Part 17 - 傾斜的比薩斜塔半日遊

在佛羅倫斯4日3夜嘅期間, 我地抽左1日, 去左兩個小城 ~ 分別係Pisa (比薩)同Lucca (盧卡)。兩個小城都在佛羅倫斯附近, 我地想快速參觀, 所以決定一日踩兩地。本來想去多幾個Tuscany (托斯卡尼)山城, 不過我地在意大利時間有限, 不容許我地留佛羅倫斯太耐。希望將來有機會再去意大利時, 可以造訪其他托斯卡尼山城啦。

因為我block左呢篇文, 所以可以放自已D相在此。唔好意思, 若然你唔想睇我個衰樣, 大家仲有時間, 可以依家離開, 哈哈!!

簡單講講, 比薩呢個城市, 同佛羅倫斯一樣, 有條Arno河流經。 羅馬帝國時期已經係重要海港, 以前與威尼斯 (Venezia/Venice)同埋熱拿亞 (Genova/Genoa)並列地中海3大港口。現在係著名大學城。在呢個城出生嘅名人包括: 伽利略 (科學家), 仲有... 基亞連尼 (祖記球員!  哈哈) 

Pisa火車站: 出左來, 環境幾清靜... 從佛羅倫斯坐火車, 到達Pisa, 時間都係早上8點半左右。

 

我地選擇用行路嘅方法, 由火車站, 行到去比薩斜塔 (Leaning Tower)嘅所在地 ~ 奇蹟廣場 (Campo dei Miracoli), 要差不多一個鐘。我地選擇行而唔搭巴士, 主要因為我地之前參考過不少旅遊書籍, 談到若果步行的話, 沿途風景非常優美, 見到Arno River, 民居等等。不過我地經驗係, 唔覺得沿途風景有何特別吸引人之處囉!!!   好彩一路上係平地....

老老土土, 不過點都要同斜塔來張合照。不過嗰D托塔、推塔之類嘅動作....唔駛預我喇!! 

 

奇蹟廣場 (Campo dei Miracoli)上除左斜塔外, 仲有大教堂以及洗禮堂。呢日天氣極之好, 藍天白雲, 風和日麗, 好正好正!! (其實今日太陽都幾猛烈, 不過因為唔熱唔濕, 所以好爽)

 

斜塔經過多年維修, 終於准人再上去參觀。 不過價錢唔便宜, 上斜塔頂參觀竟然要17歐羅, 而加上我地網上訂飛另加2歐羅 (mark時間), 總共19歐羅!  嘩, 好鬼貴呀!  仲有: 要跟團 (限最多好似40人)上去, 每次有一位導遊會跟著, 整個過程只可逗留30分鐘 (冇記錯的話), 所有行李要寄存, 只可手揸住銀包、相機等, 一定唔准攞住個袋。超麻煩!!! 沿途有人會看守住, 都幾嚴下。

依家上去喇!!  (又係意大利最popular嘅 ~ 樓梯.... 真係見到驚, 驚到唔再覺得驚!!)

 

D樓梯一日復一日咁被人行, 行到凹晒!!!  (D樓梯好滑呀, 同埋上塔嘅樓梯好窄, 又轉得好勁, 轉到暈咁滯)

 

上面又真係頗靚, 由塔頂從高望番落地下感覺一流, 建築物非常宏偉。

 

在塔上時間其實好短, 影一陣相已經開始有職員趕我地落塔!!  好鬼冇癮!  呢度嘅職員 (尤其係地面counter嘅職員, 塔上邊個D都好D)超寸, 態度差到爆, 好似唔想撈咁!!  但你又吹佢唔脹, 你又唔會投訴到佢喎, 因為佢地全部都係咁樣, 連佢D亞head都係一樣咁死寸!!!

影埋呢張在塔頂嘅相, 就要鬆人了.....

 

 

~~ 穿梭意大利2008 ~~ 待續 ~~