相距上一篇有關我葡萄牙之旅嘅文章, 已經係好耐之前嘅事!! 呢排終於多番多少少時間, 決定要好好寫完呢個旅程嘅點滴先得, 唔想爛尾呀!!
Tomar呢個城市, 應該對大部分香港人來講都好陌生, 除非閣下好似我咁鐘意 "娟窿娟那"去埋D唔係咁在葡萄牙以外出名嘅旅遊城市。
我唔知Tomar有冇中文譯名, 不過就算有, 我都唔會記得, 記住Tomar呢個名仲方便簡單呢
真係人都顛, 每日雖然有好幾班長途巴士會由里斯本開往Tomar, 但由於我想一日遊連踩兩城市 (早上Tomar, 下午到另一著名城市Fatima)關係, 我要搭早上7am開出嘅巴士!! 冬天嘅里斯本雖然唔係話凍得好交關, 但係加埋成日出現嘅大雨, 真係唔講得少! 最離奇係里斯本地鐵開6:30am, 但我住嘅hostel, 有點唔方便, 照道理係冇可能搭到呢班車。好彩我個當地朋友救我一命 (當中細節唔詳講喇, 就算多謝佢佢都唔知架啦, 哈哈哈), 總之最後趕到搭呢班車
順便講句, 我平常唔主張咁趕去旅行, 但葡萄牙小鎮一般半日遊真係已經足夠, 如果玩全日真係多左少少, 加上如果係冬天旅遊當地更加如此, 快天黑 (大約5-6pm), 店亦較早關門, 所以不如把握時間一日去多另一小鎮參觀。
左圖：Tomar巴士總站看來有點陳舊, 但裡面的職員很好, 比左個鎮地圖我, 又教我點行去鎮中心。
右圖: 從巴士總站遠看, 可以見到鎮上最高處嘅Templar Castle (Castelo dos Templarios)
由於去到Tomar都未到9點半, 早得太誇張
由巴士總站步行去小鎮中心嘅途中, 有間cafe有開, 即刻走入去買野食醫肚。不過全個牌都係寫葡萄牙文, D字又同意大利文唔多同, 我都唔知D野食係乜。店員又唔識英文, 我本來去去識個幾隻葡文字在此完全不能派上用途, 葡萄牙人真係好有耐性
最後...佢地只係聽得明我講嘅 Chocolate一個字, 而野食...我係亂點一通, 我都唔知食左乜落肚!!!
普遍葡萄牙人嘅英文程度其實我覺得絕對比意大利同西班牙人好, 不過你不能期望在一個小鎮裡嘅一間小店都會有操流利英文嘅人, 所以, 冇所謂, 我enjoy!!!
靜到人都唔多隻嘅早上......Tomar鎮
夏天嘅Tomar假日非常熱鬧, 但可惜.....我在12月凍到鬼嘅時候去, 天氣唔穩定, 天色成日都差, 我當日去到本來都黑天黑地, 到我就來走時仲開始落起大雨添....
從Tomar main square旁邊有路, 沿著上, 經過一D石仔路 (落雨濕濕行記得要好小心, 我幾次差d滑低)。雖然都已經早上11點有多, 但沿途人都冇個, 其實我一個人行都有d驚, 一來驚行錯路唔知上左邊個山頭, 另外又驚有賊人突然撲出來! 好彩, 最後安全到達, 而且在Templar Castle (Castelo dos Templarios)內碰到一班台灣人, 大家仲傾左一陣計, 好開心呢!!
Castle內最出名係 Convento de Cristo (Christ Convent修道院), 修道院建於1162年, 雖然外牆已經頗為殘舊, 但建築真係好靚, 大大嘅柱, 闊闊嘅廊, 加上葡萄牙傳統嘅磚牆 (azulejos), 所以旅遊旺季時吸引好多遊客前來參觀 (今日例外啦, 哈哈)。
如果在天氣好嘅日子, 相信半日遊Tomar都會好趕, 但今日我來到, 店又遲開, 周圍人又唔多, 所以時間簡直多得滯.....臨離開修道院前發生左一段小插曲, 話說因為修道院個個地方都差唔多, 我在裡面迷路!! 攪左成15分鐘先出番大門 (仲要原來入口同出口係唔同, 比佢玩死!!), 嚇到我死, 因為我買左巴士票, 要在下午去另一城市Fatima, 如果miss左班車, 除左浪費左車費外, 仲大鑊係要等過另一班兩、三個鐘後先有嘅巴士!!
死跑爛跑, 衝落山, 跑番巴士總站, 好彩....仲有時間剩, 我仲去買左一個我在葡萄牙嘅第一個葡tart來食, 超好味呀!!!!!!
好野, 終於今日有所作為, 寫完Tomar之旅, 下一站 -- Fatima!! 普遍天主教徒都應該識嘅城市, 因為.......下回分解!!
穿梭葡萄牙之旅 2009-2010 - 待續!
睇見你D相，又令我諗起多年前的葡萄牙之旅，雖然去既地方不及你多，但的 確 好令人懷念及回味(因為葡萄牙是我第一個去的歐洲國家)。 如果有機會，我都幾想去葡萄牙及西班牙的小鎮玩，有時小鎮比大城市更有特色！
ReplyDelete我超鍾意葡萄牙特有的地磚，好靚！你有買幾塊小磚作留念嗎？ 我還記得每塊 1.3歐元！
講到叫野食方面，因為我們預計葡萄牙應該不普遍用英文，所以早有準備，幸好拿了一本葡萄牙旅遊指南，當中appendix有一些英葡文的常用詞語... 我們叫野食就全靠它！一有唔明，就遞本書比人睇... 哈哈！係咪好醒目呢？不 過 亦會有有問題的時候，例如有些解不了的 詞彙 ，我 們 只能亂點(同你一樣)， 但 我們會嘗試記住個字，咁下次睇餐牌時就知道點叫啦~~ 有次我們到街市食野，以為叫野食是一碟計，原來是按一件件計，我們最終4個人一齊分享一塊小牛扒及一條沙甸魚！當地人見到都覺得我們奇怪呢！
[kl回覆08/17/2012 01:33:00]忍唔住要搭吓訕:p
係呀, 我去到外地旅遊果時樣樣嘢都覺得好特別, 但係果d嘢對當地人嚟講就普通到不得了。 有咗呢d體會之後響香港見到d乜都影一餐o既遊客就會明白多一d喇~~
[版主回覆06/24/2010 12:15:00]原來葡萄牙係你第一個去嘅歐洲國家, 唔怪得佢對你有特別感覺啦, 嘻嘻!! 諗番起, 我去嘅第一個歐洲國家係意大利, 不過好攪笑, 我係去完返來先開始鐘意呢個國家, 但葡萄牙就係正識因為鐘意而去的。
我都係呀, 每次睇番以前去旅行嘅相都會好回味, 而呢幾日寫呢篇entry又令我好想快d再去過葡萄牙呀!! 哈哈, 我都覺得, 葡萄牙、西班牙、意大利嘅小鎮往往比起佢地大城市更好玩更有趣, 而且小鎮嘅人更加有善同helpful, 唔似得大城市嘅人咁冇耐性、咁市儈。
問得好, 我雖然勁鐘意葡萄牙嘅azulejos, 但一塊呢d紀念品都冇買番來!! 原因係因為我已經買左唔少紀念品, 又諗住可能不久之後會再去, 所以諗住下次先買。1.3 euros真係好平喎, 我印象中依家嘅azulejos冇咁平呀。
我查實都有兩本phrase books在手, 但我搵極都搵唔到間小食店d野食係乜東東, 而且, 我連想講 hot chocolate嘅hot字都搵唔到, 激死!!! 同埋可能我太過認為葡萄牙所有人都講得幾句英文, 警覺性低左...哈哈哈, 不過之後都有問番個葡萄牙朋友點講。
你地去過葡萄牙嘅街市食野咁特別?? 我在Florence時就試過去街市食野, 反而在葡萄牙我好似冇去過街市。原先我話想參觀下葡萄牙嘅街市, 睇下係乜樣, 點知比個葡萄牙朋友笑呀, 佢話仲乜要去睇街市, 有乜好睇, 又話個個街市都差唔多! 但我見旅遊書都suggest去葡萄牙當地睇下街市, 話好特別....可能在當地人眼中, 係一d都唔特別的, 哈哈哈!!
Nice to see ur blog. I am living with fiance in Tomar now.
ReplyDelete[版主回覆06/27/2010 15:02:00]Hello Natalie, it's so nice to see you here too!! Tomar is a very interesting small town in Portugal. Do you enjoy the life living in there? Have you been to many different cities and towns in Portugal?
看完你TAMAR 的相片,點解我對個巴士站一丁點印象都沒有呢??? 我記得BUS STATION 在火車站隔離. 走的那天下雨, 雖然是盛夏, 但有一個人走時有的寒風細雨的感覺.
ReplyDelete[版主回覆06/28/2010 11:34:00]你當時係坐火車去Tomar玩的? 我唔知道原來火車站就在巴士站附近呢。嘩, 盛夏都有寒風細雨的感覺? 其實雖然歐洲夏天非常炎熱, 但又好奇怪, 好多地方在日落後好多時溫差都幾大, 變得好涼。我之前有去過你那邊看你嘅葡萄牙、西班牙之旅, 寫得很好呀。
不是, 葡萄牙我是全程搭BUS的, 想下想下, 我終於記得那個 BUS STATION. 我都係搭BUS 離開TAMAR 去NAZARE & FATIMA 和去COIMBRA.
ReplyDelete[版主回覆06/28/2010 13:09:00]在葡萄牙周圍玩, 坐巴士的確方便得多, 因為好多小鎮嘅火車站好偏僻, 而且巴士費都幾平, 嘻嘻...噢, 你去埋Coimbra? 我上次唔夠時間去咁多地方, 下次再去, 一定要去!!
THANK YOU VERY MUCH!! 我又好像亞婆咁, 寫的文章好花時間, 我個遊記我暫時沒有時間再寫.......
ReplyDelete[版主回覆06/28/2010 13:18:00]唔係唔係, 寫遊記係會長氣, 我都係呀, 哈哈, 因為好多野都想寫低嘛。我都覺得寫遊記好花時間, 亦因為咁, 我都斷寫左一段時間, 唔想求其寫, 想內容有d資訊, 又能講出自己當時在呢個地方嘅行程、心情、見到有趣嘅地方等, 好彩我呢排忙完, 可以繼續番呢個遊記。
我以為你係因為垃圾留言太多將一些文章列做只比朋友睇, 原來你暫時停寫左你的西班牙&葡萄牙遊記, 如果你寫番, 我一定第一時間去睇 ...講開又講, d垃圾留言真係非常惱人, 我每日都delete唔少呢類留言。
你地兩個去是落雨,我剛好相反. 比張相恨下啦!!!
ReplyDelete我很喜歡這間修道院. 拍了很多相. 我在這兒住了兩個晚上,因為第一天已經很晚才到達,所以只玩了一天. 到第三天又一早離開
[版主回覆07/04/2010 21:28:00]小蜜蜂, 我實在羨慕到不得了呀!!! 你幾月去架? 天氣真係好靚呀!!!!! 睇來你真係好鐘意呢個小鎮, 住左兩晚!!!
你地兩個去是落雨,我剛好相反. 比張相恨下啦!!!
ReplyDelete我很喜歡這間修道院. 拍了很多相. 我在這兒住了兩個晚上,因為第一天已經很晚才到達,所以只玩了一天. 到第三天又一早離開
Hello 你好!! 網上面冇乜用中文寫關於葡萄牙o既blog, 你個blog令人睇得好開心~
ReplyDelete我會9月去葡萄牙呀, 有兩至三日留番響Lisbon, 一日去Sintra (即日來回)。 另外想去Tomar + Coimbra, 就係呢兩個站令我有d頭痛, 因為時間關係, 想用大半日響Tomar玩, 然後黃昏時間搭巴士去Coimbra, 去到訓一晚第二朝再玩。我睇Lonely Planet, 好似冇巴士直接由Tomar去Coimbra, 要響Leira轉車, 再睇咗一個巴士website, Tomar去Leira一日有4班車, 但係Leira去Coimbra一日只得一班............請問你知唔知仲有邊d 巴士公司會有多d班次? 又或者我應該去邊個website搵資料呢? 我係睇呢個website架: http://www.rodotejo.pt/
http://www.rede-expressos.pt/ -- 呢間巴士公司就調番轉, 一日只有一班車由Tomar去Coimbra
另外，使唔使一早上網買定飛呢？定到時先買都得呢？
麻煩你!! Thanks a lot :)
KL
[kl回覆08/22/2012 00:57:05]我雖然好想去波圖, 但係冇時間呀...........,得六日玩, 唯有希望之後有機會啦 :)
[版主回覆08/19/2012 23:13:55]我其實都係計埋補假先有17'-18日大假....你去埋西班牙, 好呀! 通常都係西葡一齊玩. 咁又係, 如果去到Setúbal但睇唔到海豚真係好sad....我希望我下次去葡萄牙時有時間去Setúbal呀!!!!
[kl回覆08/18/2012 01:14:30]嘩, 你就好啦!! 我冇咁多假呀, 所以連埋西班牙都係兩個禮拜多d, 淨係葡萄牙得6日ja..................至於Setúbal, 我驚一場去到睇唔到海豚, 所以都仲係十五十六................
[版主回覆08/17/2012 23:42:16]oh, 唔知點解你在另一個post所留嘅comment唔見左......我都係咁話, 可能因為係遊客, 去到旅行真係乜都影得一餐的, hahaha!!
我今次終於有機會落葡萄牙南部玩, Lagos岩石真係好壯觀 (當然我地香港嘅世界地質公園都一樣咁正!) .... 話唔定你今次去完葡萄牙好鐘意, 然後好似我咁不斷返去, haha!!
[版主回覆08/17/2012 23:35:27]唔駛客氣, Leiria細細地, 剛剛好玩半日然後返回Lisbon....橫掂9月日照時間都好長, 8、9點先天黑, 多d時間玩!
d相都係用儍瓜機影, 因為方便嘛, 亂影一通, 哈哈! Setúbal...我都想去呀, 但仲未去過呀! 我一個葡萄牙朋友都話Setúbal好靚, 但冇辦法, 每次我去都大約只有17, 18日, 去得南又去唔到北, 好難...希望下次回去時有時間! 咁你估你夠唔夠時間去埋Setúbal? 你只去葡萄牙, 定係去埋西班牙呀?
[kl回覆08/17/2012 01:21:59]係喎!! Leiria都幾靚喎!! 好彩你提一提我, 咁我可以多個選擇喇, thanks!!
啱啱先發現你幾篇新文章, 原來你又去咗葡萄牙, 你果然好熱愛呢個國家呀!! 你影d相好靚呀, 果d岩石好特別, 可惜我冇時間去啦, 我都好鍾意呢種生態遊架......
咁你有冇去過Setúbal? Lonely Planet話可以響果度join d tour睇海豚, 搞到我有d心郁郁tim......
[版主回覆08/16/2012 21:38:03]9月出發好呀, 天氣應該好正呀!! 我雖然已經去左幾次葡萄牙, 但 so far都仲未去過 Coimbra, 就係因為唔夠時間!! 如果你去開 Tomar, 可以考慮去埋附近的 Fatima, 但如果你不是天主教徒可能沒興趣... Batalha or Alcobaça! 但有幾多車去就要查一查, 我印象中要轉車, 唔多順路的
[kl回覆08/16/2012 01:52:06]Thanks again!!
我9月中出發呀~
係呀, Lisbon係我個基地 :p 因為最多響第二個地方stay一晚, 唔會帶大行李。 我依家諗緊Tomar去Leiria搭Rodotejo, Leiria去Coimbra就搭Rede Expresso, 咁樣就match到喇~~
其實因為另外一個朋友會遲兩日先到葡萄牙, 時間有限, 所以可能要cut咗Coimbra................咁如果有一日時間, 可以玩Tomar + 邊度好呢?
[版主回覆08/15/2012 23:06:36]Hello Kl!! 網上講葡萄牙嘅中文blog真係好少呀...不過好開心你咁有興趣去葡萄牙玩!! , 唔駛客氣, blog友們大家互相幫助呀, 我都希望你在葡萄牙玩得開心呀!!
Rede Expresso係葡萄牙最大嘅巴士公司, 但你講得啱, 佢地有部分路線嘅班次好少! 仲有一間巴士公司 叫Eva Bus, 但好似冇去 Tomar & Coimbra的。你Tomar去Coimbra那程巴士是否唔match你玩完Tomar的時間呀? 不過如果你有行李帶住, 可能有困難, 因為我記憶中 Tomar巴士總站並沒有 Luggage storeroom!! 如果你拿著行李由 Tomar bus terminus行去 town center, 將會好甘呀!!! 你會否考慮一日內 玩tomar + another town, 然後 回Lisbon (如果 Lisbon是你的基地), 第2日再一早 去Coimbra?
巴士票唔駛上網買定呀, 我去過3次葡萄牙玩 每次都係去到先買! 基本上都有票, 如果係長途車, 驚的話可以早一日去巴士總站買定 (例如 Lisbon --> Porto).
你幾時出發呀??