Part 26 ~ 回到美麗的Vernazza 及遊Sestri Levante

今日又要離開都靈囉....唔知幾時會再有機會返來呢??  都靈, 我地會再見嘅。

今日會再度回去 Cinque Terre (五鄉地), 而目的地就係五鄉地之一嘅Vernazza。早在都靈時已經搵定在Vernazza嘅朋友幫我地book住宿, 唔知個房OK唔OK呢? 

原來新嘅住宿處, 比起一個幾星期前住嘅guest house 離火車站遠左少少 (不過實情都係好近, 因為Vernazza係個好細嘅鎮)。 間房真係正喎, 幾大, 個洗手間都頗闊落, 最正係窗外有傳統晒衫繩, 可以將洗左嘅衫晒出去吹乾。有太陽晒D衫, 乾得快D, 仲可以殺菌添。條晒衫繩可以一路擰, 擰到去對面樓間屋嘅牆度, 好有趣。以前睇書見呢種晒衫繩見得多, 但就係第一次用佢來晒衫。

在鎮大街其中一條樓梯, 行上去, 冇幾耐就去到我地住宿嘅嗰幢樓。呢條路亦係行山過隔離鎮 Monterosso嘅必經之路, 所以條路都頗熱鬧。

我地今朝5am起身, 搭7:20am嘅火車, 經過在熱拿亞火車站轉車等一輪嘅折騰, 終於到達Vernazza。今次在熱拿亞轉火車月台時, 中途嘅電梯正常開動 (冇玩我地喇), 不過搭左四個幾五個鐘頭火車,再加埋搬行李, 真係倦得要命....唔好講笑, 食D野醫醫肚先。我地在呢間舖頭買左個pizza食, 好快手食晒添!

又回到呢個靚到飛起嘅Vernazza。

我地費是浪費光陰, 所以之後把握時間, 搭左一個鐘火車過附近一個頗出名嘅Liguria鎮參觀, 佢就係Sestri Levante。Sestri Levante就係熱拿亞球會在剛剛過左嘅summer training時所逗留嘅地方 (又會咁啱嘅...)。

我最初認識呢個地方, 係因為曾經睇過台灣一個作者叫做張國立寫關於佢同佢老婆去意大利旅遊嘅書 ("一口咬定意大利", 同埋 "再咬幾口意大利" ~ 兩本書都非常好看, 佢寫得好風趣幽默的, 我高度推介), 當時被佢嘅形容同埋佢影嘅相而深深吸引住。我地兩個都勁想去呢度欣賞美景, 同埋據講呢度有個好靚嘅海灘。

落火車後, 跟指示牌行...不過覺得佢地嘅指示非常麻麻....

行去游灘途中, 見路邊一架車貼左張 "I love Sestri Levante"嘅貼子, 覺得好型, 所以影低佢。...原來影埋自已個身影添....見唔見棵大椰樹呀?  呢個地方好多好高嘅 palm trees的, 好有夏天嘅氣氛。

其次係, 呢個鎮嘅屋全部都五顏六色, 好卡通, 好得意。我地都覺得呢個鎮好似廸廸尼樂園。 個游灘一邊泊左好多船在岸邊, 或者好多居民都擁有自己嘅船, 得閒出下海玩, 晒下陽光飲下酒...嘩, 真係好優閒好寫意嘅生活呀。

個海灘都幾大, 不過我地呢個旅程並冇帶泳衣, 所以冇游水。

可能因為Vernazza太靚, 所以我地兩個都覺得 Sestri Levante並冇張國立, 又或者其它旅遊書所講咁靚....我地不約而同有同樣意見: 應該先去晒其它 Ligurian towns, 最後先去Vernazza, 可能會覺得好D。

今日其中最難忘嘅地方係我在旅程中病左。未返到Vernazza, 已經覺得唔多OK, 成身好熱... 好似係發燒。因為鎮嘅pharmacy已經閂左門, 所以問個朋友借左D aspirin, 同埋攞左佢地bar嘅熱水飲...之後, 我返左房瞓足一晚, 休養生息。好彩, 第二朝已經冇晒事, 退左燒囉。

第二日, 我地並冇再去第二D鎮玩, 因為我地感覺到, 冇其它鎮會靚得過Vernazza, 唔駛周圍去喇。遇著今日班 local friends嘅bar休息, 唔駛返工, 所以一齊喺海邊傾計, hea足一日。

到晚上, 更成班茂里去左一間舖頭大吃一餐, 然後仲搭左次覇王火車 (係事後先記得...依, 頭先冇比$搭火車喎), 過左另一個鎮嘅bar飲野傾計添。

~~ 穿梭意大利2008 ~ 待續 ~~