Part 2 - 都靈多好人!

上回講到，我去都靈朝聖 - 除左去朝拜祖雲達斯之外，其實亦因為好想去睇好出名嘅都靈裹屍布。

一朝早，諗住市中心間Juvestore應該冇咁早開門。所以諗不如係hotel歎個早餐先，然後去一去參觀擺放住裹屍布嘅大教堂 Duomo di San Giovanni Battista，跟住先去Juvestore掃貨。

因為之前個晚只係食左個在香港帶過去嘅合味道杯麵，所以第二朝肚餓到飛起！ 去到酒店個小型canteen，人都唔多件，唔通真係太早 (8am)?  定係間酒店冇乜人幫襯呢?

.....唔怪得個度人影都冇。事關個度連d野食都冇乜喎!  我行埋去張擺野食嘅餐枱度.....吓!  乜得d一包2包嘅toast bread同d麵包仔咋!  d麵包細細個，而個d toast bread每塊只得好似我手掌咁大 (我手掌好細咋)，獨立包裝，隔離就放左d一盒仔2盒仔蜜糖、果漿咁比你搽黎食，除此之外，乜都冇喇！ 乜意大利人食d咁嘅麵包仔夠一個朝早哪咩?  好彩除左d麵包，都重有杯capuccino飲下。 大家估下我第一朝係度食左幾多包迷你 toast bread?  答案係差不多10包!!  我張枱放滿晒拆左出黎嘅麵包袋, 好鬼外眼添!  我諗佢地以為我未食過野好耐, 哈哈哈!  鬼咩，咁鬼死細塊一包!  同埋....我浮係開袋都開到手軟! 

呢度就係前面我所講, 我住嘅個間 hotel嘅迷你餐廳仔，食早餐嘅地方。係咪人都冇件呢?  我全程 (係多日以來)都冇見過其他住客在此享用 "精美早餐"!

我所講嘅"精美早餐"!

終於食左早餐，出發!  因為要買一d物品，所以就先入左去一間舖頭買野。舖頭裡面個售貨員竟然識講英文，太好喇!  不過佢跟住就好好奇 (或者係八卦), 佢問我黎都靈做乜，我就吹下水話黎旅遊，點知佢表現出非常不可思議嘅眼神過我睇，話 "你黎旅遊?" 。乜我唔似旅客咩？我似黎過期居留，然後做黑市勞工咩？ 咁我咪同佢講，我黎睇球賽，因為我係祖雲達斯球迷。

唔講由至可，一講佢即刻講我聽一件驚天大事件!  佢話祖記球員聽日可能係 #$&%*&呢個地方出現 (當時佢指手劃腳指個方向我睇)!!!  嘩！係真唔係?  佢講度似層層，不過我就有少少懷疑真實性，邊有咁着數過我呀？而且我諗到時實超多人，睇鬼睇倒咩，不過照例都要多謝佢講我知啦，因為佢可能真係好心話我知。預告比大家知，原來個saleslady講嘅野係真!  我伸見到好多球星添呀, 直頭係在你隔離行過個隻呀！ 呢d順住落去再談。

都靈坑渠，我影低佢，係因為坑渠上面寫住 "Citta' di Torino" (City of Torino)....哈哈!

呢日其實仲有一件奇事，話說我離開先前間舖頭，去搵間大教堂，但唔知點解，睇住個地圖，左睇右睇，都伸未locate倒我嘅位置。 見兩位女士係度傾梗計，就走埋去問路。其中一位女士就好熱心話我知方向，但我都唔知佢講乜，因為佢係咁講意大利文!  我只識好少意大利文，都唔明佢講乜。但係...佢竟然唔同個friend傾計，走去帶我搵路!  佢一路行，一路講 "呢間舖呢 xljlgdljsd, 那個間舖呢就我個friend開.....", 跟著仲開始越講越深, 我係度扮明，笑下。故事太長，終之最後係，佢帶我去左一個本來我plan好要去，但未去嘅景點，正呀!  而且佢仲竟然請我食我在都靈第一杯嘅gelato (意大利雪糕)!!! 

好奇妙嘅都靈之旅未結束，待續.......

問路竟然伸有雪糕食，你話幾着數呢?   個位超好人女士話呢間雪糕店好出名，雪糕好好味，冇錯，我讚同!!!

本來我第一站就係黎睇都靈裹屍布。 呢塊布相傳係曾經包裹着耶穌嘅屍體, 屍布不作公開展覽，我地只可以隔着玻璃看。 可以遠看我都已經好開心。