Part 27 ~ 羅馬一天遊

今次嘅意大利之旅, 隨著到達最後目的地羅馬, 就係差不多到尾聲了。

今天, 5月16日, 要搭火車落羅馬。一早先行同一個朋友告別, 朋友在佢住嘅Vernazza鎮嘅一個旅遊景點 ~ 堡壘 ~ 做part time, 佢叫我地朝早要去堡壘同佢say goodbye, 所以我地今朝諗住去傾下計先。但係呢位仁兄, 返工都遲大到喎!! 個堡壘等佢開門做生意, 佢竟然唔知醒, 遲左起身, 我打電話問佢, "喂, 你黎唔黎ga, 我地趕住搭火車走人喎....仲有呀, 個堡壘門口依家好多人企左喺度等你開門呀"'!!!  嚇鬼死佢, 哈哈哈!!!

早知佢在堡壘做 part time, 我地之前就唔駛 side錢比錢上個堡壘參觀啦......今日又可以居高臨下, 看Vernazza美麗嘅景致。

 

由於個朋友大遲到, 所以影響左我地今日全日嘅行程。我地延遲晒搭火車時間, 再加埋我地今日超好彩 (嘅相反)!!  因為在中途站 (好似係比薩)趕唔切轉火車落羅馬, 攪到我地要等下一班, 在比薩無端端等多兩粒鐘。

當我地到達羅馬時, 已經係晚上八點!!!! 

原先仲約一個在羅馬住嘅朋友見下面, 但因為太晏, 改左明日。 因為比較夜, 而羅馬嘅治安非常麻麻, 我地唔再週圍走, 就在hostel附近, 亦即係火車總站 Termini, 裡面嘅food court食野算數。

下面呢間在Termini裡嘅食店, 唔好去食野呀 (除非你別無選擇可言), 因為嗰度D野食真係前所未有咁鬼難食。

 

左手邊那碟唔知乜鬼意大利炒飯, 鹹到痴根!!  右邊個所謂 Tiramisu, 一D都唔好食, 簡直係影衰tiramisu呢個咁好聽嘅名呀。唯一接受得到嘅, 就係....右上角嘅個支 mineral water, 味道唔會有問題, 哈哈!!!

 

到等二朝 (17/5), 今日下午就要坐飛機返香港喇!!  但我朋友就會自己多留羅馬一星期, 自已周圍去。

雖然得半日在羅馬玩, 但當然唔會浪費呢半日啦。晨咁早起身, 先吃hostel一個極度豐富嘅早餐。呢個早餐絕對係我地三個星期以來最好味嘅早餐...到依家我仍然非常懷念。間hostel係一個北方中國人開嘅, 在火車站附近 (其實在火車站仲要行一大段路), 不過好處係住宿都幾平, 有私人浴室, 每日有呢個豐富早餐, 仲有免費上網。唯獨唔建議夜歸 (除非一大班friends), 因為附近夜晚頗黑, 又好鬼靜。 

 

吃過早餐後, 先快快脆脆去市中心一間大教堂, 原因係一位朋友在此工作, 所以去呢度探望一下佢。呢間教堂以前係教宗住處 (1309年以前), 而19世紀前教宗都在呢度加冕。而呢間教堂附近仲有一個好重要嘅建築物叫 Scala Santa (聖階), 傳說當年耶穌就係走上呢個有28級嘅台階後, 然接受審判。而傳說呢個台階係由君士坦丁大帝母親St Helena從耶路撒冷帶到來羅馬的。上年我去羅馬時, 都有好似其他教友一樣, 跪著上左呢28級樓梯, 過程都真係頗辛苦。

 

探望完朋友, 就趕快去一個重要景點 ~ 羅馬鬥獸場。羅馬鬥獸場永遠都咁宏偉壯觀, 雖然我已經第N次行過 (因為上年逗留在羅馬兩星期, 經常經過), 但每次仍然都被呢個建築物深深吸引著。不過今次就沒有入內參觀, 當我朋友入內參觀時, 我就在外邊欣賞下, 然後又坐低在鬥獸場外休息一下。

 

意大利嘅警察有幾種, 除左一般嘅警察 (la polizia), 就有下面呢種勁D嘅 Carabinieri (制服都型D呢)。如果冇錯的話, La polizia一般係維持社會秩序, 查案破案咁, 佢地向內政部負責; 但carabinieri就擁有更大職能, 佢地一般陀晒槍, 除左維持社會秩序, 騎警、傘兵等都係屬於carabinieri, 佢地係向內政部或國防部負責。

 

依家在羅馬, 周圍都見警察, 警車, 而且據講近幾年來政府不斷驅趕行乞或到處偷盜嘅吉卜賽人, 所以如果自己小心D, 一般在羅馬旅遊都算安全 (我慣常唔會夜歸)。就算我上年一個人在羅馬兩個星期, 都叫OK, 有一次曾經在火車站外嘅巴士站等車返家途中, 見到一個男仔 (大約15、16歲), 根本唔係等車, 佢不斷在我等車嘅位置附近行來行去, 應該係睇機會扒等巴士乘客嘅東西。我通常都打醒12分精神, 務求將被偷野嘅機會減到最低。有個菲律賓裔嘅意大利人同我講, 佢住在羅馬咁多年以來, 曾經試過被偷過3次手機!!!! 

 

以下係:

鬥獸場同隔離嘅君士坦丁凱旋門 cross over Ta & 我個朋友。

 

3個星期嘅意大利之旅, 真係踏入尾聲囉......我晒到成身黑晒 (好野, 我目的達到); 但最神奇係: 點解我個朋友依舊可以一D都唔黑嘅?????

可惜依家已經白番好多, 希望可以又有機會晒黑番先, 我覺得古銅色/黑媽媽色真係好靚好健康, 好正。

 

羅馬火車總站Termini有間 Nike Shop, 因為有加度素同埋大簡嘅大海報, 所以影低先。

 

一個人先回香港.... 在羅馬機場因為時間太多, 又太肚我, 買左個沙律食, 真係好食。

下回會總結今次呢個旅程, 同埋提下少少搞笑事件。

 

穿梭意大利2008 ~ 待續