開倉平賣!

今朝放左半曰假, 因為屋企附近有個電器用品開倉大平賣....平生首次去呢種開倉 SHOW, 但因為今次有實際 "目標", 又見係在家附近舉行, 所以就去看看。

我諗住去到若果太多人的話, 就唔會排隊, 走人算數...早上10點開門, 我地9點去到, 已經有大約20人排緊隊, 好彩開倉在工廠大厦2樓, 我地都算排得前; 如果要排隊排到出街, 咁啱被 friends見到唔係幾好意思嘛....  聽前面一位男士講, 排最頭的人, 竟然今朝5點來到!  至於第5個人, 都7點已到, 乜佢地咁早!!!  我估佢地咁早係因為今日有5部冷氣機, 每部只需 $300!  大陸名牌 "格力"冷氣機....。 我嘅真正需要, 係一部飛歌牌陶瓷暖風機 ($390), 比正價平好多; 同埋屋企個燙斗太舊要換。

可以的話, 睇埋洗衣機, 屋企個洗衣機, 一到乾衣個part, 就好似發生7級半地震一樣, 噪到鬼, 據講係機裡嘅避震器可能鬆左, 攪到係咁狂震, 但修理勁貴 (超過1,000蚊), 當然唔整啦.....我屋企用開歐洲牌子嘅洗衣機, 我地唔係有錢得滯所以買歐洲牌子, 更加唔係崇洋!!  係因為地方問題, 焗住用!  我地被D歐洲牌子嘅洗衣機激鬼氣, 呢D機一般已經比較貴, 最慘係好易壞, 整又麻煩又貴。我地換過用過不少洗衣機, 次次都問題多多....

每日限量20部嘅暖風機被我地買到, 相當好!!  至於燙斗....Morphy Richards嘅燙斗係咪儍的???  個燙斗好似個啞鈴咁重?  邊有香港人買先得GA???? 菲傭用佢地D燙斗燙衫, 手臂好快有老鼠仔。 反而睇中左呢個牌子嘅電水壺 (kettle), $240, 個壺有個 "Keep warm" 制, 可以保住D水嘅水溫。至於另一目標洗衣機, 睇唔啱...唔買無謂野囉, 所以目標到達就快脆"鬆"人喇。

買完就自己搭車拎番屋企, 門外好多人排緊隊等入去呀...。