Part 11 - 首次遊熱拿亞

熱拿亞 ~ 意大利有名嘅沿海城市、郵輪碼頭, 又係航海家哥倫布 (Christopher Columbus)出生地。依家, 仲係Palla球會熱拿亞嘅所在嘅城市添, 當時去玩時真係估唔到呢。

據Lonely Planet所講, 熱拿亞起源於公元前四世紀, 一直係羅馬帝國其中一個重要港口。係意大利復興(Risorgimento)嘅領導者之一；而在第二次世界大戰其間, 熱拿亞係第一個意大利北方城市, 首先起來反抗納粹佔領同埋意大利法西斯份子, 在聯軍到來之前已經先行解放, 厲害喎。大戰後, 熱拿亞沿海地方發展快速, 可惜到1970年代, 大企業倒閉加上港口發展減慢, 導致熱拿亞開始衰退。幸好, 直至到1992年熱拿亞舉辦世界博覽會, 經濟再度開始增長, 而2004年熱拿亞更被選為歐洲文化之城 (European City of Culture) (今年定上年係利物浦???)。

5月3日, 星期六, 經過在都靈超過一星期嘅逗留之後, 終於又要say goodbye, 搭火車過熱拿亞了。從未到過熱拿亞, 所以好嚮往, 唔知同都靈有乜分別呢?  作為一個沿海城市, 應該比較多熱帶色彩?  應該有好多富貴遊客出沒 (因為有好多郵輪停泊)?

都靈有好多火車落熱拿亞, 大約兩個零鐘頭, 就見到熱拿亞喇。熱拿亞同都靈好唔同, 一眼看去, 好多山, 火車站上面就係一d依山而建嘅住宅, 好似香港島喎!!  好有歸屬感添, 哈哈哈!!

不過熱拿亞呢個城市, 真係就算依家每次提番都好驚。 話說個故事係咁嘅....熱拿亞有多個火車站, 我地嘅目的地係Genova Brignole。之不過架車只去到Genova Principe呢個站, 所以我地要在呢處落車, 再轉另一架火車, 搭一個站去Genova Brignole。呢度嘅火車站真係有心玩我地, 呢兩個站, 架架電梯都壞, 下下要拖住行李上落幾十級樓梯。我地要上樓梯, 佢就壞 (但落樓梯嘅電梯就worked喎!), 我地要落樓梯, 佢又係壞 (但上樓梯嘅電梯又worked喎!), 真係頂!!!  如是者, 次次都係咁!!! 

冇誇張, 我直到依家當一諗起樓梯 / 冇電梯, 都會即刻諗起熱拿亞。 好有陰影!!

仲有就係呢個地方嘅行人路係好凹凸不平!!  我個friend個行李箱未拖到去hostel, 已經"look"爛左一個 "look"!  至於當地人, 我地覺得當地人比較惡死同燥熱, 同都靈嘅人有d唔同。

將熱拿亞同都靈比較添....

汽車: 熱拿亞比較多人、多車, 尤其係摩托車, 多到飛起，同台北一樣咁多。都靈就以私家車為主, 電單車冇咁多。

環境: 熱拿亞比較熱鬧, 因為有個海港, 所以行下海邊都幾快活; 而海邊一帶多樹, 亦有水族館、舖頭、檔仔買野食, 整體比較有活力嘅城市。至於都靈, 比較寧靜, 似一個文靜嘅太太!!  市內多好grand嘅建築物, 歷史文化野好似多d, 可以去睇耶穌裹屍布、埃及博物館、皇宮、展覽館等。

噪音: 絕對係熱拿亞優勝!!  浮係d摩托車發出嘅分貝都已經非同少可!!  d噪音真係好煩。

交通: 都靈比較簡單, 旅遊點比較集中一點；熱拿亞就大少少, 要多d時間先可以攪清楚。 都靈街道呈井字形, 好易行。熱拿亞就多大街小巷, 容易行錯路, 不過d小巷就好有特色。

人: 豪無疑問, 我喜歡都靈嘅人多好多, 因為佢地比較有耐性, 亦好似友善d (唔知係咪咁啱啦), 呢度嘅人比較悠d。熱拿亞嘅人好似好急好燥咁。

親切感: 以一個祖記球迷而言, 都靈最有親切感啦 ~ 祖雲達斯根據地, 有球場, Juvestore, 總部, 同隨時擦身而過嘅祖記球員同球迷!!  

不過, 因為只在熱拿亞逗留左一晚, 體會不深, 如果留耐d再比較的話, 可能可以較為客觀一點。留番下次啦, 如果再去意大利時, Palla仲踢緊熱拿亞的話, 我相信我應該會再去熱拿亞一次的。

第一次來熱拿亞, 點都要去下d指定景點.... Piazza de Ferrari (Ferrari廣場), 呢處好優雅。好彩今日天氣非常好, 陽光普照, 藍天白雲, 影相出來效果都幾好。

熱拿亞舊城區 (Old City) 好多這類小巷, 好有特色, 值得一行。日頭好多遊客行, 所以安全不成問題。不過下午1-3點左右好多舖頭關門, 只得d食店同超市營業。但問題係, 行呢d小巷好易行行下唔知自已行左去邊, 不過最終又可以行番出大街ga喎, 好神奇。

Cattedrale di San Lorenzo (San Lorenzo主教堂), 熱拿亞嘅大教堂, 外面鋪上黑白色雲石嘅哥得式建築。

熱拿亞嘅熱爆景點係 Porto Antico (ancient port), 好有熱帶小島風情。 全熱拿亞市我最喜歡呢度一帶。 除左巨型遊輪停泊, 仲有好多遊船泊左喺度。

講到熱拿亞嘅水族館 (Acquario di Genova) 係全歐洲規模最大, 我地於是乎每人比左 13歐羅入場。第一, 入面太多人, 兼太多一家大細, 噪喧巴閉, 完全冇心機冇心情慢慢地欣賞; 第二, 全歐洲規模最大, 但都唔知有冇我地海洋公園10分之一, 誇大其詞!!!  d所謂水洋生物, 真係唔同得Ocean Park比啦, 我呼籲想入場嘅人, 來香港間參觀, 同埋將嗰10幾歐羅用來食pizzas抵好多。不過....始終都叫做見識下啦。

水族館裡的水母 ~ 好大隻呀, 比佢炸親的話非常大件事呀。

經過一日辛勞, 又到吃番餐嘅時間喇!  有friends上年去左熱拿亞, 介紹我地一定要幫襯呢間pizza舖。舖頭就在我地hostel隔離樓, 極之方便。裡面有位侍應, 同Orlando Bloom好似樣, 所以係...非常靚仔的, 哈哈!  最衰只係住一晚, 如果唔係一定再去食過...留番下次啦。餐廳佈置有d似中餐館??!!

每人半個面盤咁大嘅pizza, 呢個係薄批, 批上面比較多少少料。可能各位都知道, 意大利嘅pizzas, 上面都唔多有料的, 唔似美式或港式pizzas咁誇張的。料少, 但係味道就超正, 真係太好味。我在意大利嘅經驗係, 有好難食嘅意粉 (好多添), 但就冇唔好食嘅pizzas。

食飽就返上hostel, 因為要準備明日嘅旅程。後悔只留熱拿亞一晚, 太趕喇.... 有機會應該最少留多一至兩日, 慢慢欣賞下景色。 呢種非常普遍嘅升降機, 看似牙煙, 實在好安全, 不過呢架 lift 好細。

~~ 穿梭意大利2008 ~~ 待續 ~~