去camp記

讀緊嘅 course, 在半年內要去4次camp, 所以呢半年相當之唔得閒。

啱啱去完camp, 初時以為氣溫跌到得11度會好凍 (因為要去離島怕會大風), 所以仲著住件fleece風褸, 點知未去到長洲已經出汗, 未行到上山上已經要除低件外套 。

近幾年, 天氣越來越熱, 加上香港較潮濕, 所以認真攞膽。唔係話乜, 舊年8月時去印尼巴里島, 雖然氣溫日日都有成30幾度, 但係完全唔熱, 仲非常爽, 4日裡未流過1滴汗, 同香港差好遠; 返到香港嗰下, 一出架飛機, 即時感到好濕好焗好辛苦。

所以我最喜歡秋天同冬天嘅香港....春天太濕, 夏天最大鑊, 未來臨就開始憂慮....行幾下就開始出汗, 有時一日要沖幾次涼添。冇理由由朝到晚開著冷氣嘛 (一來電費會好貴, 二來成日開冷氣對身體唔好), 所以唯有一日提住自已 ~ 流下汗當排出身體毒素啦!

依家呢個時候嘅香港, 真係幾鬼爽呀。

坐船由香港去長洲時, 影左D相....雖然曾經喺第二度住過, 但始終都係覺得香港最好, 一見到有香港嘅報道介紹, 都好開心好興奮。香港真係好靚, 希望大家都珍惜有呢個咁美麗安全又活躍嘅家。

 

有次, 同個外國朋友睇雜誌時, 雜誌有一部份介紹香港, 加幾張類似以下嘅相, 佢話香港好靚, 又話, "香港好似New York呀, 希望第時有機會可以去香港旅行呀", 當時我真係好開心好感動。