污染土地; 然後水牛食被污染左土地上嘅糧食或水源, 咁水牛所出嘅奶被污染左, 繼而佢地嘅奶又被製成受污染有毒嘅水牛芝士。

發瘟!!  呢個世界上有D咁變態嘅意大利人, 同埋沒良心製作有毒食物嘅中國同胞, 真係好悲哀......

又被我無意中搵到第三本書關於黑手黨...而個本係關於西西里島嘅黑手黨的。 睇完之後或者搵機會再分享一下本書講乜....