歐國杯 死亡C組: 意大利打敗法國 2:0!!

太好喇!! 意大利打破左30年宿命, 在90分鐘內攪掂法國, 踢出個2:0, 逃出左生天, 可以晉身8強喇!!!  好野好野!!! 

    

 

意大利殺雞成功!!  激殺禽流感!!! 

 

Goodbye法國人!  我地打破左宿命喇, GREAT!!!

 

逃出生天, 下仗惡戰西班牙!!!

昨晚喺蘇黎世 (Zurich)進行嘅死亡C組 ~ 意大利對法國賽事, 真係睇得緊張刺激。實在太替意大利担心, 所以每當雙方埋門時我都好肉緊; 加上唔知同時比賽緊嘅另一場比賽 (荷蘭對羅馬尼亞) 點搞法, 所以一路睇一路驚。今場我地終於冇被幸運之神玩殘…. 反而, 法國應該係非常黑仔, 事關開左場冇幾耐 (7分鐘), 佢地件列貝利就要傷出。 咁嘅話, 真係幫左我地一大把, 事關佢係法軍最危險最有威脅嘅球員。冇左佢, 我地就安樂好多、放心好多啦!! 

 

再過冇耐 (好似係大約24分鐘左右), 東尼在對方禁區被法軍嘅艾比度 (Abidal)踢跌, 取得一個珍貴嘅12碼, 而且艾比度仲要領紅被逐, 佢地咁早就要打少一個, 對意大利直頭就係天大喜訊啦!!  

 

個12碼由派路主射, 一射入網, 個球入得非常漂亮。因為派路久唔久都射失過12碼, 所以我都好驚佢有乜閃失…好彩, 佢不負眾望, 射入球靚12碼, 為意大利領先 1:0。

 

上半場東尼多次差少少就入到波, 但唔知攪乜, 就偏偏入唔到!  佢今個月係咪得罰左人, 被人打小人黎呀??  邊個知道點幫佢解魔咒呢???

 

黑仔強 ~ 東尼....  希望你快d有波入啦!!

 

下半場有相當一段時間, 法國都踢得幾壓迫, 亦有數次埋門機會。最緊張個次當然係保方救出左賓施馬嗰球靚罰球!  保方果然厲害, 仲盡晒手剛剛拍走左個波, 佢果然係意大利嘅鎮山之寶。

 

意軍嘅廸羅斯主射嘅罰球, 多得古古惑惑嘅亨利加多腳鬼鼠腳, 攪到個波改變左方向, 入波!!!!!  意大利領先 2:0!!!  因為之後冇幾耐時間, 荷蘭亦由雲佩斯入波, 將賽果增至2:0, 即係話意大利絕大機會進身8強, 好野!!!!  電視畫面影著一d意大利球迷講電話同歡喜若狂嘅樣; 同一時間, 我都咁啱同friends通緊電話報喜訊, 又send SMS報料!  開心嘅心情真係難以形容。

 

能夠進身下一round, 進入8強, 真係替意大利隊高興!!  作為意大利球迷, 我地要求好簡單, 就係意大利踢好波, 贏足每場! 

 

下場 ~ 8強 ~ 意大利會大戰西班牙。西班牙第一場係威係勢, 仲有韋拿連中三元; 不過之後似乎無以為繼, 有失準嘅勢。咁就啱晒意大利喇, 因為意大利傳統上比較慢熱, 咁星期日晚場8強戰咪可以打到西班牙一仆一look囉, 哈哈哈!   有少少担心, 係下場將會冇派路同加度素。不過我地仲有件秘密武器阿基蘭尼可以用。雖然今場卡斯辛奴未有波入, 不過佢走動真係好活躍, 好生猛, 唯獨暫時同隊友未係非常合拍, 有時欠左少少默契。不過相信假以時日, 問題應該自動被解決!!  另外今場冇出廸比亞路, 但相信佢唔會好失望掛, 事關只要球隊繼續贏波, 繼續進級, 佢不怕冇得落場。

 

祖記球員基亞連尼今場繼續正選上陣。

格羅素表現非常出色, 佢球罰球差少少就係入球喇。

因為已累積兩黃, 所以加度素下場需要停賽。

鄧帥, 好在你知道要改革嘅重要性!!!

認唔認得呢兩個昨晚電視直播時不斷見到嘅意利粉絲呢??  帶住眼鏡嘅現代版Gladiators! 

 

Forza Azzurri!  期待6月23日 2:45am在維也納舉行嘅8強戰 ~意大利對西班牙!!!