今日睇報紙, 據講話一個駕駛戒款車嘅司機, 在駕車途中因為避狗而炒車, 成架車反轉。見到呢單消息, 我就想起自己一個類似嘅經驗。
兩年前嘅年初二, 入元朗拜年, 見好耐都冇揸過車 (個車牌唔知攞黎做乜!!), 於是就借我細佬架車來揸下, 想練下車。我細佬架車又唔係 "林寶堅尼"型跑車, 但唔知何解D位 "坐" 得好低, 坐左上去都唔夠高, 睇唔清路面 (大鑊啦)。
由於咁耐冇揸過車, 就搵D冇人嘅地方揸下, 於是駛左入元朗工業邨入面, 因為放農曆年假, 個度都冇乜人。其實由市中心揸去工業邨條路, 我已經騰晒雞, 因為隔離D車迫晒埋黎.....揸得慢D都已經比人響安。
揸到入工業邨, 以為OK啦, 因為冇乜車, 人都唔多個嘛, 係一條直路上, 只係揸 40, 50咪, 揸揸下, 嚇鬼死, 無情情有隻狗, 發神經由右面衝過來, 我咪嚇到即刻扭向左!! 成架車差D撞埋大樹之前一刻, 坐我隔離位嘅本人細佬, 大叫, 叫我 "轉番右, 即刻轉右"!!! 跟著我又即刻扭呔急轉右! 條路係咁比我 S形扭來扭去左一輪!!! 我同我細佬嚇到半死, 架車差D反轉!! 驚魂未定之際, 我地慢駛番, 望番轉頭, 隻狗唔知去左邊喎!!! 
我地驚得滯, 停左係一個地方冷靜左一陣.....攪乜鬼!! 我細佬話, 佢差D以為新年流流會就咁死!! 真係好彩, 因為先前本來後座坐左另一個大人朋友同埋兩個細路哥, 但我同我細佬都話覺得佢地坐埋呢架車唔多安全 (本人駕駛技術好嚇人嘛...), 真係好彩佢地落左車之後先發生呢件驚險事件, 唔係兩個細路仔有乜損失, 我點賠番兩個細路比人地爸媽!!!
我細佬話, 有D狗對車軑好敏感, 會追著開緊嘅車輛的!! 之後同我老細講開呢件事時, 佢都話, 佢每年去洪水橋拜年時, 都見到有D唐狗係咁追住行駛中嘅大貨櫃車, 好似發狂一樣!
究竟狗係咪真係有個咁嘅嗜好的?? 我細佬話, 當時我應該寧願架車繼續向前行, 而唔係閃避隻狗, 佢話雖然係衰D, 但如果架車避狗, 架車裡嘅人隨時全部有難!!
我都唔知應唔應該避狗, 唔避, 隻狗死硬, 但唔避, 架車裡嘅人又好大鑊, 都隨時死喎!
自從呢次之後, 我都唔敢再揸我細佬架車, D位 "坐" 得咁低對我來講已經難揸, 再想起那次經驗, 真係好鬼驚....
No comments:
Post a Comment