新湯鍋

前幾日有一晚, 我阿媽話, 佢喺sogo (7樓具部)見到一個牌子嘅沙煲 lan餐, 猛咁話好用, 又話佢有幾個friends都買左, 都勁讚好用又慳煤氣咁話。佢話佢都想買。嘩!  唔係話, 我屋企都已經夠晒多煲, 又買??  問佢係乜牌子, 佢話個名好長, 唔知係咪德國牌子。問佢咁個煲幾多$呀?  佢講完個價錢之後, 真係嚇左我一跳, 買個煲要咁貴咩?? 

第二日, 佢又同我講想買個煲 (係佢自已比$).... 我話, 如果佢想買, 等我同佢一齊睇睇先喇, 睇下個煲係咪真係咁好用先好喎。同埋我有sogo信用卡, 有95折, 我先比錢, 可以慳番D錢嘛。 

放工後就約左我阿媽喺sogo7樓上面等。去到.... 啊, 原來係呢個牌子... 原來係呢個意大利牌子....因為係意大利牌子......即刻加多左少少分添.....

當個售貨員講解個煲嘅用法時 (頗為復雜), 先想番起以前個意大利文老師講佢在意大利用嘅煲....

話說, 我地有一次上課時講起煮野食, 個老師話佢地意大利冇飯煲呢樣野 (當然啦!), 但煮飯、煮餸用嘅煲, 好正好好用咁話。 跟著佢解釋左一輪個煲嘅用法, 聽到我地所有人一頭霧水!!!  好復雜, 最搞笑有個同學即刻話, "你個煲安唔安全ga??  會唔會爆炸ga??"

個老師話, "不知幾安全呢! 煮D飯餸仲好正好好味添, 個個意大利人都用呢種類嘅煲。"

......到我喺sogo聽呢個售貨員講解, 佢講嘅說話, 仲乜同我以前個老師講嘅野一模一樣嘅?????!!!!!

原來係同一種類嘅煲....

最後, 買左呢個煲返屋企...唔買, 我阿媽點會安安樂樂得ga??!!  純淨意大利製造, 煲底有印Made in Italy添, 哈哈....

 

個煲嘅外型, 配以特別嘅蓋。個蓋有巧妙嘅....

 

個煲有關門掣。

 

原來, 以煲湯為例, 放晒D料落個煲後, 煲滾煲水, 之後個煲會發出呼呼聲, 呢個時候,  就閂實個煲, 轉細火, 繼續煲, 之後個煲就開唔番喇!  到你認為煲湯煲夠喇, 就可以熄火, 但要等15分鐘左右先可以開番個煲蓋。之前你點開都唔會開到個煲蓋的!  點知個煲蓋打得開呢?  就係當粒紅色掣跌左落去之後。

 

呢個係個排氣掣, 若果想快D開番個煲, 就打開呢個排氣掣, 放緊一D裡面嘅熱氣。

 

個煲完全唔會蒸發水份, 放幾多水入去, 最後仍然有番咁多水喺度 (當然變成左湯啦)!!  呢餐我地飲晒D湯囉。