隊長想踢到四十歲??

今日喺網上新聞見到一篇報導, 隊長廸比亞路話, 如果情況許可, 佢渴望可以踢多6至7年足球!  嘩, 咁咪即係踢到四十歲??!!

作為祖記同廸比亞路嘅球迷, 我當然想佢踢耐D先退休啦。廸比亞路係我自從開始睇足球比賽以來, 第一個真正開始支持嘅球員, 支持到今時今日。

當年我本來先係開始睇英超, 不過好快, 就轉左睇意甲囉, 時為1994年, 係因為世界杯, 令到我從此超鐘意意大利。

當時我最鐘意 (第一個意大利球員)係踢拉素嘅薛洛尼 (Giuseppe Signori), 唔知有冇人記得佢係邊個 (佢嘅個人網址: http://www.beppesignori.com/)。當時轉睇意大利波, 並非因為意大利男人靚仔。反而, 我覺得D意大利男人好核突, 個個黑麻麻。加上當年去過一次意大利旅行, 覺得嗰度治安差, D男人個個成個賊樣咁!!!

Guiseppe Signori

但唔知點解, 覺得意大利足球好好睇, 雖然我都係一路睇, 一路學D球例之類嘅野。

因為拉素呢個球會好有問題 (主要係意大利嗰邊D球迷嘅種族主義等原因), 加上薛洛尼轉會, 漸漸, 唔知點解, 轉左鐘意祖雲達斯。完全冇原因, 都唔知點解。可能因為當年佢地係巴治奧、拉雲拿利同維埃尼三角鼎立嘅盛世之年, 好強大。好多friends都以為我因為廸比亞路而鐘意祖記, 查實我開始支持祖記時, 我根本都唔知乜水係廸比亞路, 佢靚唔靚仔我都冇印象。   

轉眼間, 我鐘意左隊長超過10年, 係我最長情嘅偶像, 因為我覺得佢為人同球品都係絕頂好。 如果唔係一早飛佢出局啦!  哈哈!   依家, 除左隊長之外, 最鐘意嘅仲有Palla。唔知真人嘅Palla係咪都係絕世好人呢?  都可能、應該、相信、有機會係啦, 我地接觸過下佢嘛。

你地嘅足球偶像又係邊個呢?    佢地已經退左役?  如果未, 你希望佢又可以為你心愛嘅球隊踢到幾多歲呢?