新世代家長 ---- 之一

之前好似講過下依家D細路 (主要係我接觸嘅補習學生) 嘅行為同思想。今次好想講下一D家長。

有D家長真係幾奇怪, 以為自己請位補習導師, 比少少錢就大鬼晒。近日有兩單事件發生在本人身上, 我都唔識形容, 究竟係事勢變左, 家長心態變左, 定係本人落後於今日形勢呢?

事件一:

大約兩星期前, 我收到補習介紹所嘅電話, 呢位女仔話, 有一位家長 (下稱: A), 住在我屋企附近, 想搵補習老師。A女士應該係想搵現職老師, 但agent就推介下我咁啦。呢位家長真係煩到無輪!!  agent來來回回同我, 以及A女士通話數次。先係: agent話A女士想問我對香港教育制度有幾熟悉!!  然後, 第二個電話, 就想知我對佢個仔間學校有幾熟悉 (佢個仔係讀香港區一間名男小學), 有冇教過呢間學校嘅 P.5 & P.6。跟著, 又問我有乜plan教佢個仔。又話想搵個認真, 投入嘅人補習!

我真係被呢個A女士煩死!  佢麻唔麻煩D呀大佬!!  我直頭同個agent講, "你同佢講啦, 全香港咁多學校, 我點有咁啱補正佢個仔個間, 仲要係補P.5?  你同佢講, 我有個老友, 佢個仔在呢間學校剛讀完P.6。"

踢著, agent又再打來, 佢話家長想約我見一見, 但可唔可以唔當一堂嘅錢, 大家傾10幾分鐘了解一下。當時係晚上7:30pm, 我屋企準食飯, 我就講, 話, 咁好啦, 9pm啦! 但個agent緊係想快D攪掂 (因為佢收10pm), 問我可唔可以再早D, 最後我話8:30pm啦, 我話, 出得來傾, 點會講10幾分鐘, 唔該你請佢唔好講咁耐。

查實我肯出去廢up, 其一見佢offer嘅價錢叫ok (但唔係真係好高囉), 其二係見近屋企咋。我覺得呢種家長一定係煩爆嘅人, 幫佢個仔補習真係唔慌好做。

出到來, 佢個仔都出現左一陣... 呢位A女士, 好心佢啦, 邀請我出來了解, 都請我去麥記飲杯野啦, 但佢話, "介唔介意坐在廣場傾呀?" (那個廣場好多人坐, 圍住廣場係好多食店, 好安全的), 雖然係夜晚, 但都好熱呀.... 佢真係cheap爆!

佢來來去去就係問我可以點幫佢個仔, 我話, 坊間都大把練習, 我印好多比佢做唔係問題, 問題在於, 佢一定要溫習, 同埋好勤力, 因為我點出力都唔夠。資質唔夠唔係問題, 懶死咁就冇藥救。我問A女士, 覺得佢個仔最大問題係乜, 佢一句: 懶囉!

咁我話, 你都一定要幫手, 因為我一個禮拜見佢兩三次, 每次個半鐘; 但你每日都對住佢, 你一定都要幫手要佢勤力溫習, 做多D練習, 睇多D課外書, 先得。

我諗佢唔多鐘意我咁講.... 我只係講事實, 你唔好以為有個補習老師, 就等於識飛先得架!!  好似比得錢我, 就要包攪掂咁。自己唔努力, 我係神仙都打救唔到佢架。

講成個鐘, 佢混左我個大吉!!  到最後, 就係: 遲D睇下大家有冇合作機會吖"!! 

不過我冇失望, 呢種家長同學生, 補唔到我都唔介意。