卡拉瓦喬 (Caravaggio)

不知不覺間, 竟然已經寫第300篇文!!  未到一年, 寫三百篇 blogs....對於一個口水多過茶嘅我來講, YAHOO BLOG真係一個可以發下噏風嘅好途徑。 

在呢個網頁裡, 除左可以同本身認識嘅朋友多左聯絡外, 仲因此識左一班新朋友 ~ 祖記嘅自已友, 其他球會嘅球迷, 喜歡旅行嘅朋友等, 係我2008年最大嘅收獲。  雖然YAHOO BLOG久唔久神經發作, 但真係一個好發明。唔好講笑, 茫茫人海中能夠識到成為朋友, 絕對係一種緣份 (唔駛諗錯隔離, 哈哈)。

慶祝創下寫第三百篇口水文嘅紀錄 (哈哈哈, 其實有乜咁好紀念呢), 不如就講D同我超喜愛嘅意大利有好大關系嘅野啦!! 



剛剛睇完一本書..........................所以想分享一下...........

藝術長廊系列, 今期第7期, 係講意大利極著名嘅畫家 Caravaggio (卡拉瓦喬)。

Caravaggio係另一位我幾喜愛嘅畫家。查實我唔係讀 Arts, 對藝術認識非常皮毛。睇畫, 我唔識長篇大論形容畫嘅意境、意思、含意, 純粹只係憑直覺而覺得一幅畫靚唔靚。親眼欣賞過Caravaggio嘅名畫後, 好鐘意。

對我地來講, Caravaggio或者未必有佢同胞達文西 (Leonardo da Vinci) 或馬可孛羅 (Marco Polo) 咁出名, 但對意甲球迷 (特別係祖記球迷)來講, 一講一件事, 可能大家即刻會有D反應。

當年廸比亞路嘅冒起, 令到祖雲達斯決定賣走巴治奧.... 擁有祖雲達斯球會嘅家族領導人Agnelli, 當年就廸比亞路嘅冒起, 講左一個小笑話: 佢將巴治奧比喻作Caravaggio, 而廸比亞路就比喻為 Pinturicchio。自此, 兩位球員就得到此特別而又高尚嘅綽號。

Caravaggio同埋Pinturicchio都係意大利有名畫家, Caravaggio更係Pinturicchio嘅師傅。兩位畫家都擁有卓越 + 細膩嘅筆法, Agnelli以Caravaggio比喻巴治奧嘅地位, 無論點樣, 都會比廸比亞路更崇高, 籍此化解外界嘅猜測疑慮。

Caravaggio, 1517年生, 死於1610年, 享年38歲。性格剛烈, 脾氣火爆。據書中講, 佢係雙性戀者 (更有可能係同性戀者)。

下面兩幅Caravaggio嘅傑作, 都收藏於羅馬一間著名教堂 ~ Santa Maria del Popolo。

因為曾經參觀過呢兩幅畫作, 令我喜歡上Caravaggio。兩畫嘅題材都係有關聖經故事, 耶穌嘅門徒。畫作之中, 光暗有極大對比, 畫裡表現出懾人氣勢, 好有戲劇性。在陰暗嘅Santa Maria del Popolo教堂中, 開著射燈看著呢兩幅名畫, 嗰種強烈嘅感覺, 唔識形容 ~ 或者叫氣勢迫人, 場面震撼。

相信網上必定有好多介紹呢兩幅畫 (或其他Caravaggio作品)嘅專門討論, 有興趣的話, 大家可以再深究, 在此不必由我呢個門外漢扮專家多講。



The Conversion of St Paul on the Way to Damascus (聖保祿的皈依) ~ 1600-1601年

The Crucifixion of St Peter (聖伯多祿釘於十字架) ~ 1600-1601年