有關廢柴球証Dondarini

*** 今晚最新消息: 意大利一份體育報 (La Gazzetta dello Sport)話呢位球証據講會被罰去意乙做球証兩個月; 呢個球証原來係博落尼亞人黎喎 ***

上星期六意甲里賈納對祖雲達斯嘅賽事完後, 傳媒不斷作賽後報道，意大利個邊已經有人起左呢位"疑似"黑哨球証個底。唔知大家有冇睇今日嘅蘋果, 體育版有呢段報道:

********************************************

2008年2月25日蘋果日報:

疑似黑哨大細超，祖記真係輸得冤枉

前晚除左阿仙奴補時輸12碼，俾伯明翰迫和外，祖雲達斯亦因補時輸12碼，作客負里賈納1:2。球波，施素高禁區內飛身解圍碰到敵方球員，係就係危險動作，但有d球証可能判禁區內開自由球；判都唔緊要，問題係祖記調番轉有幾次類似情形，但連自由球都冇，確係大細超。意國傳媒賽後為今場球証當達連尼起底，原來佢係前年「假波案」被查問主角之一，據講以前吹里賈納都有問題。如果真係黑哨，祖記真係輸得冤枉。

**********************

咁今次乜水係幕後黑手 (如果真係有的話)?  國米 (因為想贏聯賽冠軍，所以要買兇趕走所有尾隨球隊)?  羅馬 (要踢走祖記"又做"阿二)?  里賈納 (要護級攞分)?  祖記已經補償左，以後唔好再針對祖記喇!  希望意甲可以攪得有聲有色，而唔係再攪醜聞。 

不過依家點追究都冇用了....3分已無估失去，只好叠埋心水，等明晚睇都靈打吡，落力喺電視機面前幫祖記打氣!   今次一定要搵拖連奴出氣先得!!!  Forza Juve!

另外，阿仙奴位達施華傷得好恐怖呀!  睇倒報紙放大佢傷左瞓喺地非常痛苦嘅樣，真係替佢難過。死啦，隻左腳好似斷開咁好得人驚呀!  馬田泰來駛唔駛呀?  攞人老命，痴線!  佢唔知依家有乜感想?