Part 10 - 暢遊摩德納 & 帕爾瑪

5月1日係意大利假期 (勞動日), 所以4月30日嗰日放學後, 我地就來個兩日一夜 ~ 摩德納 (Modena) & 帕爾瑪 (Parma) 聯遊。

火車到達摩德納時, 已經晚上8點多少少, 天未算黑齊, 不過所有景點都冊晒門。

意想不到, 晚上嘅摩德納係好靜, 非常靜, 人都唔多個, 有d得人驚!!!  之前plan行程時, 一心想在帕爾瑪住一晚, 但當我在網上開始搵帕爾瑪嘅住宿時, 發現呢度好少住宿供應, 而且價錢亦好貴, 間間普普通通嘅hostel或hotel都起碼100歐羅一間房一晚 (2人房)!  想平d, 除非係揸車住 motel或好遠嘅 B&B, 又或者住鬼死咁遠嘅 youth hostel。 

之後, 無意中我想起不如住帕爾瑪附近嘅城市啦, 住一晚第二朝咪坐火車過帕爾瑪玩囉。然後就在Lonely Planet發現天大秘密 ~ 摩德納嘅youth hostel就在火車站附近 (步行10分鐘左右), 而且1間雙人房連私人浴室+toilet, 每人只需 17歐羅!!  竟然有叫著數嘅Youth hostel, 我地就即刻book!  過程中只需向香港嘅YHA比$100申請一張YHA card, 以便到時入住。在網上同呢間youth hostel訂房, 1毫子deposit都唔駛比, 又唔駛比低信用卡號碼作booking之用, 太好喇。

呢間就係我地住嘅房間嘅一半, 其實間房有3張床的。 另外我地去到先知, 原來我地嘅bathroom是在房門外, 不過有自已keys出入, 第二d人入唔倒去的。 Youth hostel供應床單, 每人只需17歐羅一晚, 很好ga喇。

到達摩德納時, 天還未黑齊; 不過當去完youth hostel, 攪好check in手續後再出來時, 天已經黑晒囉。 依家最重要就係醫肚。 今日假期前夕, 好些食店冇營業, 在唔多選擇下, 去左呢間好多人食野嘅地方 (穩陣d, 多人去食野嘅地方水準起碼靠得住掛)。

pizzas簡直如同香港嘅米飯, 唔食佢的話, 點似係黎左意大利呢??  又係成個面盤咁大個嘅薄餅!!!

摩德納係意大利 (世界三大男高音之一)嘅 Pavarotti (巴伐洛堤)嘅故鄉, 亦有一隊意大利聯賽足球隊 Modena。唔知同今日 (5月1日)係假期有冇關系, 朝早差不多9點, 但係街上都係非常之少行人。

呢個地方嘅建築物好靚, 好有色彩。市中心非常咁細, 唔駛半日都行晒。

半個鐘頭左右嘅火車, 就將我地由摩德納帶到黎帕爾瑪。帕爾瑪同摩德納好似係兩個世界, 來到帕爾瑪, 到處人山人海, 踏單車人隨處可見。

吸引我地想去帕爾瑪嘅原因, 有出名嘅Parmasan cheese同 Parma ham (芝士/火煺)。不過因為今日係假期, 9成9店舖關左門, 所以一口芝士同一片火煺都買唔到, 極之可惜。

唔記得呢間係咪就係Parma嘅cathedral (主教堂)添.....

呢間係 baptistry (洗禮堂), 始建於1196年, 經多次停工, 終於在1307年完工。外面鋪有粉紅色嘅雲石, 可惜經過時間洗禮, d顏色已經冇咁鮮豔囉.....意大利嘅洗禮堂, 一般係八角形的, 呢間都唔例外。

由於時間尚早, 我地去埋 Parco Ducale (Ducale公園)行下。呢個park都好巨大下, 好多人在此睇書晒太陽, 或者來個picnic.....題外話, 公園內有間cafe, d野食幾好味, 重點係唔貴。最印象深刻係裡面有位waiter, 極之靚仔!  我重伸, 我地係為左食lunch而入去, 先發現d令眼睛吃冰淇淋嘅事情, 哈哈!! 

Piazza della Pace (和平廣場)係由火車站入市中心時必經之處。個park超大, d草又綠又靚又乾爽, 好正呀, 好想即刻瞓落去呢!!

昨日在都靈時落雨落到9彩, 不過帕爾瑪呢度就陽光普照, 我都要盡情享受下呢度充沛嘅陽光先! 我地在Piazza della Pace晒左2個鐘頭太陽先依依不捨咁行番去火車站, 搭車返都靈。

~~ 穿梭意大利2008 ~~ 待續 ~~