雖然知道呢個節目有關咖啡, 陳豪仲會去都靈 (Torino)添, 但因為節目播映時間係逢星期日 10:00-10:30pm, 呢個黃金時間, 我通常都睇意甲直播, 加上之前睇過一集呢個節目, 播得好亂, 一時影下都靈, 一時影下台灣, 一時又去左印尼或者唔知邊度, 睇到我一頭霧水, 所以我放棄左睇。
點知前幾日個星期日, 收到個電話叫我即刻轉去睇陳豪個節目, 話講緊 "都靈"!! 攪到我即刻轉台!
先講清楚, 本人幾鐘意陳豪, 所以對佢全冇偏見。但我睇左一陣個節目, 有樣野唔多頂得順, 就係佢在鏡頭前講嘅意大利文 (先旨聲明, 本人意大利文水平極低, 唔應該批評別人, 不過佢真係講得好怪呀)。其實佢有冇問清楚點正確咁講嗰幾個意大利文字架? 佢講得超級生硬, 同埋, 講到好核突呀。
Gelato (singular, 解意大利雪糕), 佢係咁 "玆 lat 圖"! 跟著又不斷同D整雪糕或者咖啡嘅當地職員重複講 "perfetto", "buono" (加埋D手勢), 但講得好奇怪, 又生硬...., 仲有講 "caffe' "都講得好誇張, 查實駛乜講到咁實牙實齒呀??
以上純屬本人廢話..... 希望唔好激親各位陳豪迷!
另外, 佢在都靈介紹嘅嗰間飲Bicerin嘅地方, 我以前去過, 不過唔覺得特別好飲....但係在那裡發生左一件攪笑艷遇事件! 而之後佢介紹食gelato嘅店, 我本人就大力推介!! 我去左幾次都靈 (其實只係三次...), 每次差唔多每日都幫襯, 間舖頭在都靈好出名, 門外成日排晒大隊等買gelato, 每個cone只係 1.5至 2 euro, 都幾多味供選擇, 間舖在市中心有最少兩間分店。
我一位朋友話之前一集有講都靈市另一間好出名食甜品嘅caffe' ~ Caffe' Torino, 我本人都高度推介, 淨係食氣氛都 120分!! 個間caffe'有好多年歷史, 我之前在 blog講關於遊都靈嘅文章都提過的。呢間Caffe'野食唔算平, 但叫做去睇下見識下; 佢地D甜品種類勁多, 款款都整得鬼死咁靚 (而且味道唔太甜, 接受到)。
都靈嘅朱古力據講都非常出名, 佢地好似每年都舉行一D活動, 你買張pass, 可以試好多間舖頭賣嘅朱古力...不過我每次都遇唔啱舉行時間, 所以從來冇食過 (而且D朱古力一D都唔便宜)。 有D舖頭嘅西餅同埋甜品賣相超靚, 但口味啱唔啱我地香港人.....我上年住當地人屋企時,佢請我食左一D, 只可以講, 甜到漏! 太甜, D cream又多, 食到打冷震, 連 host同佢兩個朋友都話太甜唔好再食!!
好掛念都靈呢......
............
No comments:
Post a Comment