基奧雲高轉戰熱拿亞/英超??

近日有關祖記小將基奧雲高 (Giovinco) 再度不滿在球會比賽時間過少, 要求離隊嘅傳聞再度出現。消息由之前英超韋斯咸 & 阿仙奴對基奧雲高有興趣, 變成祖記高層屬意將基奧雲高外借至意甲嘅熱拿亞。

基奧雲高在今季意甲以來, 只踢過6場, 更只有2次正選上陣, 少得可憐。

毫無疑問, 年青當打又有巨大潛質, 任誰都唔想將時間白費在等之上太久。等 ~ 冇問題, 但究竟要等幾耐先係問題。個人雖然唔係基奧雲高粉絲, 但我好欣賞佢嘅球技, 所以唔希望祖記浪費人材。

但祖記又可以如何靈活處理得到問題呢?  祖記傑出青訓產品太多, 人材鼎盛; 祖記每季有眾多比賽, 其實好多球員都可有出賽機會, 但祖記卻仍舊大部分時間只倚重舊有主力, 例如隊長, 尼維特, 甘莫蘭尼斯等 (偏偏佢地個個現在都仍然表現出色), 所以班 "細嘅" 究竟何時可以出身兼出人頭地???

個人覺得, 依家祖記並唔係面對青黄不接問題, 而係唔敢起用新一輩球員。查實我唔太明白, 何解隊長乜野大小賽事都係正選上陣, 又成日差唔多踢到完場?  係唔係祖記高層, 甚至係雲尼亞里連一場波都輸唔起?  雖然隊長係信心保證, 但總唔能夠攬住隊長一世!  莫講係基奧雲高, 連伊亞昆達嘅上場時間亦極少, 極度浪費人材!  你比人踢一場正選, 接住叫人坐後備席5-6場, 有乜機會比人發揮出應有水準呢?

相比起基奧雲高, 馬治斯奧 (Marchisio) 嘅 "演出"次數已經算係較理想 (只因為保臣受傷?  定係祖記中場欠人?)。就算係廸切尼 (De Ceglie), 呢排又唔多見佢有得上陣喇。可以話, 雲尼亞里大多數時候係差不多冇乜點變陣, "超"靈活! 

熱拿亞基本上已經成為祖記二隊!!  PALLA, 基斯薜圖, 再加前祖記嘅Paro, 米蘭列圖, 加斯巴朗尼, 奧利華拉, 史古利...連領隊加斯柏連尼, 都同祖記有莫大淵源。莫非祖記想在意甲開多一隊??  除左加斯柏連尼對祖記球員特別垂青, 阿仙奴嘅雲加似乎都對意大利小子們有 "好感", 好耐以前都已經有報道佢有興趣羅致PALLA, 依家見基奧雲高發展未如意, 想收購甚或外借佢過阿仙奴都唔出奇。只不過, 意大利球員普遍較 "痴家", 而英超同意甲踢法有別, 加上好多 "意甲人" 英語好多時係 "有限公司", 要出國去英國揾食看來非容易之事。