我也來 "義海豪情" 一番

近日放工之後都唔係咁想出街, 想即刻返屋企, 因為追電視劇! 

原先都冇乜特別睇義海豪情, 不過睇下睇下就變成追劇喇..... 呢排睇呢套劇睇到我成日眼濕濕, 因為依家講緊日本仔佔領中國, 播放當時中國人生活艱苦, 每日都被日本仔凌虐嘅場面, 真係睇到我好心酸, 好唔安樂。

雖然電視、電影預左會誇大, 但係我反而覺得套劇講嘅中國人被凌虐嘅程度已經被減低左, 當年日本仔嘅所作所為一定惡毒過電視裡講嘅超過千倍以上。我有一些年老嘅親人, 曾經經歷過日本仔佔領中國、香港嘅慘況, 佢地話, 只要遲一秒對住班日本軍人鞠躬, 你少則被日本軍人狂打, 大則即刻被槍斃 (如果個棧格軍人心情唔好的話)。當年所有女人真係好驚好驚, 佢地會想盡辦法, 搵大米缸收起屋企嘅女人, 再在缸頂舖滿米, 缸出面就貼晒常滿嘅字。佢地大部份人就算保得住個性命, 每日都要諗會唔會餓死。有番薯食都難, 因為有樹皮食都已經好了。

講真句, 我真係對日本人沒有太大好感, 雖然我知道呢一輩嘅日本人可能好多都好善良, 但我真係不由自住見到佢地就想起我地嘅上一輩、再上一輩嘅辛酸、苦痛。呢一輩嘅日本人, 根本絕大部分都懵懵地, 唔知佢地國家嘅領袖、軍人, 其實做左幾多陰公野, 害死左幾多我地嘅中國人!  仲要有某些日本極右人士, 撐大眼話日本從來冇侵略過中國, 簡直令人憤怒。

中國人真係多災多難, 我地真係要自強不息, 一定要做出色嘅民族。我地唔需要個個做大富貴, 但起碼唔好做陰質事害人。你睇下韓國人嘅勁, 佢地有自己嘅科研, 車 (Kia Motors, Hyundai Motors等等), 科技產品 (Samsung, LG等等), 有自己嘅電訊網絡, 就連護膚品都已經成功打入好多市場 (Laneige等).....

好悲哀, 中國人, 除左做假野最厲害, 最勁最諷刺, 竟然係不斷為錢害自己民族嘅人, 豆腐渣工程、毒奶粉、迫害忠良, 憑良心講真相竟然要被判無期徒刑、被軟禁, 究竟幾時, 中國先能夠成為真正強國? 不要做暴發戶, 但願每個中國人都做一個有良知嘅中國人。

今日我竟然講野咁正經, 大家應該唔多相信呢個人係我....