Part 18 ~ Lucca(盧卡)半日遊

今日下半日嘅行程繼續 (上半日嘅比薩之旅, 請讀對上一篇遊記)。完成比薩參觀後, 我地坐左半個小時嘅火車, 飛快過去另一山城 ~ 盧卡。

講左咁耐意大利呢個行程, 發覺早應該要用個地圖來幫助講解一下, 如果唔係, 可能對唔太認識意大利地理嘅朋友來講, 有D困難。

佛羅倫斯、比薩、盧卡等城市, 都位於意大利托斯卡尼省。其中因為好多小城都位於山上, 所以好多人又稱呼呢類小城叫山城。

下圖係大家都非常認識嘅意大利靴形地圖, 白色部分係托斯卡尼省 (意大利文稱Toscana, 英文Tuscany) 

托斯卡尼省內嘅所有城鎮。Pisa左手邊隔離嘅就係Livorno (利和奴), 有隊足球隊來自呢處。 佛羅倫斯 (Firenze)對上有個地方叫 Prato, 據報好多中國人走左去嗰度開同製衣業有關嘅舖頭, 果處據講有最多中國移民 (加埋非法)。

介紹左托斯卡尼省之後 (應該一早先簡介), 講番盧卡 (Lucca) 呢個地方。 Lucca真係一個好清靜、好清幽嘅小城。

簡單講講: 人口只得大約82,000嘅Lucca, 公元前180年已經係一個羅馬帝國嘅殖民地。市中心被城牆包圍住, 搭火車到達後, 要行少少路, 過埋城牆, 先入到市中心。市內到處見居民同遊客踏單車, 旅客可以到旅遊資訊處 (共有兩間)租單車踩。唔記得實際價錢, 好似大約 5euro一個鐘頭。不過D單車架架都好高身, 對亞洲女子來講有點過高!!  Lucca最著名嘅人物, 包括作曲家Puccini。

我地入城首先見到嘅建築物係: Cathedral (Lucca主教堂), 建於11世紀。

教堂外觀非常華麗, 建築物上半部分築有三層柱列, 加埋因為外牆係白色的關係, 望落好似一個結婚蛋糕!!

Lucca市內一帶種滿樹木, 又有大廣場, 週圍都見露天茶座, 感覺好舒適寫意。

商店招牌都有咁靚嘅雕刻裝飾, 果然係意大利!

 

行下行下, 到達Chiesa di San Michele (San Michele教堂), 教堂頂部有個好大嘅像, 係大天使Michael (Archangel Michael)殺緊一隻龍。我覺得呢間教堂外形更加似一個結婚蛋糕!  黎喇, 一齊食番D野先繼續遊山玩水啦!!! 

 

行左好耐, 我地終於搵到旅遊資詢處, 每人租一架單車踩Lucca。踩單車同用腳行感覺真係超唔同, 踩單車真係爽好多!!!  風馳電製 (誇張左D), 穿梭於Lucca市嘅大街小巷中, 正斗! 

踩住架單車, 好容易就從地圖上搵到我地另一目的地 ~ Torre delle Ore。要上塔頂欣賞Lucca鎮風光, 先要征服上塔嘅幾百級樓梯。又係樓梯, 要成功先要過到腳骨力呢一重要一關!!! 

呢條長樓梯特點係: 沿途有D個鎮嘅資料同照片欣賞, 叫做幫忙替呢個行樓梯之旅加D生氣咁啦。

呢個塔另一特別之處係, 塔頂係一個花園, 種左一棵大樹 (下列照片冇影棵樹的)。 

最後要重點參觀嘅係 Piazza del Mercato (市場廣場)。從天上望落去, 好有氣勢呢!

 

廣場係圓形的, 圍住廣場嘅建築物都係屋舍。地下全部係:餐廳、露天茶座、紀念品店等等。根據作者小米麻糬嘅著作 "邊走邊畫意大利"所講, 市場廣場係圓形, 因為: 其前身是一座古羅馬圓形廣場。但經過數個世紀嘅侵略同搜括, 圓形廣場嘅石材只剩瓦殘磚散落一地, 一直到1830年以後, 波旁王朝嘅統治者Marie Mouise命令清除呢d破爛不堪嘅房舍, 先令廣場變回一個乾淨嘅空間。

Lucca鎮內嘅小型巴士。

鎮內建築物牆上嘅美麗雕刻品 ~ 在意大利好流行。我見過好多呢類牆上供奉聖母嘅位。

Lucca鎮內有不少餅店、麵包店等, 又有朱古力店, 全部食物望落去都已經令人流晒口水呀!!!  Yummy yummy!!!    

若果大家對托斯卡尼省, 或者Lucca好有興趣, 可以溜灠以下網頁搵多D佢地嘅資料, (點解咁似電視節目最尾D主持嘅口敏嘅??!!)

http://www.welcometuscany.it/tuscany/lucca/lucca.htm

下回將會離開佛羅倫斯, 執包袱, 過去Siena (錫耶納) ~ 另一美麗非凡嘅托斯卡尼山城。

 

~~ 穿梭意大利2008 ~~ 待續 ~~