意甲: 祖雲達斯 vs 羅馬 1:0

終於不枉我"夜媽媽" (3:30am)起身睇波，支持祖雲達斯，昨晚場波雖然只係主場小勝首都球隊1球，但全場祖記整體表現出色，個個球員都拼搏十足，未有放軟手腳，實在睇得好開心。而且覺得佢地似番以前 (未降班前)嘅祖記, 有氣勢有霸氣。

全場比賽好緊湊刺激，尤其上半場，祖記簡直係壓著羅馬黎踢，而那位羅馬王子就好似唔多見人, 又唔多落力踢咁。唔知羅馬係咪真係留力週中場歐聯賽事?

上半場差不多法定時間到時，隊長廸比亞路憑著一個靚到爆嘅罰球領先1:0。個罰球真係勁度十足，角度超正，而伊亞昆達亦好醒，在個球係佢頭頂行過嘅一刻，即刻縮低頭，等個波過，而對方龍門Doni亦無從撲救。之後都冇1分鐘，羅馬反擊，歷高達利差d將個波踢入自己龍門，好彩條門柱都幫左主隊 (好彩咋，真係差d嚇鬼死), 我諗歷高達利自己都大呼好彩。

下半場有段時間羅馬踢得比較積極，而且又作出一d換人行動，祖記都換出左Camo同查斯古特 (其實一早應該換查斯古特走，佢好缺態)。加時4分鐘，終於下半場在再無入波後吹雞完場，祖雲達斯勝羅馬1:0。

呢場波對祖雲達斯意義重大，首先可以挫到羅馬嘅氣勢 (雖然呢排羅馬都狀態麻麻啦); 而且已經縮小左同羅馬在積分上嘅距離，依家只縮小至1分。雖然要追頭位嘅國米有好大難度，但如果可以以聯賽第二位完成今屆意甲，咁就起碼唔駛踢下屆歐聯賽外圍賽。

個人認為應該試下比Palladino出多d場，近來查斯古特豪無表現，應該比Palladino多d落場爭取表現。球員餓下波，咁等到有得踢時都會踢得特別醒神積極 (好似曼聯個費查幾鬼厲害)。而且Palladino係祖記未來希望之一，要積極培養新一代。

祝祖記繼續發揮理想!!!

另外....剛剛睇左費倫對卡坦尼亞，後個2個入球都入得好靚!

保方表現當然一流。

 

Zebina, 有次(好似有2次或以上)佢竟然自已帶波落到對方底線，真係被佢嚇死，佢唔係後衛咩，佢踢到咁前，佢個位邊個睇呀?  唔係又要其他隊友 (歷高達利 & 基亞連尼)做埋佢d野呀??!!

 

歷高達利其實表現幾好，非常集中, "san"左好多波走，又mark到對方球員實一實，不過冇記錯，佢上半場有一次大意走漏托迪，令到托迪差d入倒一球；另外就在救一球時，差d將個波踢入自己龍門，好彩個波撞柱彈走左，有驚無險。下半場佢就表現很好很好。

 

基亞連尼今仗表演ok。 佢身材一流, 不過仍然係經常小動作多多，古古惑惑咁。有時覺得佢係祖記一個計時炸彈!

 

Nedved拼勁十足，好犀利，簡直比佢120分呀!!!

 

妙絕嘅罰球，來自偉大嘅.....廸比亞路。

廸比亞路嘅興奮表情，同托廸嘅無奈。

 

隊長又進仗一球喇，恭喜恭喜。

 

贏波開心嘅人，當然唔少得雲帥。佢都變陣變得極速 (90分鐘內來個大變身)。